លោក ផែង វណ្ណៈ អ្នកលេងបណ្តាញសង្គមដ៏ល្បីម្នាក់ ត្រូវបានកម្លាំងកងរាជអាវុធហត្ថ ឃាត់ខ្លួននិងនាំទៅសាកសួរ នៅព្រឹកថ្ងៃទី២ ខែមេសា ឆ្នាំ២០១៩កាលពីពេលកន្លងទៅនេះ ក្រោយលោក គី តិច មេធាវីរបស់សម្តេច ហ៊ុន សែន ដាក់ពាក្យប្តឹង ។
ថ្មីនេះសាលាដំបូងរាជធានីភ្នំពេញ បានបង្គាប់ឱ្យឆ្មាំពន្ធនាគារ នាំខ្លួន លោក ផែង វណ្ណៈ អ្នកលេង Facebook ចូលមកសាកសួរជាថ្មីទៀត នៅថ្ងៃទី២៩ ខែឧសភា ឆ្នាំ២០១៩ ស្អែកនេះ តបតាមបណ្តឹងរបស់ លោក ខាន់ សុវណ្ណ ដែលជាអ្នកអត្ថាធិប្បាយនៅលើបណ្តាញសង្គម Facebook។
បើយោងតាមការចុះផ្សាយរបស់ ហ្វេសញូស៍ ការកោះហៅជនត្រូវចោទ ផែង វណ្ណៈ ឱ្យចូលមកបំភ្លឺនេះ បានធ្វើឡើងបន្ទាប់ពីតុលាការ បានសាកសួរដើមបណ្តឹង គឺលោក ខាន់ សុវណ្ណ ពាក់ព័ន្ធនឹងការដាក់ពាក្យប្តឹងលោក ផែង វណ្ណៈ ចំនួន៥បទល្មើស កាលពីថ្ងៃទី០២ ខែមេសា ឆ្នាំ២០១៩។ នៅក្នុងការឆ្លើយបំភ្លឺក្នុងនាមដើមបណ្តឹងនេះ លោក ខាន់ សុវណ្ណ បានរក្សាជំហរប្តឹង លោក ផែង វណ្ណៈ ដដែលដោយឥតមានការកែប្រែនោះទេ។
បណ្តឹង លោក ខាន់ សុវណ្ណ ដែលប្តឹងលោក ផែង វណ្ណៈ ចំនួន៥ករណីនោះ រួមមាន៖ បទហិង្សាដោយចេតនា, គំរាមថានឹងសម្លាប់, បរិហារកេរ្តិ៍ជាសាធារណៈ, ជេរប្រមាថជាសាធារណៈ និងគំរាមកំហែងហែកកេរ្តិ៍ ដែលលោកផែង វណ្ណៈ ដែលបំពានទៅលើលោក ខាន់ សុវណ្ណ ជាបន្តបន្ទាប់មុនពេលចាប់ខ្លួន។ ក្នុងពាក្យបណ្ដឹងនោះ លោក ខាន់ សុវណ្ណ បានស្នើសុំឱ្យតុលាការផ្ដន្ទាទោសលោក ផែង វណ្ណៈ តាមផ្លូវច្បាប់ ហើយទាមទារសំណងការខូចខាត ចំនួន១លានដុល្លារ និងសំណងជំងឺចិត្ត ចំនួន២០ម៉ឺនដុល្លារ និងការខាតបង់ពេលវេលាសេវាកម្មច្បាប់១ម៉ឺនដុល្លារផងដែរ។
គួររម្លឹកដែរថា យោងតាមដីកាបង្គាប់ឱ្យឃុំខ្លួនរបស់ចៅក្រមស៊ើបសួរ បញ្ជាក់ថា លោក ផែង វណ្ណៈ ត្រូវដាក់ឱ្យស្ថិតក្រោមការពិនិត្យពីបទ៖ ញុះញង់ឱ្យប្រព្រឹត្តបទឧក្រិដ្ឋជាអាទិ៍ និងបរិហារកេរ្តិ៍ជាសាធារណៈ ប្រព្រឹត្តនៅរាជធានីភ្នំពេញ តាមរយៈទំព័រហ្វេសប៊ុក ដែលមានឈ្មោះ Pheng Vannak News កាលពីថ្ងៃទី២៩ ខែមីនា ឆ្នាំ២០១៩ បទល្មើសដែលមានបទបញ្ញត្តិឱ្យផ្តន្ទាទោសតាមមាត្រា ៤៩៤ មាត្រា ៤៩៥ និងមាត្រា ៣០៥ ក្រមព្រហ្មទណ្ឌនៃព្រះរាជាណាចក្រកម្ពុជា។
Home ព្រឹត្តិការណ៍ថ្មីៗ ផែង វណ្ណៈ នឹងបន្តនាំទៅសាកសួរបន្ថែមតបតាមបណ្តឹងរបស់ លោក ខាន់ សុវណ្ណ ចំនួន៥ករណី