បន្ទាប់ពីមានករណីធ្លាក់ដែកដ៏ធំមួយពីលើអាគារ៤២ជាន់ធ្លាក់មកលើរថយន្តអ្នកដំណើរនៅខាងក្រោម នៅក្បែរស្ដុបពេទ្យចិន ទល់មុខវិទ្យាល័យព្រះយុគន្ធរ តាមបណ្ដោយផ្លូវព្រះមុនីវង្ស ក្នុងសង្កាត់បឹងកេងកង១ ខណ្ឌបឹងកេងកង រាជធានីភ្នំពេញ ត្រូវចំរថយន្ដស៊េរីទំនើបមួយគ្រឿង ម៉ាក Mercedes-Benz S350 ពាក់ផ្លាកលេខភ្នំពេញ 2BC-7788 ខ្ទេចមួយកំណាត់ក្រោយបានបង្កឲ្យមានការភ្ញាក់ផ្អើលយ៉ាងខ្លាំងដល់ប្រជាពលរដ្ឋ ពិសេសអ្នកធ្វើដំណើរដែលឈប់រង់ចាំស្ដុប នៅក្បែរភ័យព្រលឹងចុងសក់។
ថ្មីៗនេះ ក្រសួងរៀបចំដែនដី នគរូបនីយកម្ម និងសំណង់ បានចេញលិខិតសម្រេចផ្អាកដំណើរការការដ្ឋាសាងសង់ជាបណ្ដោះអាសន្ន អគារកម្ពស់ ៤២ជាន់ (GOLD TOWER 42) ក្រោយមានហេតុការណ៍ធ្លាក់ផ្ទាំងដែកត្រូវរថយន្ដអ្នកធ្វើដំណើរ។
នេះបើតាមលិខិតផ្អាកដែលចេញដោយ លោក ផាន់ សូរ្យផល អគ្គនាយក នៃអគ្គនាយកដ្ឋានសំណង់ ក្រសួងរៀបចំដែនដី បានឲ្យដឹងនៅព្រឹកថ្ងៃទី២១ ខែវិច្ឆិកា ឆ្នាំ២០១៩។
ក្រៅការផ្អាក់ដំណើរការដ្ឋាន មន្ដ្រីជំនាញរបស់ក្រសួង សហការជាមួយមន្ដ្រីសាលារាជធានីភ្នំពេញ អាជ្ញាធរខណ្ឌបឹងកេងកង បានចុះទៅពិនិត្យផ្ទាល់នៅការដ្ឋានផងដែរ ដើម្បីសិក្សាលម្អិតបន្ថែមទៀត មុនឈាងដល់ការចាត់វិធានការបន្ដតាមនីតិវិធី កាលពីល្ងាចថ្ងៃទី២០ ខែវិច្ឆិកា ឆ្នាំ២០១៩។
គួរបញ្ជាក់ដែរថា នេះពុំមែនជាលើកទី១ទេ សម្រាប់ការដ្ឋានអាគារ៤២ជាន់នេះ ដែលកាលពីពេលមុនក៏ធ្លាប់មានករណីនេះ កើតឡើងដោយមានការធ្លាក់ដែកថ្នាំងអំពៅ ដ៏វែងមួយបានធ្លាក់ចំរថយន្ត Lexus 450h មួយគ្រឿងដោតចាក់ចំដំបូលម៉ាស៊ីន ខាងមុខ បានធ្វើឲ្យអ្នកដំណើរជិះឆ្លងកាត់ នឹងឃើញហេតុការណ៍នោះភ័យព្រលឹងចុងសក់ ៕
