សារព័ត៌មាន CNN បានចេញផ្សាយនៅថ្ងៃទី៧ មីនានេះថា សហរដ្ឋអាមេរិកបានបញ្ជូនយន្តហោះទម្លាក់គ្រាប់បែក B-52 ទៅហោះនៅជិតប្រជុំកោះក្នុងតំបន់សមុទ្រចិនខាងត្បូង ដែលចិនកំពុងតែកាន់កាប់ និងកំពុងតែវ៉ាងទីនៅក្នុងតំបន់។
យោងតាមសេចក្តីថ្លែងការណ៍ពីមូលដ្ឋានកងទ័ពអាកាសសហរដ្ឋអាមេរិកប្រចាំតំបន់ប៉ាស៊ីហ្វិកបានឲ្យដឹងថា «យន្តហោះទម្លាក់គ្រាប់បែក B-52 H Stratofortress ពីរគ្រឿងបានហោះចេញពីមូលដ្ឋានទ័ពអាកាសអេនឌើសិននៃកោះហ្គាំ កាលពីថ្ងៃទី ៤មីនា ឆ្នាំ ២០១៩»។
សេចក្តីថ្លែងការណ៍នោះបាននិយាយទៀតថា «យន្តហោះទម្លាក់គ្រាប់បែកមួយគ្រឿងបានធ្វើការហ្វឹកហាត់ នៅក្នុងតំបន់សមុទ្រចិនខាងត្បូង មុនត្រឡប់ទៅកាន់មូលដ្ឋានកោះហ្គាំវិញ រីឯយន្តហោះមួយគ្រឿងទៀតបានធ្វើការហ្វឹកហាត់នៅក្នុងតំបន់ជប៉ុន ក្នុងការសហការជាមួយកងទ័ពជើងទឹកសហរដ្ឋអាមេរិក និងកងទ័ពអាកាសជប៉ុន មុននឹងវិលចូលមូលដ្ឋាននៅកោះហ្គាំ»។
ប្រតិបត្តិការជើងហោះហើរទាំងពីរ គឺជាផ្នែកនៃបេសសកកម្មវត្តមានយន្តហោះទម្លាក់គ្រាប់បែកបន្តរយៈពេលវែងរបស់បញ្ជាការសហរដ្ឋអាមេរិប្រចាំតំបន់ប៉ាស៊ីហ្វិក ដែលកម្លាំងយោធានិយាយថា ខ្លួនមានបំណងក្នុងការរក្សាការត្រៀមខ្លួនរាល់រាល់។ ការហោះទៅកាន់តែកៀកទៅនឹងប្រជុំកោះដែលចិនកាន់កាប់កាលពីថ្ងៃចន្ទ គឺធ្វើឡើងដោយអនុឡោមតាមច្បាប់អន្តរជាតិតែប៉ុណ្ណោះ។ នេះបើតាមកងកម្លាំងអាកាស ដែលបាននិយាយ។
ជារឿយៗ សហរដ្ឋអាមេរិកបានបញ្ជូនយន្តហោះទម្លាក់គ្រាប់បែកធុនធ្ងន់ ទៅហោះរំលងតំបន់សមុទ្រចិនខាងត្បូង ដើម្បីបញ្ជាក់ឲ្យច្បាស់ថា តំបន់សមុទ្រចិនខាងត្បូងមិនមែនជាកម្មសិទ្ធ ឬជារបស់ដូនតាអ្នកណាបន្សល់ទុកឲ្យនោះទេ ប៉ុន្តែ តំបន់នេះ គឺជាតំបន់ដែនទឹកអន្តរជាតិពេញទី។
សារព័ត៌មាន ABC បានរាយការណ៍ថា សហរដ្ឋបានបង្វែរយន្តហោះ B-1, B-52 និងយន្តហោះ B-2 Spirit ចេញពីមូលដ្ឋានអានឌើសិន នៅលើកោះហ្គាំ ចាប់តាំងពីឆ្នាំ ២០០៤ ជាផ្នែកនៃបេសសកកម្មវត្តមានយន្តហោះទម្លាក់គ្រាប់បែកបន្តរបស់ខ្លួន។
រដ្ឋាភិបាលចិនមានការខ្លាចរអាអំពីកម្លាំងយោធាសហរដ្ឋអាមេរិកនៅជិតតំបន់ ដែលខ្លួនកំពុងតែកាន់កាប់។
កាលពីខែកញ្ញា ចិនបានបញ្ជូននាវាចម្បាំងរបស់ខ្លួនបើកទៅបំបុកនាវាចម្បាំងអាមេរិក ដែលកំពុងធ្វើនាវាចរណ៍ដោយសេរីនៅក្នុងតំបន់ដែនទឹកអន្តរជាតិ។ ទង្វើនេះបញ្ជាក់ថា ចិនកំពុងតែវ៉ាងទីផ្តាច់មុខនៅក្នុងតំបន់៕
Home ព្រឹត្តិការណ៍ថ្មីៗ សហរដ្ឋអាមេរិកបញ្ជូនយន្តហោះទម្លាក់គ្រាប់បែក ហោះទៅជិតប្រជុំកោះដែលចិនកំពុងកាន់កាប់ និងវ៉ាងទី