ក្មេងប្រុសអាយុ២ឆ្នាំម្នាក់ បានស្លាប់យ៉ាងអណោចអធមជាទីបំផុត ក្រោយពីត្រូវបានឪពុករបស់ខ្លួនទុកចោលនៅក្នុងបន្ទប់ក្តៅក្នុងផ្ទះ ស្ថិតនៅក្នុងទីក្រុង Essen ប្រទេសអាល្លឺម៉ង់។
ក្រុមនគរបាលបានអះអាងថា ឪពុកម្នាក់នេះ បានប្រឈមនឹងការចោទប្រកាន់ពីបទឃាតកម្ម សម្រាប់ការទុកចោលកូនតូចរបស់ខ្លួននៅក្នុងបន្ទប់ក្តៅ ដោយគ្មានទឹកផឹកអស់រយៈពេល១៧ម៉ោង។
បុរសវ័យ៣១ឆ្នាំម្នាក់នេះ ត្រូវបានចាប់ខ្លួន ក្រោយសេវាកម្មសង្គ្រោះបន្ទាន់ទទួលបានការហៅទូរស័ព្ទឲ្យទៅកាន់ផ្ទះមួយកន្លែងស្ថិតនៅក្នុងទីក្រុង Essen ប្រទេសអាល្លឺម៉ង់។
ក្រុមនគរបាល បានបញ្ជូនក្រុមជួយសង្គ្រោះទៅកាន់ផ្ទះមួយខ្នងនោះ ប៉ុន្តែពេលដែលពួកគេទៅដល់ ឪពុករបស់ក្មេងតូច ឈ្មោះ Benjamin S បានឈរនៅមុខបន្ទប់ រួចស្រែកខ្លាំងៗថា “កូនប្រុសរបស់ខ្ញុំស្លាប់ហើយ សូមមកឲ្យលឿនឡើង”។
យោងតាមសារព័ត៌មានក្នុងស្រុក បានឲ្យដឹងថា វាមិនមែនជាឪពុកម្នាក់នេះទេ ដែលបានទូរស័ព្ទសុំជំនួយសង្គ្រោះបន្ទាន់។
សមាជិកគ្រួសារផ្សេងទៀត ត្រូវបានគេរាយការណ៍ថា បាននៅផ្ទះនោះផងដែរនៅពេលកើតហេតុ ប៉ុន្តែមិនត្រូវបានគេប្រកាសឲ្យដឹងថានរណាខ្លះនៅទីនោះទេ។
ពេលដែលវេជ្ជបណ្ឌិតសង្គ្រោះបន្ទាន់ បានឡើងដល់ជាន់ទី៣ គ្រូពេទ្យនៅកន្លែងដែលក្មេងប្រុសត្រូវបានសង្គ្រោះ បានប្រកាសថា ក្មេងប្រុសបានស្លាប់ទៅហើយ។
សូមបញ្ជាក់ថា សីតុណ្ហភាពនៅអាល្លឺម៉ង់ បានឡើងដល់៣០អង្សាសេរក្នុងរយៈពេលប៉ុន្មានថ្ងៃកន្លងមកនេះ។
លោក Christoph Wickhorst គឺជាអ្នកនាំពាក្យក្រុមនគរបាល បាននិយាយថា ការវះកាត់ពិនិត្យសព បានបង្ហាញថា ក្មេងប្រុសតូចម្នាក់នេះ បានស្លាប់ដោយសារតែការខកខានចរន្តឈាមរត់ ក្រោយរងកម្តៅខ្លាំងពេក។ មាននូវសញ្ញាផងដែរពីកង្វះខាតសារធាតុរាវស្រូបចូលទៅក្នុងរាងកាយ។
យោងតាមសេចក្តីរាយការណ៍ពីកាសែតអាល្លឺម៉ង់ Bild បានឲ្យដឹងថា ក្មេងតូចម្នាក់ នេះ ត្រូវបានទុកនៅក្នុងបន្ទប់ក្តៅចន្លោះពីម៉ោង១៧ម៉ោងទៅ១៨ម៉ោង ហើយនិងគ្មានវិធីចេញពីបន្ទប់បាននោះទេ។
ដោយឡែក ម្តាយក្មេងប្រុស ដែលមានអាយុ២១ឆ្នាំ បាននៅជាមួយបុរសម្នាក់ផ្សេងទៀត នៅពេលដែលឧប្បត្តិហេតុកើតឡើង ដោយសារតែប្តីប្រពន្ធទាំង២នាក់នេះ បានចែកផ្លូវគ្នា៕
