កាលពីពេលកន្លងទៅនេះមាន ជនសង្ស័យចំនួន ១៧ នាក់ ត្រូវបញ្ជូនទៅតុលាការ ខណៈអ្នកញៀនគ្រឿងញៀនជិត ១០០ នាក់ ក្នុងចំណោម ៤០៨ នាក់ ដែលត្រូវបានឃាត់ខ្លួននៅក្នុងក្លិបលុច្សសារីកាលពីថ្ងៃសៅរ៍ ត្រូវបានបញ្ជូនទៅមណ្ឌលបន្សាបគ្រឿងញៀន ហើយមួយចំនួននៃពួកគេដែលជាជនបរទេស នឹងត្រូវបណ្តេញចេញពីកម្ពុជាខណៈដែលម្ចាស់ក្លិបនេះនៅមិនទាន់ត្រូវបានចាប់ខ្លួននៅឡើយ។
លោក ស ថេត អគ្គស្នងការរងនគរបាលជាតិ និងជាស្នងការរាជធានីភ្នំពេញបានបញ្ជាក់ប្រាប់ថា ក្នុងចំណោមមនុស្សទាំង ៤០៨ នាក់ សមត្ថកិច្ចបានសម្រេចចាប់បញ្ជូនមនុស្ស ១៧ នាក់ (ជនជាតិវៀតណាម ៥ នាក់) ទៅកាន់តុលាការ ដោយពួកគេទាំងនោះ ត្រូវបានរកឃើញថា មានជាប់ពាក់ព័ន្ធការសម្រួលឲ្យមានការចែកចាយ និងប្រើប្រាស់គ្រឿងញៀននៅក្នុងក្លិប។
គួរបញ្ជាក់ដែរថា ក្លឹបកម្សាន្ត លុច្សសារី ស្ថិតនៅតាមបណ្ដោយផ្លូវលេខ២១៤ កែងផ្លូវ៦៣ សង្កាត់បឹងរាំង ខណ្ឌដូនពេញ ត្រូវបានលោកឧត្តមសេនីយ៍ឯក ស ថេត អគ្គស្នងការរងនគរបាលជាតិ និងជាស្នងការនគរបាលរាជធានីភ្នំពេញ ដឹកនាំកម្លាំងចុះបង្ក្រាបនាវេលាម៉ោង២រំលងអធ្រាត ឈានចូលថ្ងៃទី០៨ ខែមិថុនា ឆ្នាំ២០១៩ ដោយឃាត់ខ្លួនមនុស្សចម្រុះជាតិសាសន៍ចំនួន ៤០៨នាក់ និងរកឃើញថ្នាំញៀនមួយចំនួន។
លោកឧត្តមសេនីយ៍ឯក ស ថេត កាលពីល្ងាចថ្ងៃទី១០ ខែមិថុនា យ៉ាងដូច្នេះថា៖ «អ្នកដែលពាក់ព័ន្ធសម្រួលឲ្យមានការប្រើប្រាស់ថ្នាំញៀននៅក្នុងក្លឹបមានចំនួន១៧ នឹងត្រូវបញ្ជូនទៅតុលាការនៅថ្ងៃទី១១ ខែមិថុនា។ ចំពោះអ្នកដែលមានសារធាតុញៀននៅក្នុងខ្លួន ដែលគាត់ប្រើប្រាស់ គឺសម្រាប់ជនជាតិខ្មែរនឹងបញ្ជូនទៅមណ្ឌលកែប្រែ។ ចំពោះអ្នកដែលប្រើប្រាស់ដែរ ជាជនជាតិបរទេស យើងត្រូវសុំគោលការណ៍ទៅអគ្គនាយកដ្ឋានអន្តោប្រវេសន៍ដើម្បីបណ្តេញចេញពីកម្ពុជា»៕
