រដ្ឋបាលលោកត្រាំកំពុងស្វែងរកមធ្យោបាយក្នុងការគាំទ្រផ្នែកហិរញ្ញវត្ថុដល់មេដឹកនាំប្រឆាំងវ៉េណេស៊ុយអេឡា លោកជាន់ ហ្កៃដូ ដែលត្រូវបានអន្តរជាតិទទួលស្គាល់ជាប្រធានាធិបតីស្តីទីនៃប្រទេសវ៉េណេហ្ស៊ូអេឡា។ ការផ្តល់ការគាំទ្រនេះ គឺតាមរយៈលំហូរចូលនៃទឹកប្រាក់ ដែលពាក់ព័ន្ធទៅនឹងការបង្កកទ្រព្យសម្បត្តិ ឬប្រាក់កម្ចី។
មន្ត្រីរដ្ឋបាលជាន់ខ្ពស់សហរដ្ឋអាមេរិក ៣រូបបាននិយាយប្រាប់សារព័ត៌មាន CNN ថា គំនិតផ្តួចផ្តើមនេះមានបំណងជួយលោកហ្កៃដូឱ្យបង់ប្រាក់ឱ្យយោធា និងរដ្ឋាភិបាលរបស់វ៉េណេស៊ុយអេឡា ដែលជាផ្នែកមួយនៃកិច្ចខិតខំប្រឹងប្រែងដ៏ធំធេង ដើម្បីកាត់បន្ថយការកាន់អំណាចរបស់លោកម៉ាឌូរ៉ូ។
ប្រភពពីសារព័ត៌មាន The Hill បាននិយាយថារដ្ឋបាលកំពុងពិចារណាអំពីមធ្យោបាយជាច្រើន ក្នុងការទទួលបានជំនួយ និងជំនួយមនុស្សធម៌ផ្តល់ទៅឲ្យលោកមេដឹកនាំគណបក្សប្រឆាំងវ័យ ៣៥ឆ្នាំរូបនោះ។
ប្រភពព័ត៌មាន និងអ្នកជំនាញបានពន្យល់ប្រាប់ថា សហរដ្ឋអាមេរិកនឹងមិនទំនងជានឹងផ្តល់ប្រាក់ដោយផ្ទាល់ទៅកាន់ប្រទេសវ៉េណេហ្ស៊ូអេឡានោះទេ ប៉ុន្តែរដ្ឋបាលលោកត្រាំអាចផ្តល់ប្រាក់ចូលទៅក្នុងប្រទេសជិតខាងប្រទេសវ៉េណេហ្ស៊ូអេឡាដូចជាប្រទេសកូឡំប៊ី ហើយក្រោយមកផ្តល់តាមព្រំដែន។
រដ្ឋបាលលោកត្រាំបានផ្តល់ការគាំទ្រតាមរយៈការផ្តល់មូលនិធិដល់លោកហ្កៃដូចាប់តាំងពីលោកត្រាំបានប្រកាសទទួលស្គាល់លោកហ្កៃដូជាប្រធានាធិបតីស្តីទីមកម្ល៉េះ។
លោកម៉ាឌូរ៉ូនៅថ្ងៃទី៣ ឧសភានេះត្រូវបានគេរាយការណ៍ថា កំពុងថតបង្ហោះជាមួយកងទ័ព ដើម្បីបង្ហាញថា កងទ័ពនៅតែមានភាពស្ម័គ្រស្មោះជាមួយលោក។ ការបង្ហាញនេះ ក៏ដើម្បីបញ្ជាក់ថា លោកកំពុងស្ថិតនៅក្នុងប្រទេស ដែលវត្តមានរបស់លោកខុសពីការអះអាងរបស់លោករដ្ឋមន្ត្រីការបរទេសសហរដ្ឋអាមេរិក ដែលលើកឡើងថា លោកម៉ាឌូរ៉ូកំពុងត្រៀមបង្វិចរត់ចោលស្រុកទៅគុយបា៕
Home ព្រឹត្តិការណ៍ថ្មីៗ លោកត្រាំកំពុងស្វែងរកការបង្កើនការផ្តល់ទឹកប្រាក់ដល់លោកហ្កៃដូ ជាវិធីសាស្ត្រមួយ ដើម្បីទម្លាក់ម៉ាឌូរ៉ូដោយសន្តិវិធី