សម្តេចតេជោ ហ៊ុន សែន បានថ្លែងថា នៅថ្ងៃនេះនឹងមានការធ្វើសមយុទ្ធរួមគ្នារវាងកងយោធពលខេមរភូមិន្ទ និងកងទ័ពប្រជាជនវៀតណាម គឺដើម្បីត្រៀមជួយសង្គ្រោះដល់ពលរដ្ឋនៃប្រទេសទាំង ២ នៅពេលមានគ្រោះមហន្តរាយកើតឡើង ហើយការចូលទៅជួយពលរដ្ឋរងគ្រោះតាមព្រំដែនគ្នាទៅវិញទៅមក គឺមិនមែនជាការឈ្លានពានគ្នានោះទេ។សម្ដេច បានថ្លែងបែបនេះ នៅក្នុងពិធីប្រគល់សញ្ញាបត្រជូនដល់និស្សិត នៃសាកលវិទ្យាល័យវេស្ទើន នាព្រឹកថ្ងៃទី១៨ ខែធ្នូ ឆ្នាំ២០១៩ នៅមជ្ឈមណ្ឌលសន្និបាតនិងពិព័រណ៍កោះពេជ្រ។
ការធ្វើលំហាត់យោធានេះ គឺក្នុងគោលបំណងចែករំលែកបទពិសោធន៍រួមគ្នា និងផ្តល់នូវផលប្រយោជន៍ ដល់ប្រជាជននៃប្រទេសទាំងពីរ នៅពេលដែលមានគ្រោះមហន្តរាយកើតឡើង ដូចជាគ្រោះធម្មជាតិ ទឹកជំនន់ ភ្លើងឆេះព្រៃ ឬគ្រោះធម្មជាតិផ្សេងៗ ដែលកើតឡើងជាយថាហេតុ ព្រមជាមួយនឹងការចូលរួមចំណែកលើកកម្ពស់កិច្ចសហប្រតិបត្តិការ និងការអភិវឌ្ឍនៅតាមតំបន់ព្រំដែន ឱ្យមានការរីកចម្រើន។
រយៈពេលនៃការធ្វើលំហាត់ហ្វឹកហ្វឺនមានរយៈពេល៩ថ្ងៃ គិតចាប់ពីថ្ងៃទី១០ ដល់១៨ ខែធ្នូ ឆ្នាំ២០១៩។ កម្លាំងចូលរួមខាងភាគីវៀតណាម ២៦៥នាក់ ខាងភាគីកម្ពុជា៤៧១នាក់ រួមនឹងកម្លាំងចូលរួម ១,១៤៣នាក់។
សម្តេចតេជោនាយករដ្ឋមន្ត្រីបានមានប្រសាសន៍ថា: នៅថ្ងៃនេះមានសមយុទ្ធពីរ៖
សមយុទ្ធទី១. គឺការសមយុទ្ធសង្គ្រោះគ្រោះមហន្តរាយសម្រាប់ឧប្បត្តិហេតុនៃការធ្លាក់យន្តហោះ ដែលប្រព្រឹត្តទៅនៅព្រលានយន្តហោះអន្តរជាតិសៀមរាប ដូចនេះសុំកុំឲ្យប្រជាពលរដ្ឋមានការភិតភ័យ ឬការប្រើបណ្ដាញសង្គមដើម្បីមួលបង្កាច់ទាក់ទងទៅនឹងការធ្លាក់យន្តហោះជាដើម ព្រោះនេះគឺជាសមយុទ្ធជួយសង្គ្រោះការធ្លាក់យន្តហោះ តែមិនមែនយកយន្តហោះទៅធ្វើឲ្យធ្លាក់នោះទេ។
សមយុទ្ធទី២. កំពុងចាប់ផ្ដើមដែរគឺនៅក្នុងខេត្តស្វាយរៀង គឺសមយុទ្ធសង្គ្រោះគ្រោះមហន្តរាយនៅតាមព្រំដែននៃប្រទេសទាំងពីររវាងកងទ័ពកម្ពុជានិងកងទ័ពវៀតណាម ដូច្នេះសូមកុំឲ្យមានការយកបណ្ដាញសង្គមទៅធ្វើការឃោសនាមួលបង្កាច់ពីព្រឹត្តិការណ៍នេះថាមានការធ្លាក់យន្តហោះនៅកម្ពុជា ឬ ការចល័តទ័ពជាដើម៕
Home ព្រឹត្តិការណ៍ថ្មីៗ សម្តេចតេជោ ៖ …….. សូមកុំឲ្យមានការយកបណ្ដាញសង្គមទៅធ្វើការឃោសនាមួលបង្កាច់ពីព្រឹត្តិការណ៍នេះថាមានការធ្លាក់យន្តហោះនៅកម្ពុជា…..