ក្រុមអ្នកវិទ្យាសាស្ត្រ បានរកឃើញសរីរាង្គមួយនៅក្នុងស្បែកដែលអាចបណ្តាលឲ្យមនុស្សឈឺចាប់បាន។ មកទល់នឹងពេលនេះ ក្រុមអ្នកជំនាញ មានជំនឿថា សរសៃប្រសាទនៅក្នុងស្បែក មានទំនួលខុសត្រូវលើការរំញោចមិនស្រួល ឈឺចាប់ដូចជាមុតនឹងបន្លាអញ្ចឹងដែរ។
ក្រុមអ្នកវិទ្យាសាស្ត្រនៅឯវិទ្យាស្ថាន Karolinska ប្រទេសស៊ុយអែត បានរកឃើញសរីរាង្គដូចសំណាញ់នៅក្នុងស្បែករបស់ពួកយើងដែលមានកោសិកាគ្លីអាល់ ។ កោសិកានេះ ត្រូវបានព័ទ្ធជុំវិញដោយរចនាសម្ព័ន្ធដូចជាសក់ ដែលត្រូវបានគេគិតថា មានភាពរសើបខ្លាំងនឹងរំញោចខាងក្រៅ។
ក្រុមអ្នកស្រាវជ្រាវ បានឲ្យដឹងថា ពេលដែលបណ្តាញនៃកោសិកាមួយនេះ ត្រូវបានបិទនៅក្នុងកណ្តុរ វាក៏បានកាត់បន្ថយភាពឈឺចាប់របស់វា។
ពួកគេសង្ឃឹមថា ការសិក្សារបស់ពួកគេ នឹងជួយដល់ក្រុមអ្នកជំនាញយល់កាន់តែច្បាស់ពីការឈឺចាប់ដ៏រ៉ាំរ៉ៃ ដែលនាំឲ្យមានការព្យាបាលថ្មីសម្រាប់ជនរងគ្រោះរាប់លាននាក់។
លោកសាស្ត្រាចារ្យ Patrik Ernfors បាននិយាយថា ការសិក្សារបស់ពួកយើង បង្ហាញឲ្យឃើញពីភាពរសើបចំពោះការឈឺចាប់ដែលមិនត្រឹមតែកើតឡើងចំពោះសរសៃប្រសាទស្បែកប៉ុណ្ណោះទេ ប៉ុន្តែកើតឡើងនៅក្នុងសរីរាង្គងាយនឹងឈឺចាប់ដែលទើបរកឃើញថ្មីកាលពីពេលថ្មីៗនេះផងដែរ។
លោកបន្តថា ការរកឃើញនេះ បានផ្លាស់ប្តូរការយល់ដឹងរបស់ពួកយើងលើយន្តការកោសិកា នៃភាពរសើបលើរាងកាយ និងវាអាចជារឿងដ៏សំខាន់មួយ នៅក្នុងការយល់ដឹងកាន់តែច្បាស់ពីការឈឺចាប់ដ៏រ៉ាំរ៉ៃ។
យោងតាមរបាយការណ៍ពីក្រុម British Pain Society បានឲ្យដឹងថា ការឈឺចាប់ដ៏រ៉ាំរ៉ៃ ដែលអាចមានរយៈពេលរហូតដល់៣ខែ ឬយូរជាងនេះ បានធ្វើឲ្យប៉ះពាល់ដល់មនុស្ស២ភាគ៥ក្នុងចំណោមមនុស្សពេញវ័យ២៨លាននាក់នៅចក្រភពអង្គគ្លេស កាលពីឆ្នាំ២០១៦។
ដោយឡែក នៅសហរដ្ឋអាមេរិកវិញ ពលរដ្ឋអាមេរិកប្រហែល៥០លាននាក់ ឬស្មើនឹងជាង២០ភាគរយនៃមនុស្សពេញវ័យ ត្រូវបានគេរកឃើញថា បានរងការឈឺចាប់មួយនេះ៕
