សារព័ត៌មាន CNN បានចេញផ្សាយនៅថ្ងៃទី ២១ មីនា នេះថា កងកម្លាំងសហរដ្ឋអាមេរិកបានដាក់ពង្រាយយន្តហោះទម្លាក់គ្រាប់បែកនុយក្លេអ៊ែរ B-52 ដែលមានសមត្ថភាពទម្លាក់គ្រាប់បែកនុយក្លេអ៊ែរចំនួន ៦គ្រឿងទៅកាន់តំបន់អ៊ឺរ៉ុប ដើម្បីរៀបចំសមរភូមិសង្គ្រាមក្លែងមួយ ដែលនឹងធ្វើការហ្វឹកហាត់ការហោះហើរ ជាមួយសម្ព័ន្ធមិត្តអង្គការណាតូ ដើម្បីបញ្ជូនសារគម្រាមទៅកាន់ទីក្រុងមូស្គូ។
ការបញ្ជូនយន្តហោះទម្លាក់គ្រាប់បែកមហាកំណាចរញ្ជូយពិភពគុននេះ បានធ្វើឡើងក្រោយពេលដែលរុស្ស៊ីបានរំឭកពិធីមួយ ស្តីពីការកាន់កាប់តំបន់ឧបទ្វីបគ្រីមារយៈពេល ៥ឆ្នាំ។
កងកម្លាំងទទួលបន្ទុកកិច្ចការយន្តហោះទម្លាក់គ្រាប់បែកនុយក្លេអ៊ែរ B-52 ក្រុមអាកាសយានិក និងគ្រឿងបរិក្ខាគាំទ្រមកពីយន្តហោះទម្លាក់គ្រាប់បែកទី២ ដែលបានចាកចេញពីមូលដ្ឋានកងទ័ពអាកាស Barksdale ស្ថិតនៅទីក្រុង Louisiana បានធ្វើដំណើរទៅមូលដ្ឋាន RAF Fairford កាលពីចុងសប្តាហ៍នេះ និងបានចូលរួមនៅក្នុងបេសកកម្មហ្វឹហាត់ជាច្រើននៅទូទាំងអ៊ឺរ៉ុប។ នេះបើតាមសេវាកម្ម។
កងទ័ពអាកាសសហរដ្ឋអាមេរិកបាននិយាយថា «កាលពីថ្ងៃចន្ទយន្តហោះទម្លាក់គ្រាប់បែក B52 ចំនួន ៤គ្រឿងបានធ្វើការហោះហើរទៅកាន់កន្លែងជាច្រើននៅទ្វីបអឺរ៉ុបរាប់បញ្ចូលទាំងសមុទ្រន័រវ៉េស មុទ្របាល់ទិក អេស្តូនីនិងសមុទ្រមេឌីទែរ៉ាណេ ក្រិក។ យន្តហោះទម្លាក់គ្រាប់បែក B-52 មកពីមូលដ្ឋានទ័ពអាកាសអ៊ែនឌើសិន និងមូលដ្ឋាន RAF Fairford ក៏បានធ្វើការហ្វឹកហ្វឺនហ្វឹកហាត់នៅឥណ្ឌូប៉ាស៊ីហ្វិក និងអឺរ៉ុបផងដែរ ខណៈដែលយន្តហោះទម្លាក់គ្រាប់បែកបានហោះទៅភាគខាងកើតនៃឧបទ្វីប Kamchatka ក្បែររុស្ស៊ី។
សារព័ត៌មានរុស្ស៊ីបាននិយាយថា ក្រុមយន្តហោះទម្លាក់គ្រាប់បែកដ៏សន្ធឹកសន្ធាប់របស់សហរដ្ឋអាមេរិក បានផ្លាស់ប្តូរទិសដៅរបស់ខ្លួនវិញ បន្ទាប់ពីក្រុមយន្តហោះចម្បាំងរបស់រុស្ស៊ីយ៉ាងប្រសេចប្រសាចបានផ្គុំកម្លាំង និងបានស្ទាក់ដំណើរតាមពីក្រោយក្រុមយន្តហោះទម្លាក់គ្រាប់បែកអាមេរិក។ យ៉ាងណាមិញ មិនទាន់មានសេចក្តីថ្លែងការណ៍ពិស្តាណាមួយពីកងកម្លាំងសហរដ្ឋអាមេរិកនៅឡើយទេ នៅត្រឹមរសៀលថ្ងៃទី២១ មីនា។
