កូរ៉េខាងត្បូងបានបាញ់ព្រមានយន្តហោះចម្បាំងរុស្ស៊ី ដែលថ្លើមធំហាបើកចូលដែនអាកាសពួកគេនោះ។
ក្រសួងការពារជាតិកូរ៉េខាងត្បូង បាននិយាយថា ពួកគេបានបាញ់ព្រមានយន្តហោះចម្បាំង A-50 របស់រុស្ស៊ី ដែលបានបើកចូលដែនអាកាសរបស់ពួកគេកាលពីព្រឹកថ្ងៃអង្គារ។
ក្រុមមន្ត្រីកូរ៉េខាងត្បូង បានអះអាងថា យន្តហោះនោះ បានហោះបំពានដែនអាកាសស្ថិតនៅលើកោះ Dokdo ឬTakeshima ដែលកាន់កាប់ដោយទីក្រុងសេអ៊ូល តែត្រូវបានប្រកាសផងដែរដោយជប៉ុន។
ក្រសួងការពារជាតិកូរ៉េខាងត្បូង បាននិយាយថា យន្តហោះចម្បាំងជាច្រើនរបស់ពួកគេ បានបាញ់អណ្តាតភ្លើង និងបាញ់ព្រមានជាច្រើនគ្រាប់។
ការបាញ់ព្រមានបន្ថែមទៀតបានធ្វើឡើងផងដែរ ពេលដែលយន្តហោះចម្បាំងរុស្ស៊ីមួយគ្រឿងនេះ បានបកមកវិញនៅរយៈពេលប៉ុន្មាននាទីក្រោយមក។
វាគឺជាឧប្បត្តិហេតុលើកដំបូងគេហើយរវាងរុស្ស៊ី និងកូរ៉េខាងត្បូង។
យោធាកូរ៉េខាងត្បូង បាននិយាយថា យន្តហោះនោះស្ថិតនៅក្នុងចំណោមយន្តហោះរុស្ស៊ី៣គ្រឿង និងយន្តហោះចិន២គ្រឿងដែលបានហោះចូលទៅក្នុងតំបន់ដែនកំណត់ការពារអាកាសកូរ៉េ កាលពីព្រឹកថ្ងៃអង្គារ ជាកន្លែងដែលយន្តហោះបរទេស ត្រូវតែផ្តល់អត្តសញ្ញាណពួកគេជាមុន ។
យន្តហោះចម្បាំង យន្តហោះឈ្លបការណ៍រុស្ស៊ី និងចិន តែងតែចូលទៅក្នុងតំបន់ហាមឃាត់នេះ នារយៈពេលជាច្រើនឆ្នាំកន្លងមកនេះ។
កូរ៉េខាងត្បូង បាននិយាយថា យន្តហោះរុស្ស៊ីមួយគ្រឿង បានបើកចូលយ៉ាងជ្រៅទៅក្នុងដែនអាកាសរបស់ខ្លួននៅវេលាម៉ោង៩ព្រឹក ហើយយន្តហោះ F-15k និង F-16k របស់កូរ៉េខាងត្បូង ត្រូវបានដាក់ពង្រាយដើម្បីស្កាត់យន្តហោះមួយគ្រឿងនេះ។
លោក Chung Eui-yong គឺជាប្រធានការិយាល័យសន្តិសុខជាតិកូរ៉េខាងត្បូង បានដាក់ពាក្យជំទាស់យ៉ាងខ្លាំងទៅកាន់ក្រុមប្រឹក្សាសន្តិសុខរុស្ស៊ី និងបានស្នើសុំឲ្យក្រុមប្រឹក្សាមួយនេះ ចាត់វិធានការដ៏សមរម្យមួយ។
ការិយាល័យប្រធានាធិបតីកូរ៉េខាងត្បូង បានរាយការណ៍សម្តី លោក Chung Eui-yong ថា យើងបានពិនិត្យតាមដានស្ថានភាពមួយនេះ យ៉ាងដិតដល់បំផុត ហើយបើសិនជាវាកើតឡើងម្តងទៀត យើងនឹងចាត់វិធានការខ្លាំងជាងមុន។
ទោះបីជាយ៉ាងណាក៏ដោយ មិនទាន់មានការធ្វើសេចក្តីអត្ថាធិប្បាយណាមួយពីចិន និងរុស្ស៊ីនោះទេ ពាក់ព័ន្ធនឹងឧប្បត្តិហេតុមួយនេះ៕
