ប្រទេសតួកគី រំពឹងថា នឹងទទួលបានមីស៊ីលការពារដែនអាកាស S-400 ពីរុស្ស៊ី ក្នុងពេលដ៏ខ្លីខាងមុខនេះ ស្របពេលដែលមានការគំរាមកំហែងពីសហរដ្ឋអាមេរិកថា តាមរយៈការទិញមីស៊ីលទាំងនេះ នឹងធ្វើឲ្យមានទណ្ឌកម្មធ្ងន់ធ្ងរ និងការបណ្តេញចេញពីកម្មវិធីផលិតយន្តហោះចម្បាំង។
បច្ចុប្បន្នមីស៊ីលទាំងនេះ កំពុងដឹកនៅតាមផ្លូវឆ្ពោះទៅកាន់ប្រទេសតួកី ហើយគេរំពឹងថា នឹងមកដល់ក្នុងពេលដ៏ខ្លីខាងមុខនេះ។ ការទិញមីស៊ីលទាំងនេះ នាំឲ្យមានភាពតានតឹងយ៉ាងខ្លាំងរវាងទីក្រុងវ៉ាស៊ីងតោន និងទីក្រុងអង់ការ៉ា ។
យោងតាមសេចក្តីរាយការណ៍ពីទីភ្នាក់ងារព័ត៌មាន Ahval បានឲ្យដឹងថា មន្ត្រីអាមេរិក បានធ្វើការព្រមានថា បើសិនជាកិច្ចព្រមព្រៀងនេះ ឆ្លងផុតពិតមែន ពួកគេនឹងត្រូវបណ្តេញចេញពីកម្មវិធីផលិតយន្តហោះចម្បាំង F-35 ។
ថ្វីត្បិតតែមាននូវភាពចម្រូងចម្រាស់បែបនេះយ៉ាងណាក៏ដោយ ប្រធានាធិបតីតួកគី លោក Recep Tayyip Erdogan បាននិយាយថា “ការត្រៀមខ្លួនសម្រាប់ចេញដំណើរ ការផ្ទុកមីស៊ីល S-400 កំពុងតែបន្ត”។ លោកបន្តថា មីស៊ីល S-400 នឹងធ្វើដំណើរមកដល់តាមយន្តហោះ។
មុននេះបន្តិច សហរដ្ឋអាមេរិក នៅតែប្រកាសឡើងវិញពីគោលជំហររបស់ខ្លួនជុំវិញបញ្ហាចម្រូងចម្រាស់មួយនេះ។
ពួកគេបានអះអាងថា ជាមួយនឹងទស្សនីយភាពនៃការបាត់បង់យន្តហោះចម្បាំង តួកគី ត្រូវបានព្រមានផងដែរថា ពួកគេអាចនឹងប្រឈមនឹងទណ្ឌកម្ម ក្រោមច្បាប់ស្តីពីការប្រឆាំងបច្ចាមិត្តអាមេរិកតាមរយៈទណ្ឌកម្ម(CAATSA)។
លោកស្រី Morgan Ortagus គឺជាអ្នកនាំពាក្យក្រសួងការបរទេសសហរដ្ឋអាមេរិក បាននិយាយថា ក្រុមអាជ្ញាធរតួកគី ដឹងច្បាស់ពីនីតិវិធីដែលបានអនុម័តនៅក្នុងសភា ពាក់ព័ន្ធនឹងច្បាប់ CAATSA ។
លោកស្រី បន្តថា យើងបាននិយាយរួចហើយថា តួកគី នឹងប្រឈមផលលំបាកពិតប្រាកដ និងអវិជ្ជមាន បើសិនជាពួកគេហ៊ានទទួលយកមីស៊ីល S-400 ដែលរួមទាំងការចូលរួមក្នុងកម្មវិធីយន្តហោះចម្បាំង F-35 ផងដែរ។
សូមបញ្ជាក់ថា បញ្ហាមួយនេះ បានកើតឡើងអស់រយៈពេលជាច្រើនខែមកហើយ ក្នុងនោះ លោក Erdogan និងប្រធានាធិបតីសហរដ្ឋអាមេរិក លោកដូណាល់ ត្រាំ សុទ្ធតែបានឆ្លើយដាក់គ្នាចំពោះអ្វីដែលនឹងអាចកើតមានឡើង។
ទីក្រុងវ៉ាស៊ីងតោន យល់ឃើញថា មីស៊ីល S-400 មិនត្រូវគ្នានឹងប្រព័ន្ធអង្គការ NATO ហើយពួកគេបានអះអាងថា វានឹងធ្វើឲ្យយន្តហោះចម្បាំង F-35 ដែលបច្ចុប្បន្នពួកគេផ្គត់ផ្គង់ឲ្យតួកគីនោះ ដើកទូលាយដល់ចំពោះឧបាយកលដោះខ្លួនរបស់រុស្ស៊ី៕
Home ព្រឹត្តិការណ៍ថ្មីៗ អាមេរិកគំរាមតួកគី បើហ៊ានទិញមីស៊ីល S-400 ពីរុស្ស៊ី នឹងត្រូវព្រនុងទណ្ឌកម្មយ៉ាងចាស់ដៃ