…បើទោះបីជាបាតដៃបានប្រឡាក់ឈាមស្ត្រីរកស៊ីផ្លូវភេទអស់ជាច្រើននាក់មកហើយតែឃាតករម្នាក់នេះបានរួចខ្លួនរហូតព្រោហទំនងជានៅមានអ្នកតាជួយបិទបាំងមិនឲ្យប៉ូលិសហិតក្លិនដឹង។ លុះដល់សម្លាប់មនុស្សស្រីច្រើននាក់ពេក…អ្នកតាខ្លាចបាបដែរក៏ដកខ្លួនថយ…មានអីឃាតករម្នាក់នេះក៏ជាប់សំណាញ់ប៉ូលិសភ្លែតក្រោយពីរូបគេបានសម្លាប់មិត្តស្រីរបស់ខ្លួន។ឃាតករម្នាក់នេះជាអ្នកមានទ្រព្យសម្បត្តិត្រូវបានប៉ូលិសថៃចាប់ខ្លួន ក្រោយគេបានរកឃើញឆ្អឹងមនុស្សជាច្រើនដុំនៅក្នុងស្រះ បរិវេណផ្ទះរបស់គាត់។ បុរសជនជាតិថៃដែលត្រូវបានប៉ូលិសចាប់ខ្លួនរូបនេះ ឈ្មោះ Apichai Ongwisit អាយុ ៤០ឆ្នាំ ។រូបគេទទួលបានមរតកយ៉ាងច្រើនពីឪពុកម្តាយរហូតក្លាយជាអ្នកមានលុយ និងមានឥទ្ធិពលម្នាក់ផងដែរ។ យ៉ាងណាក្តី លោក Apichai Ongwisit ត្រូវបានគេសង្ស័យថា បានប្រព្រឹត្តិនូវបទល្មើសជាច្រើន ជាពិសេសគឺករណីសម្លាប់មនុស្សស្រីតែម្តង។
កាលពី ៦ខែមុននេះ មានមិត្តស្រីរបស់គាត់ម្នាក់ដែលមានឈ្មោះ Warinthorn Chaiyachet អាយុ ២២ ឆ្នាំ បានបាត់ខ្លួន ហើយកន្លងមកមានទាំងមិត្តភក្តិ អតីតមិត្តស្រី និងស្ត្រីរកស៊ីផ្លូវភេទជាច្រើននាក់ ដែលធ្លាប់មានទំនាក់ទំនងជាមួយលោក Apichai Ongwisit ក៏ត្រូវបានគេកត់សម្គាល់ថា បានបាត់ខ្លួនជារឿយៗដែរ។លទ្ធផលនៃការស៊ើបអង្កេតបឋមគេបានរកឃើញភស្តុតាងថា លោក Apichai Ongwisit បានវាយសម្លាប់នាង Warinthorn Chaiyachet និងបានទម្លាក់សាកសពនាងចូលទៅក្នុងទឹកស្រះ។ យ៉ាងណាក្តី ក្នុងការរុករកក្នុងស្រះទឹកប៉ូលិសបានប្រទះឃើញបំណែកឆ្អឹងរហូតដល់ ២៩៨ ដុំដែលបំណែកទាំងនេះគឺស្មើនឹងមនុស្សយ៉ាងតិចក៏ ៣ នាក់ដែរ។ បើទោះជាយ៉ាងណាក្តីគេជឿថា មិនមែនមានតែមនុស្ស ៣ នាក់ទេ ដែលបានស្លាប់នៅក្នុងផ្ទះលោក Apichai Ongwisit នោះ ហើយពេលនេះគេកំពុងតែបូមស្រះនោះចេញទៀតផង ដើម្បីពិនិត្យឲ្យច្បាស់ថា តើមានមនុស្សប៉ុន្មាននាក់ដែល បានស្លាប់ក្នុងស្រះទឹកមួយនេះ។
សូមបញ្ជាក់ថា ឪពុករបស់លោក Apichai Ongwisit ត្រូវបានប៉ូលិសចាប់ខ្លួនកាលពីឆ្នាំ ១៩៨៣ ពីបទបានសម្លាប់ក្មេងស្រីអាយុ ១៥ ឆ្នាំម្នាក់ផងដែរ៕
