កាលពីថ្ងៃពុធកន្លងទៅនេះ មន្ទីរបច្ចកោណ បានធ្វើការព្រមានធ្ងន់ៗ ប្រឆាំងនឹងសកម្មភាពយោធាថ្មីនៅក្នុងតំបន់ព្រំដែនប្រទេសស៊ីរី ជាកន្លែងដែលទាហានសហរដ្ឋអាមេរិកឈរជើង និងដាក់ពង្រាយ ស្របពេលដែលតួកគីកៀងគងគ្នាដើម្បីត្រៀមខ្លួន វាយលុកមកលើកងកម្លាំងឃើដដែលជាសម្ព័ន្ធមិត្តរបស់អាមេរិកនៅទីនោះ។
អ្នកនាំពាក្យមន្ទីរបច្ចកោណគឺលោកមេបញ្ជាការ Sean Robertson បាននិយាយថា សកម្មភាពឯកតោភាគីចូលទៅក្នុងតំបន់ភាគឦសានប្រទេសស៊ីរី ដោយភាគីណាមួយ ជាពិសេសនៅពេលដែលមន្ត្រី-បុគ្គលិកសហរដ្ឋអាមេរិកអាចនឹងឈរជើងនៅទីនោះ ឬនៅតំបន់ក្បែរនោះ គឺជាក្តីកង្វល់ដ៏ធ្ងន់ធ្ងរបំផុត។ ពួកយើងនឹងមិនទទួលយកសកម្មភាពបែបហ្នឹងនោះទេ។
ការព្រមានដែរបានកើតមានឡើង ស្របពេលមានភាពតានឹងឡើងកម្តៅខ្លាំងរវាងសហរដ្ឋអាមេរិក និងតួកគី ក្រោយសមាជិកអង្គការ NATOមួយនេះ ចាប់ផ្តើមទទួលប្រព័ន្ធមីស៊ីល S-400 ពីរុស្ស៊ី កាលពីសប្តាហ៍មុន ដើម្បីផ្គើនទៅនឹងការព្រមានជាច្រើនខែរបស់សហរដ្ឋអាមេរិក ថាពួកគេអាចប្រឈមនឹងទណ្ឌកម្មថ្មីពីរដ្ឋបាល ឬសភាអាមេរិកនោះ។
ក្រុមអ្នកវិភាគ មានការព្រួយបារម្ភថា តួកគី នឹងពិចារណាលើការគំរាមកំហែងសមល្មមអាចជឿជាក់បានពីការវាយប្រហារដោយយោធា ថាជាធម្យោបាយតែមួយគត់ដើម្បីប្រឆាំងនឹងការសងសឹករបស់សហរដ្ឋអាមេរិក ហើយក្រុមអ្នកវិភាគទាំងនោះ បានធ្វើការព្យាករណ៍ផងដែរថា ភាពតានតឹងឡើងកម្តៅនេះ អាចនឹងធ្វើឲ្យជ្រុលជ្រួសដល់សមត្ថភាពប្រទេសទាំង២ ពីការការពារជម្លោះមិនឲ្យផ្ទុះឡើង។
លោក Robertson បានអះអាងថា កិច្ចប្រជុំកំពុងធ្វើឡើងរវាងសហរដ្ឋអាមេរិក និងតួកគី គឺជាដំណោះស្រាយតែមួយគត់ លើកឡើងពីបញ្ហាពាក់ព័ន្ធក្នុងតំបន់នោះ។ តួកគីនៅតែខ្វាយខ្វល់ពីតំបន់កាន់កាប់បង្កើតឡើងនៅតំបន់ព្រំដែនស៊ីរី ដោយក្រុមសកម្មប្រយុទ្ធឃើដ ដែលបូករួមទាំងកិច្ចខិតខំរបស់សហរដ្ឋអាមេរិក ដើម្បីធ្វើសង្គ្រាមបោសសំអាតក្រុមរដ្ឋអ៊ីស្លាម ប៉ុន្តែប្រធានាធិបតីតួកគី លោករ៉េសេប តាយយីប អ៊ឺដូហ្គែន បានចាត់ទុកថាជាការសម្របសម្រួលជាមួយក្រុមភេរវកម្មទៅវិញ។ សហរដ្ឋអាមេរិកទទួលស្គាល់ក្តីកង្វល់សន្តិសុខរបស់តួកគីនៅក្នុងតំបន់សង្គ្រាមក្នុងប្រទេសស៊ីរី។
លោក Robertson បានបន្តទៀតថា យើងមានជំនឿថា កិច្ចពិភាក្សាមួយនេះ គឺជាធម្យោបាយតែមួយគត់ដើម្បីរក្សាបានសន្តិសុខព្រំដែននៅក្នុងឥរិយាបថមួយដែលអាចទ្រទ្រង់បាន ហើយយើងក៏មានជំនឿផងដែរថា ប្រតិបត្តិការយោធា នឹងធ្វើឲ្យអន្តរាយដល់ផលប្រយោជន៍ចែករំលែកទាំងអស់គ្នា៕
Home ព្រឹត្តិការណ៍ថ្មីៗ តួកគីត្រៀមកម្លាំងសងសឹកអាមេរិកធ្វើឲ្យមន្ទីរបច្ចកោណព្រមានរាល់សកម្មភាពយោធាពួកគេ