លោក ព្រហ្ម ម៉ាញ ដែលជាសិល្បករជើងចាស់ ផ្នែកអាយ៉ៃដ៏មានទេពកោសល្យ ពោរពេញទៅដោយសមត្ថភាព និងបទពិសោធន៍ ទទួលបានការគាំទ្រខ្លាំង ក៏ដូចជាគោរពស្រឡាញ់ពីសំណាក់ អ្នកសិល្បៈជំនាន់ក្រោយ ថ្មីៗនេះលោកបានបង្កើតសាលាបង្រៀនផ្នែកសិល្បៈបុរាណមួយ ដោយមិនគិតថ្លៃដើម្បីបន្តទៅអ្នកជំនាន់ក្រោយ ។
យោងតាមការផ្តល់បទសម្ភាសន៍ឲ្យសារព័ត៌មានក្នុងស្រុកមួយ លោក ព្រហ្ម ម៉ាញ បានឲ្យដឹងថារាប់គិតចាប់ពេលបើកសាលាដំបូងរហូតពេលនេះ សន្ទុះនៃការចាប់អារម្មណ៍ចង់រៀនជំនាញអាយ៉ៃ ចាប់តាំងពីបានបើកកាលថ្ងៃទី ១ ខែ វិច្ឆិកា ឆ្នាំ ២០១៩ មកនោះថា៖ «បើគិតមកដល់ត្រឹមថ្ងៃនេះ ខ្ញុំទទួលបានសិស្សចំនួន ១២ នាក់ហើយ ដោយមានទាំងចំនួនសិស្សប្រុស និងសិស្សស្រី គឺប្រហាក់ប្រហែលគ្នា។ ឯការទទួលសិស្សចូលរៀនមិនកំណត់ចំនួនឡើយ ឲ្យតែចាប់អារម្មណ៍ចង់រៀន។ ការទទួលចាប់ពីវ័យ ១០ ឆ្នាំ ឡើងទៅ ឬមានវ័យ ៦០ ឆ្នាំ ក៏អាចរៀនបានផងដែរឲ្យតែចិត្តចង់រៀន ហើយការបង្រៀននេះ មិនយកប្រាក់កម្រៃនោះឡើយ គឺថែមទាំងអាចឲ្យសិស្ស ដែលជួបផលលំបាក អាចមកស្នាក់នៅផ្ទះជាសាលារៀនអាយ៉ៃ មានទីតាំងនៅក្នុងបុរី KC ជិតវត្តតាំងកសាង ផ្ទះលេខ L14 នៃសង្កាត់កាកាប ២ ក្នុងខណ្ឌពោធិ៍សែនជ័យ រាជធានីភ្នំពេញ»។
លោកបានបន្តថា៖ «តាមពិតទៅ គម្រោងបើកបង្រៀននេះ ខ្ញុំមានតាំងពី ៣ ឆ្នាំមុនមកម្ល៉េះ ខណៈខ្ញុំខំរកប្រាក់ និងរក្សាទុក ដើម្បីទប់ទល់ការចំណាយមុននៃការបើកបង្រៀននេះ តែជាអកុសល ត្រូវចោរគាស់ផ្ទះលួចយកប្រាក់អស់ ហើយការសម្រេចបើកបង្រៀនសិស្ស នាពេលនេះ ក៏ដោយសារមានការជំរុញខ្លាំងពីថ្នាក់ដឹកនាំកំពូលផងដែរ គឺសម្តេចក្រឡាហោម ដែលលោកធ្លាប់ប្រាប់ឲ្យខ្ញុំជួយបង្កើតសាលាបង្រៀន ឬមណ្ឌលបណ្តុះបណ្តាលជំនាញអាយ៉ៃនេះ»។
គួរបញ្ជាក់ដែរថា អាយ៉ៃ គឺជាទម្រង់សិល្បៈចម្រៀងឆ្លើយឆ្លងបែបបុរាណមួយដែលមានប្រវត្តិចារទុកជាសម្បត្តិវប្បធម៌ខ្មែរ។ ប៉ុន្តែ ទោះជាអាយ៉ៃមានតម្លៃមិនអាចកាត់ថ្លៃបានក៏ដោយ ក៏សិល្បករចម្រៀងអាយ៉ៃមានចំនួនតិចតួចណាស់នៅក្នុងប្រទេសកម្ពុជា បច្ចុប្បន្ន។ លោក ព្រហ្ម ម៉ាញ ជាសិល្បករជើងចាស់មានសំឡេងពីរោះ ពូកែទាំងកំប្លុកកំប្លែង ទាំងសំនួនវោហារ និងការសំដែង កំពុងមានការសោកស្តាយ និងព្រួយបារម្ភចំពោះការវិវឌ្ឍន៍នៃវិស័យសិល្បៈអាយ៉ៃទៅថ្ងៃអនាគត ដូច្នេះលោកសម្រេចចិត្តចង់ចែករំលែកសិល្ប:វប្បធម៌ដែលមានតពីដូនតាមកអ្នកជំនាន់ក្រោយ ៕
Home សិល្បៈកម្សាន្ត លោក ព្រហ្ម ម៉ាញ ព្រួយបារម្ភចំពោះការវិវឌ្ឍន៍នៃវិស័យសិល្បៈអាយ៉ៃទៅថ្ងៃអនាគតទើប…