ក្រុមអ្នកវិទ្យាសាស្ត្រនៅក្នុងប្រទេសរ៉ូម៉ានី បានបង្កើតចានហោះដែលអាចបំលាស់ទីបានគ្រប់ទិសទី។
ចានហោះនេះ មានឈ្មោះ ADIFO ហើយពេលវាហោះគឺមិនខុសប្លែកគ្នាពីថាសហោះមាននៅក្នុងរឿងប្រឌិតបែបវិទ្យាសាស្ត្រនោះទេ។
ប៉ុន្តែវាគឺជាចានហោះពិត ដែលអាចហោះបានគ្រប់ទិសទី គ្រប់ស្ថានភាព ពោលគឺដូចគ្នានឹងថាសហោះពិតប្រាកដដែរ។
ទោះបីជាយ៉ាងណាក៏ដោយ វាមិនមែនជាវត្ថុមកពីទីអវកាសនោះទេ វាត្រូវបានរចនាឡើងដោយអ្នកវិទ្យាសាស្ត្រ Razan Sabie និងដៃគូរបស់គាត់ គឺលោក Iosif Taposu គឺជាអតីតអ្នកវិទ្យាសាស្ត្រមួយរូបទៀតនៅឯវិទ្យាស្ថានជាតិស្រាវជ្រាវអវកាសកាសរ៉ូម៉ានី។
លោក Sabie បាននិយាយថា ឌីណាមិកអាកាសនៅពីក្រោយចានហោះនេះ គឺជាលទ្ធផលនៃការស្រាវជ្រាវអស់រយៈពេល២ឆ្នាំ។
មិនខុសប្លែកពីដ្រូននោះទេ ចានហោះនេះ ប្រើប្រាស់កង្ហារ៤ ដើម្បីហោះឡើង ឬចុះចត ហើយចាប់ផ្តើមធ្វើដំណើរយឺតៗ ខណៈដែលម៉ាស៊ីនយន្តហោះ២ទៀត នឹងធ្វើឲ្យវាហោះឡើងលើត្រង់។
កម្លាំងរុញ២គូនេះ នឹងអាចធ្វើឲ្យបត់បានយ៉ាងឆាប់រហ័សផងដែរ។
លោក Sabie បាននិយាយទៀតថា រាងមូលរបស់ចានហោះមួយនេះ នឹងធ្វើឲ្យវាហោះបានលឿនជាងសម្លេង៕
