សារព័ត៌មាន Fox News បានចេញផ្សាយនៅថ្ងៃទី២១ កុម្ភៈ ២០១៩នេះថា លោកប្រធានាធិបតីរុស្ស៊ី វ្ល៉ាឌីមៀរ ពូទីន បាននិយាយនៅក្នុងសេចក្តីថ្លែការណ៍មួយកាលពីថ្ងៃពុធដោយបានព្រមានថា រុស្ស៊ីនឹងកំណត់ដោលដៅទៅលើសហរដ្ឋអាមេរិកដោយប្រើមីស៊ីលល្បឿនលឿនជាងសម្លេងរបស់ខ្លួន ប្រសិនបើសហរដ្ឋអាមេរិកដាក់ពង្រាយគ្រាប់មីស៊ីលរយៈចម្ងាយមធ្យមទៅកាន់តំបន់អ៊ឺរ៉ុប។
គ្រាប់មីស៊ីលរុស្ស៊ីប្រភេទ ហ្សឺខូន ដែលរុស្ស៊ីបានអះអាងថាមានល្បឿនលឿនជាងសម្លេង ៩ដង អាចហោះបានក្នុងចម្ងាយ ៩៩៨គីឡូម៉ែត្រ ដែលវាជាមីស៊ីលទើបត្រូវបានធ្វើទំនើបកម្មប្រឆាំងគូសត្រូវអាមេរិករបស់ខ្លួន។
សេចក្តីប្រកាសព្រមានធ្ងន់ៗពីសំណាក់លោកពូទីនបែបនេះ បានធ្វើឡើងបន្ទាប់ពីការដកខ្លួនចេញពីសន្ធិសញ្ញានុយក្លេអ៊ែរ ដែលអាមេរិក និងសូវៀតបានចុះហត្ថលេខារួមគ្នាកាលពីឆ្នាំ ១៩៨៧។ លោកពូទីនបានចោទប្រកាន់ថា សហរដ្ឋអាមេរិកបានធ្វើការចោទប្រកាន់ខុសមកលើរុស្ស៊ី ដើម្បីបង្ហាញហេតុផលពីការសម្រេចដកខ្លួនចេញពីកិច្ចព្រមព្រៀងនេះ។
លោកពូទីនបានបញ្ជាក់ម្តងហើយម្តងទៀតថា រុស្ស៊ីនឹងមិនមែនជាប្រទេសទីមួយដែលដាក់ពង្រាយគ្រាប់មីស៊ីលរយៈចម្ងាយមធ្យមថ្មី នៅអ៊ឺរ៉ុបនោះទេ ប៉ុន្តែលោកបានព្រមានថា រុស្ស៊ីនឹងធ្វើការសងសឹកប្រសិនបើសហរដ្ឋអាមេរិកដាក់តម្លើងមីស៊ីលនៅទ្វីបមួយនេះ។
លោកពូទីនបន្តថា អាវុធដែលលោកបានប្រកាសកាលពីឆ្នាំមុនរួមមានគ្រាប់មីស៊ីលប្រដែត Burevestnik និងដ្រូនក្រោមទឹកនុយក្លេអ៊ែរ Poseidon កំពុងត្រូវបានធ្វើការសាកល្បងប្រកបដោយជោគជ័យ។
ទន្ទឹមនេះ លោកពូទីនបានបន្ថែមថា ហេដ្ឋារចនាសម្ព័ន្ធរបស់ខ្លួននឹងត្រូវទទួលយកនូវការធ្វើទំនើបកម្ម ដោយមានអាកាសយានដ្ឋានចំនួន ៦០កន្លែងនឹងត្រូវធ្វើឲ្យប្រសើឡើងក្នុងរយៈពេល ៦០ឆ្នាំទៀត។
ការបង្កើនអនុភាពកម្លាំងសព្វាវុធរុស្ស៊ីនេះ ធ្វើឡើងក្រោយការប្រកាសដកខ្លួនចេញពីសន្ធិសញ្ញានុយក្លេអ៊ែរពីសំណាក់សហរដ្ឋអាមេរិក។ អ្នកវិភាគនិយាយថា នឹងមានការប្រណាំងប្រជែងគ្នាយ៉ាងពិតប្រាកដខាងគ្រឿងសព្វាវុធ ប្រសិនបើអាមេរិកដកខ្លួនចេញពីសន្ធិសញ្ញានេះ៕
Home ព្រឹត្តិការណ៍ថ្មីៗ ជាថ្មីម្តងទៀត លោកពូទីនព្រមានថា រុស្ស៊ីនឹងប្រើមីស៊ីលល្បឿនលឿនជាងសម្លេងវាយប្រហារទៅលើសហរដ្ឋអាមេរិក ប្រសិនបើអាមេរិកហ៊ានតែដាក់ពង្រាយមីស៊ីលនៅអ៊ឺរ៉ុប