…កាលពីឆ្នាំកន្លងទៅ ប្រិយមិត្តប្រាកដជានៅចងចាំនូវរឿងរ៉ាវចោរលួចបើករថយន្តដោយទាំងកូនពីរនាក់របស់ម្ចាស់រថយន្តទៅជាមួយផង។ ប៉ុន្តែសំណាងល្អ ចោររូបនោះបានប្លុងរថយន្តចោលហើយបោលប្រូចដូចទន្សាយ ហើយសំណុំរឿងមួយនេះក៏កប់ចោលរហូតទុកកៀនជញ្ជាំង។ ដោយឡែកនៅប្រទេសអាមេរិក កាលពីពេលកន្លងទៅនេះក៏កើតមាននូវករណីគួរឲ្យផ្ទុះសំណើចដូចគ្នាដែរ..។ បុរសម្នាក់ត្រូវបានឃាត់ខ្លួន បន្ទាប់ពី បានលួចរថយន្តមួយគ្រឿងនៅក្នុងព្រលានយន្តហោះ នៅរដ្ឋផ្លរីដា ប្រទេសអាមេរិក ហើយបានបើកចេញទៅ ដោយទាំងម្តាយនិងកូនដែលជាម្ចាស់រថយន្តនៅក្នុងនោះ។
កាមេរ៉ាសុវត្ថិភាពបានថតជាប់សកម្មភាពរបស់ជនល្មើស ខណៈពេលដែលជនល្មើសបានរត់ចូលទៅរថយន្តមួយ នៅក្នុងអាកាសយានដ្ឋានអន្តរជាតិ ភាគនិរតីនៃរដ្ឋផ្លរីដា ក្នុងទីក្រុងហ្វតម៉ាយឺ។ ក្នុងខ្សែវីដេអូបានបង្ហាញឱ្យឃើញពីក្រុមគ្រួសារមួយកំពុងដាក់របស់របរចូលទៅក្នុងរថយន្ត គ្រានោះស្រាប់តែ ជនល្មើសបានរត់ពីខាងក្រោយចូលទៅក្នុងរថយន្តយ៉ាងប្រញាប់ហើយបើកចេញទៅ។ចំណែក បុរសដែលជាម្ចាស់រថយន្តបានព្យាយាមតោងយ៉ាងជាប់ ប៉ុន្តែរថយន្តអូសទៅហើយត្រូវដួលនៅនឹងកន្លែង។ បើតាមប្រភពពីសមត្ថកិច្ចបានឱ្យដឹងថា ជនល្មើសខាងលើនេះ ឈ្មោះ Addi Maqableh មានអាយុ ៣៦ឆ្នាំ ទើបតែបានលួចកាបូបរបស់អ្នកធ្វើការនៅក្នុងភោជនីយដ្ឋានមួយ មុនពេលមកបន្តប្រព្រឹត្តបទល្មើសនេះ។
ជនល្មើសត្រូវបានឃាត់ខ្លួននៅក្បែរសណ្ឋាគារមួយ ចំណែកឯរថយន្តត្រូវបានប្រគល់ជូនម្ចាស់ដើមវិញ។ ជនល្មើសត្រូវបានបញ្ជូនទៅកាន់តុលាការ ហើយត្រូវប្រឈមមុខនឹងការចោទប្រកាន់ជាច្រើនរួមមាន ការប្លន់និងការចាប់ជំរិត៕
