(រដ្ឋធានីវ៉ាស៊ីនតោន)៖ មន្ត្រីកំពូលនៅក្នុងអង្គការណាតូ និងជាប្រធានកងកម្លាំងសហរដ្ឋអាមេរិកប្រចាំនៅអ៊ឺរ៉ុបបាននិយាយកាលពីថ្ងៃអង្គការថា ប្រសិនបើទួរគីនៅតែបន្តទិញប្រព័ន្ធការពារដែនអាកាសរុស្ស៊ីទៀតនោះ លោកនឹងណែនាំឲ្យមន្ទីរប៉ង់តាហ្គោនបដិសេធនូវការបញ្ជាទិញយន្តហោះចម្បាំង F-35។
ធ្វើសក្ខីកម្មនៅមុខគណៈកម្មាធិការព្រឹទ្ធសភា លោកឧត្តមសេនីយ៍ Curtis Scaparrotti បាននិយាយថា វានឹងក្លាយជាដំបូន្មានយោធាដ៏ល្អបំផុតរបស់លោក ដែលថាការលក់យន្តហោះចម្បាំង F-35 ទៅឲ្យប្រទេសនេះនឹងត្រូវកាត់ផ្តាច់ ប្រសិនបើប្រទេសនេះទិញប្រព័ន្ធការពារមីស៊ីល S-400។
លោក Scaparrotti បាននិយាយយ៉ាងដូច្នេះថា «ប្រសិនបើពួកគេទទួលយក S-400 ដើម្បីដាក់តម្លើងវានៅក្នុងប្រទេសទួរគី បញ្ហាទីមួយនៅត្រង់ថា វាមិនមានអន្តរប្រតិបត្តិការជាមួយប្រព័ន្ធការពារមីស៊ីលអង្គការណាតូ ហើយក៏គ្មានអន្តរប្រតិបត្តិការនៅផ្នែកខាងក្នុង នៃប្រព័ន្ធការពារមីស៊ីល ដែលត្រូវបានធ្វើសមាហរណកម្មផងដែរ។ បញ្ហាទីពីរ គឺពាក់ព័ន្ធទៅនឹងយន្តហោះចម្បាំង F-35។ វាបង្ហាញពីបញ្ហាចំពោះយន្តហោះចម្បាំងរបស់យើង ប៉ុន្តែយន្តហោះ F-35 ខ្ញុំជឿជាក់លើវា»។
ការព្រួយបារម្ភអំពីការសម្រេចចិត្តរបស់ទួរគីក្នុងការទិញប្រព័ន្ធ S-400 មិនមែនជារឿងថ្មីនោះទេសម្រាប់ទួរគី។ មន្ត្រីនៅសហរដ្ឋអាមេរិក និងអឺរ៉ុបជឿជាក់ថា ប្រទេសរុស្ស៊ីអាចទទួលបានព័ត៌មានដ៏គ្រោះថ្នាក់មួយ ស្តីពីយន្តហោះប្រយុទ្ធជំនាន់ទី ៥ ប្រសិនបើប្រព័ន្ធនេះត្រូវបានផ្សារភ្ជាប់គ្នានោះ។
សេចក្តីថ្លែងការណ៍របស់លោក Scaparrotti គឺជាសេចក្តីថ្លែងការណ៍ គួរឱ្យកត់សំគាល់ ជាពិសេសដោយសារលោកក៏ជាមេបញ្ជាការសម្ព័ន្ធមិត្តកំពូលរបស់ណាតូផងដែរ។
យោបលរបស់លោកបែបនេះ បានកើតឡើងត្រឹមប៉ុន្មានសប្តាហ៍ប៉ុណ្ណោះ បន្ទាប់ពីសន្និសីទសន្តិសុខទីក្រុងមុយនិច ដែលអនុប្រធានាធិបតីសហរដ្ឋអាមេរិកលោក Mike Pence បានព្រមានដល់ប្រទេសទួកគីថា «យើងនឹងមិនឈរស្ងៀមទេ ខណៈពេលដែលសម្ព័ន្ធមិត្តអង្គការណាតូបានទិញអាវុធពីពួកសត្រូវរបស់យើង។ យើងមិនអាចធានានូវការការពាររបស់លោកខាងលិចបានទេ ប្រសិនបើសម្ព័ន្ធមិត្តរបស់យើងពឹងផ្អែកទៅលើប្រទេសខាងកើត»។
សូមបញ្ជាក់ថា ទួរគីគ្រោងនឹងទិញយន្តហោះចម្បាំង F-35 ពីសហរដ្ឋអាមេរិកចំនួន ១០០គ្រឿង ខណៈដែលអាកាសយានិកយន្តហោះចម្បាំងទួរគីបានធ្វើការហ្វឹកហាត់ជាមួយអាកាសយានិកអាមេរិកនៅឯមូលដ្ឋានទ័ពអាកាស Luke នៅរដ្ឋអារីហ្សូណា។ ជាលទ្ធផលនៃការបញ្ជាទិញប្រព័ន្ធមីស៊ីល S-400 មន្ទីរប៉ង់តាហ្គោនបានចាប់ផ្តើមធ្វើការសិក្សាថា តើខ្លួនអាចបណ្តេញទួរគីចេញពីមូលដ្ឋានឧស្សាហកម្ម F-35 បានដែរឬយ៉ាងណា៕
Home ព្រឹត្តិការណ៍ថ្មីៗ ឧត្តមសេនីយ៍កំពូលអាមេរិកប្រចាំអ៊ឺរ៉ុប៖ កុំលក់យន្តហោះ F-35 ឲ្យទួរគី បើប្រទេសនេះនៅតែរឹងក្បាលទិញប្រព័ន្ធការពារមីស៊ីលរុស្ស៊ីទៀត