រូបភាពថ្មីពីទីភ្នាក់ងារអង្កេតផែនដីរបស់អង្គការ NASAបានបង្ហាញថា ភ្លើងឆេះព្រៃកំពុងឆាបឆេះតំបន់ជាច្រើននៅរុស្ស៊ី និងអាក់ទិក បង្កើតបានជាផ្សែងយ៉ាងក្រាស់ដែលគេអាចមើលឃើញពីទីអវកាស។
ចាប់តាំងពីខែមិថុនារហូតមក ភ្លើងឆេះព្រៃជាង១០០កន្លែង បានឆាបឆេះតំបន់អាក់ទិក ជាពិសេសនៅតំបន់ដែលស្ងួត និងក្តៅខ្លាំងក្នុងរដូវក្តៅនេះ។ នៅរុស្ស៊ី ភ្លើងឆេះព្រៃ បានឆាបឆេះ១១តំបន់ក្នុងចំណោម៤៩តំបន់នៅក្នុងប្រទេសមួយនេះ ដែលមានន័យថានៅកន្លែងដែលគ្មានភ្លើងឆេះព្រៃ ក៏មនុស្សឈ្លក់ដោយសារតែផ្សែងហោះពេញប្រទេសដែរ។
យោងតាមទីភ្នាក់ងារអង្កេតផែនដី បានឲ្យដឹងថា ភ្លើងឆេះព្រៃធំៗ ដែលបង្កឡើងដោយសារតែផ្គររន្ទះ ស្ថិតនៅតំបន់ Irkutsk, Krasnoyarsk និងតំបន់ Buryatia ។ ភ្លើងឆេះព្រៃទាំងនេះ ឆេះនៅលើផ្ទៃដី៨២៩គ.មក្រឡា ៣៨៨គ.មក្រឡា និង១០៦គ.មក្រឡា ហើយវាបានឆេះរហូតមកទល់នឹងថ្ងៃទី២២ ខែកក្កដាកន្លងទៅ។
ទីក្រុង Krasnoyarsk របស់រុស្ស៊ី ស្ថិតក្រោមស្រទាប់ផ្សែងអ័ព្ទ ហើយទីក្រុង Novosibirsk នៅតំបន់ស៊ីបេរី ដែលគ្មានភ្លើងឆេះព្រៃសោះផងដែរ ក៏មានផ្សេងគ្របដណ្តប់ពីលើផងដែរ ធ្វើឲ្យបំពុលបរិយាកាសយ៉ាងខ្លាំង។
ភ្លើងឆេះព្រៃ បានកើតមានផងដែរនៅតំបន់ Greenland និងផ្នែកខ្លះទៀតនៃ Alaska បន្ទាប់រលកកម្តៅដ៏អាក្រក់បំផុតនៅក្នុងប្រវត្តិសាស្ត្រ បានកើតមានកាលពីខែមិថុនាកន្លងទៅ។
លោក Mark Parrington គឺជាអ្នកវិទ្យាសាស្ត្រមកពីសេវាកម្មឃ្លាំមើលបរិយាកាស Copernicus(CAMS)ដែលជាផ្នែកមួយនៃកម្មវិធីអង្កេតផែនដីរបស់សហភាពអឺរ៉ុប បាននិយាយប្រាប់ CNNថា វាគឺជារឿងធម្មតាទៅហើយដែលមានភ្លើងឆេះព្រៃអំឡុងខែរដូវប្រាំងនៅតំបន់អាក់ទិក ប៉ុន្តែចំនួនភ្លើងឆេះព្រៃ និងរយៈពេលនៃភ្លើងឆេះព្រៃក្នុងឆ្នាំនេះ មិនមែនជារឿងធម្មតានោះទេ ហើយនិងមិនធ្លាប់ដែលមានពីមុនមកទៀតផង។
ដោយឡែកលោក Claudia Volosciukគឺជាអ្នកវិទ្យាសាស្ត្រមកពីអង្គការភូគព្ភសាស្ត្រពិភពលោក បាននិយាយប្រាប់ CNNដែរថា តំបន់អាក់ទិកបច្ចុប្បន្នក្តៅខ្លាំងជាងតំបន់ដ៏ទៃទៀតនៅលើផែនដី ធ្វើឲ្យវាងាយនឹងកើតជាអគ្គីភ័យខ្លាំងណាស់នៅទីនោះ។ ឧទាហរណ៍ នៅតំបន់ស៊ីបេរី សីតុណ្ហភាពក្នុងខែមិថុនា ឆ្នាំនេះ មានជិត១០អង្សាសេរក្តៅជាងកាលពីចន្លោះឆ្នាំ១៩៨១ និងឆ្នាំ២០១០៕
Home បច្ចេកវិទ្យា ចឹងសោះបានជាអឺរ៉ុបឡើងកម្តៅខ្លាំងបែបនេះ! ភាគច្រើននៃតំបន់អាក់ទិកកំពុងត្រូវភ្លើងឆេះព្រៃ