សារព័ត៌មាន News Week បានចេញផ្សាយនៅថ្ងៃនេះថា សហរដ្ឋអាមេរិកបានព្រមានថា រុស្ស៊ីនឹងត្រូវដាក់ទណ្ឌកម្មធ្ងន់ធ្ងរពីការជួយជ្រុំជ្រែងប្រទេសវ៉េណេហ្ស៊ូអេឡា ខណៈដែលទីក្រុងវ៉ាស៊ីងតោន និងទីក្រុងមូស្គូកំពុងប្រឈមមុខដាក់គ្នាក្នុងសំណុំរឿងវ៉េណេហ្ស៊ូអេឡា។
ប្រេសិតពិសេសរបស់សហរដ្ឋអាមេរិកប្រចាំប្រទេសវ៉េណេហ្ស៊ូអេឡា លោក Elliot Abrahams បានថ្កោលទោសរុស្ស៊ីពីការដាក់ពង្រាយយន្តហោះយោធា និងវត្តមានក្រុមកងទ័ពរុស្ស៊ីជាង ១០០នាក់ទៅកាន់ប្រទេសវ៉េណេហ្ស៊ូអេឡា ដើម្បីជួយគាំទ្រដល់របបលោកនីកូឡា ម៉ាឌូរ៉ូ។
លោក Abrams បានប្រាប់សារព័ត៌មាន BBC ថា «យើងមានជម្រើសជាច្រើនដែលត្រូវធ្វើរវាងទំនាក់ទំនងសហរដ្ឋអាមេរិក និងរុស្ស៊ី»។ «មានរឿងជាច្រើនដែលយើងអាចធ្វើបាននៅក្នុងលក្ខណ្ឌផ្នែកសេដ្ឋកិច្ច មានរឿងជាច្រើនដែលត្រូវធ្វើនៅលើបញ្ជី ដូច្នេះរុស្ស៊ីនឹងត្រូវចំណាយលើរឿងនេះ»។
ក្រោយមកលោក Abrams បានប្រាប់សន្និសីទសារព័ត៌មានមួយថា «វានឹងជាកំហុសមួយសម្រាប់ប្រទេសរុស្ស៊ី ដើម្បីគិតថា ពួកគេមិនបានទទួលអ្វីនៅក្នុងប្រទេសវេណេហ្ស៊ូអេឡានោះទេ។ លោកក៏បានបញ្ជាក់ពីការសង្ស័យរបស់សហរដ្ឋអាមេរិកដែលថា ទីក្រុងមូស្គូកំពុងជួយដល់របបនេះជាមួយនឹងការដាក់ពង្រាយប្រព័ន្ធមីស៊ីល S-300 ដែលទំនងជាបានធ្វើឡើងនៅខណៈពេលដែលមានការផ្តាច់ចរន្តអគ្គិសនី ដែលការដាច់អគ្គិសនីនេះ គឺមកពីការខ្វះខាតឥន្ធនៈ ដោយសារតែការរិតត្បិតរបស់សហរដ្ឋអាមេរិកនេះឯង»។
ប្រព័ន្ធមីស៊ីល S-300 គឺជាប្រព័ន្ធការពារដែនអាកាសរបស់រុស្ស៊ីផលិតឡើងកាលសម័យសូវៀត ប្រើដើម្បីស្ទាក់ចាប់មីស៊ីលរបស់គូសត្រូវ និងស្ទាក់បាញ់យន្តហោះចម្បាំរបស់សត្រូវ ហើយប្រទេសវ៉េណេហ្ស៊ូអេឡាបានទិញមីស៊ីលប្រភេទនេះកាលពីឆ្នាំ ២០០៩ ក្រោយការដឹកនាំដោយប្រធានាធិបតី Hugo Chavez។ កាលពីថ្ងៃអាទិត្យ រូបភាពពីផ្កាយរណបរបស់ក្រុមហ៊ុន ImageSat International របស់អ៊ីស្រាអែលបានចែករំលែកនូវរូបភាពដែលទំនងជាបង្ហាញថា វ៉េណេហ្ស៊ូអេឡាបានដាក់តម្លើងប្រព័ន្ធមីស៊ីល S-300 រួចរាល់ បន្ទាប់ពីប្រទេសនេះបានធ្វើសមយុទ្ធមួយខែមុន និងក្រោយការចរចាទទួលបរាជ័យ។
ការវាយតម្លៃតាមប្រព័ន្ធអ៊ីនធឺណេតបានបង្ហាញកាលពីថ្ងៃចន្ទថា «ក្រុមហ៊ុនផ្កាយរណបរបស់អ៊ីស្រាអែល ImageSat បន្តការតាមដានថតរូបនៅចន្លោះខែកុម្ភៈ និងខែមីនាឆ្នាំ ២០១៩នេះស្របជាមួយនឹងប្រទេសនេះមានវិបត្តិ និងការបង្កើនការប្រុយប្រយ័ត្ននៅក្នុងអង្គភាពគ្រាប់មីស៊ីល S-300»។ ការវាយតម្លៃបន្តទៀតថា «ខណៈដែលកិច្ចចរចានៅតែបន្ត មានមានឱកាសនៅត្រង់ថា បរាជ័យរបស់ខ្លួននឹងវិវត្តន៍ទៅរកការប្រឈមមុខផ្នែកយោធា»។
ការដាក់ពង្រាយមីស៊ីល S-300 របស់រុស្ស៊ីនៅវ៉េណេហ្ស៊ូអេឡា បានលេចឡើងបន្ទាប់ពីសហរដ្ឋអាមេរិកបានព្រមានពីវត្តមានយោធា និងយន្តហោះយោធារុស្ស៊ីពីរគ្រឿងនៅក្នុងប្រទេសវ៉េណេហ្ស៊ូអេឡា។ លោកត្រាំបានទាមទារឲ្យរុស្ស៊ីត្រូវតែដកទ័ពរបស់ខ្លួនចេញពីប្រទេសនេះ។ លោករដ្ឋមន្ត្រីការបរបរទេសសហរដ្ឋអាមេរិកបាននិយាយថា រុស្ស៊ីកំពុងតែយកជើងរាទឹក នៅក្នុងប្រទេសវ៉េណេហ្ស៊ូអេឡា។ ផ្ទុយទៅវិញ រុស្ស៊ីបាននិយាយថា ខ្លួនពិតបានបាកដាក់ពង្រាយទ័ពទៅកាន់វ៉េណេហ្ស៊ូអេឡាមែន ប៉ុន្តែវត្តមានទ័ពរបស់ខ្លួន គឺជាវត្តមានស្របច្បាប់ ម្យ៉ាងទៀតវត្តមានទ័ពនេះ គឺដើម្បីតែការពិគ្រោះយោបលយោធាតែប៉ុណ្ណោះ វាមិនពាក់ព័ន្ធទៅនឹងប្រតិបត្តិការយោធានោះទេ។
ដូចគ្នានេះដែរ កាលពីចុងឆ្នាំមុន រុស្ស៊ីបានបញ្ជូនយន្តហោះយោធាពីរគ្រឿង និងបានដកចេញវិញ បន្ទាប់ពីមានប្រតិកម្មធ្ងន់ៗពីសហរដ្ឋអាមេរិក៕