កងទ័ពអាកាសបាននិយាយនៅក្នុងសេចក្តីប្រកាសព័ត៌មានមួយថា «ការហោះហើរពីតំបន់ឥណ្ឌូ - ប៉ាស៊ីហ្វិក និងអឺរ៉ុបបានបង្ហាញការប្តេជ្ញាចិត្តរបស់សហរដ្ឋអាមេរិកចំពោះសម្ព័ន្ធមិត្ត និងដៃគូតាមរយៈការបង្កើតកម្លាំងយោធាទូទាំងពិភពលោក»។
ការបង្ហាញពីការបញ្ជូនយន្តហោះទម្លាក់ទៅក្បែរប្រទេសរុស្ស៊ីនេះ បានធ្វើឡើងស្របពេលដែលមានរបាយការណ៍អំពីការបញ្ជូនយន្តហោះទម្លាក់គ្រាប់បែកនុយក្លេអ៊ែរពីសំណាក់រុស្ស៊ី នៅក្នុងតំបន់ឧបទ្វីបគ្រីមា។
សារព័ត៌មាន News Week អាមេរិកបានចេញផ្សាយកាលពីថ្ងទី២២ មីនាថា កងកម្លាំងរុស្ស៊ីបានរៀបជើងព្រួលកងកម្លាំងទ័ពអាកាស និងកងកម្លាំងការពារដែនអាកាសបាញ់សាកល្បងគ្រាប់មីស៊ីលនៅព្រំដែនបណ្តាប្រទេសសម្ព័ន្ធមិត្តអាមេរិក។ យន្តហោះចម្បាំងរុស្ស៊ីរាប់សិបគ្រឿង បានចូលប្រឡុកនៅក្នុងសមរភូមិត្រៀមទុកមួយ ដោយយន្តហោះទាំងនោះត្រូវបានបញ្ជាឲ្យទម្លាក់គ្រាប់បែក ទៅកាន់តែកៀកព្រំដែនសម្ព័ន្ធមិត្តអាមេរិក។ ឃើញស្ថានភាពបែបនេះ វត្តមានក្រុមអ្នកប្រយុទ្ធយន្តហោះទម្លាក់គ្រាប់បែកសហរដ្ឋអាមេរិក បានត្រៀមខ្លួនជាស្រេចសម្រាប់ការចូលអន្តរាគមន៍ណាមួយ ប្រសិនបើមានការវាយប្រហារពីសំណាក់ទីក្រុងមីស្គូមកលើសម្ព័ន្ធមិត្តអង្គការណាតូ។
ភាពតានតឹងរវាងសហរដ្ឋអាមេរិក មូស្គូបានឡើងកម្តៅខ្លាំងបន្ទាប់ពីសហរដ្ឋអាមេរិកប្រកាសពីការដកខ្លួនចេញពីសន្ធិសញ្ញានុយក្លេអ៊ែរជាមួយរុស្ស៊ី។ ទន្ទឹមនេះ រុស្ស៊ីព្រមានថា ការដកខ្លួននេះ អាមេរិកកំពុងតែយកលេស ដើម្បីផលិតនុយក្លេអ៊ែរប្រឆាំងមកលើខ្លួន។ រុស្ស៊ីគម្រាមថា ប្រទេសអ៊ឺរ៉ុបណាក៏ដោយ ឲ្យតែហ៊ានដាក់តម្លើប្រព័ន្ធមីស៊ីលអាមេរិក គ្រាប់មីស៊ីលរុស្ស៊ីនឹងហោះទៅរកប្រទេសទាំងនោះភ្លាម។
ក្រោយការគម្រាមនេះ អាមេរិកបានផ្តល់កិច្ចសន្យាដាក់តម្លើប្រព័ន្ធការពារមីស៊ីលនៅក្នុងប្រទេសប៉ូឡូយ។ ក្រៅពីនេះ រុស្ស៊ីបានរាយការណ៍ដោយចោទថា សហរដ្ឋអាមេរិកបានដាក់តម្លើងប្រព័ន្ធមីស៊ីល នៅក្នុងប្រទេសរ៉ូម៉ានី ដើម្បីការពារសម្ព័ន្ធមិត្តរបស់ខ្លួន៕
