[wai id="7"]
ក្នុងពិធីប្រកាសផ្សព្វផ្សាយនិងដាក់អោយដំណើរការមន្ទីរសុខាភិបាលរាជធានីភ្នំពេញ នៅសាលារាជធានីភ្នំពេញ កាលពីរសៀលថ្ងៃទី១២ មិថុនា ឆ្នាំ២០២០ កន្លងមកនេះ លោក ឃួង ស្រេង អភិបាលរាជធានីភ្នំពេញ បានដាក់បទបញ្ជាយ៉ាងម៉ឺងម៉ាត់ដល់មន្ទីរសុខាភិបាលរាជធានីភ្នំពេញ និងអភិបាលគ្រប់ខណ្ឌ ត្រូវចុះពិនិត្យជាបន្ទាន់នូវទីតាំងពេទ្យធ្មេញ គ្លីនិក និងឱសថស្ថាន ដែលកំពុងដំណើរការនៅក្នុងរាជធានីភ្នំពេញទាំងអស់ បើអត់ច្បាប់ត្រូវបិទតែម្តង ។
អភិបាលរាជធានីភ្នំពេញ បានមានប្រសាសន៍ថា “ពេទ្យធ្មេញតាមត្រកូល ឬជាងធ្មេញខ្លះ ពីដើម កាលឆ្នាំ៨០មក គាត់មើលធ្មេញ ផ្ទេរពីឪទៅកូន ប៉ុន្តែអ្នកខ្លះគាត់មានគំនិត គាត់រៀនពីឪទៅកូន ជីវភាពធូរធា គាត់ បានបញ្ជូនកូន ទៅរៀនពេទ្យធ្មេញ ។ ក្រោយមកទៀត កូនគាត់ក៏ឈរជាពេទ្យធ្មេញ នឹងប្រកបរបអាជីវកម្ម បើកពេទ្យតទៅ ប៉ុន្តែអ្នកខ្លះទៀត មិនបានមានវិជ្ជាជីវៈ នេះ មន្ទីរសុខាភិបាល ត្រូវបិទឲ្យអស់ចំណុចនេះ ។ ឥឡូវនេះ កូវីដ១៩ បើយកពេទ្យធ្មេញ ទៅមើលធ្មេញទៀត រឹតតែមានបញ្ហា ដូច្នេះមន្ទីរសុខាភិបាលលុប បំបាត់ឲ្យខានតែបាន ។ ក្នុងនោះ ខណ្ឌទាំង១៤ ត្រូវមើលបញ្ហានេះ មិនមែនតែបញ្ហាពេទ្យធ្មេញមួយនោះទេ ក្លីនិក ដែលគ្មានច្បាប់អនុញ្ញាតត្រឹមត្រូវ ត្រូវបិទ” ។
អភិបាលរាជធានីភ្នំពេញ បានបញ្ជាក់ថា មន្ទីរសុខាភិបាលត្រូវធ្វើកិច្ចការងារនេះឲ្យបានច្បាស់លាស់ ដើម្បីធានាថា ក្នុងភូមិសាស្ដ្ររាជធានីភ្នំពេញ កុំឲ្យមានបទល្មើសកើតឡើង ហើយអភិបាលខណ្ឌទាំង១៤ ក៏ត្រូវដឹងច្បាស់ថា នៅក្នុងដែនសមត្ថកិច្ចមានគ្លីនិចប៉ុន្មាន ផ្នែកអ្វីខ្លះ មានច្បាប់ ឬគ្មានច្បាប់ ត្រួតពិនិត្យបញ្ហានេះមិន បណ្តោយស្រេចតែចិត្ត នោះឡើយ។
ជាមួយគ្នានោះដែរ លោក ឃួង ស្រេង បានកោតសរសើរប្រតិបត្តិករដែលមានក្រុមគ្រូពេទ្យ ខិតខំប្រឹងប្រែង ក្នុងយុគ្គសម័យ កូវីដ១៩នេះ ដោយរាជធានីភ្នំពេញ មានទំនួលខុសត្រូវ ក្នុងការព្យាបាលអ្នកជំងឺ រហូតទទួលការកោតសរសើរពីតំបន់ ក៏ដូចជាពីបរទេសផងដែរ៕
[wai id="5"]