ព្រឹកថ្ងៃទី៦ ខែមករា ឆ្នាំ២០២០ សមត្ថកិច្ចនគរបាលនាយកដ្ឋានព្រហ្មទណ្ឌ ក្រសួងមហាផ្ទៃ បានបញ្ជូនមន្ត្រីនគរបាលនៃមន្ទីរប្រឆាំងគ្រឿងញៀន ពាក់សក្កិ៤កន្លះម្នាក់ ទៅកាន់សាលាដំបូងរាជធានីភ្នំពេញ ក្រោមពាក្យបណ្តឹងរបស់ម្ចាស់រោងចិញ្ចឹមមាន់មួយកន្លែង ស្ថិតក្នុងខណ្ឌពោធិសែនជ័យ។ជនសង្ស័យឈ្មោះ ភិន រតនៈ អាយុ៣៧ឆ្នាំ ជាមន្ត្រីប៉ូលិសមន្ទីរប្រឆាំងគ្រឿញៀន ពាក់សក្កិ៤កន្លះ។ឯម្ចាស់រោងចិញ្ចឹមមាន ឈ្មោះ អ៊ុំ រិទ្ធី អាយុ៣៦ឆ្នាំ រស់នៅភូមិព្រៃពពេល សង្កាត់សំរោងក្រោម ខណ្ឌពោធិ៍សែនជ័យ ។
ក្នុងពាក្យបណ្ដឹងជនរងគ្រោះ បានឲ្យដឹងថា កាលពីរសៀលថ្ងៃទី១៧ ខែធ្នូ ឆ្នាំ២០១៩រូបគេក៏កំពុងដេកលេងលើគ្រែមុខផ្ទះ ក្នុងកសិដ្ឋានស្ថិតនៅភូមិព្រៃពពេលសង្កាត់សំរោងក្រោម ខណ្ឌពោធិ៍សែនជ័យ ស្រាប់តែឮសំឡេងជនសង្ស័យឈ្មោះភិន រតនៈ ជាមន្ត្រីនគរបាលនៃមន្ទីរប្រឆាំងគ្រឿងញៀន បានជិះម៉ូតូណៃហតឌុបនារីម្នាក់មកឈប់មុខផ្ទះរបស់ខ្លួន ហើយពេលនោះជនរងគ្រោះបានស្ទុះចេញទៅមើល ក៍មានរថយន្ដមួយគ្រឿងទៀតជិះគ្នា៣នាក់ជាមន្ដ្រីនៃការិយាល័យប្រឆាំងគ្រឿងញៀន ក៥ ជាកូនចៅជនសង្ស័យ បានមកដល់ដែរ ។គ្រាន់តែកូនចៅមកដល់ភ្លាម ជនសង្ស័យឈ្មោះភិន រតនៈ បានស្រែកថា ចាប់វាៗ រួចដកអាវុធខ្លី១ដើម មិនចាំម៉ាកបាញ់ឡើងលើ១គ្រាប់ជាការគម្រាម រួចឲ្យកូនចៅចូលទៅចាប់ក្រៀករូបគេ ហើយឈ្មោះភិន រតនៈ បានលូកហោប៉ៅខោរបស់ជនរងគ្រោះយកលុយចំនួន៣២០០ដុល្លារ លុយខ្មែរ២៤ម៉ឺនរៀល និងទូរស័ព្ទដៃម៉ាកសាំស៊ុង១គ្រឿង។ ខណៈនោះមានអ្នកឆក់ត្រីម្នាក់បានឃើញហេតុការណ៍នេះដែរ ។
នៅថ្ងៃទី២០ ខែធ្នូ ឆ្នាំ២០១៩ រូបគេមកដាក់ពាក្យបណ្ដឹងនៅប៉ុស្ដិ៍សំរោងក្រោម ដោយនាំយកសំបកគ្រាប់កាំភ្លើង១គ្រាប់ទៅជាមួយផង។ប៉ុន្ដែរូបគេបែរទទួលការគម្រាមសម្លាប់ពីបក្ខពួករបស់លោកភិន រតនៈ ទៅវិញ។លុះឆ្លងចូលដល់ឆ្នាំ២០២០ភ្លាម ជនសង្ស័យឈ្មោះ ភិន រតនៈ ត្រូវបានសមត្ថកិច្ចចាប់ខ្លួន ក្រោយបែកធ្លាយវីដេអូឃ្លីបមួយ បង្ហាញមុខជនសង្ស័យ កំពុងជក់គ្រឿងញៀនហុយទ្រលោម៕
Home ព្រឹត្តិការណ៍ថ្មីៗ ស្តាយណាស់ ស័ក្តិជិតដល់មេឃទៅហើយមិនគួរភ្លាត់ស្នៀតជ្រកក្រោមអាចមន៍ជន្លេនសោះ