[wai id="7"]
កាលពីពេលកន្លងទៅថ្មីនេះ នៅលើទំព័រហ្វេសប៊ុកផេក មានការផុសលក់ផេក(Facebook Page) និងBlue Tick Verified ជាហូរហែរ ហើយវាក្លាយជារបស់មានតម្លៃមួយ ដែលអ្នករកស៊ីភាគច្រើនចង់បាន ជាពិសេសអ្នកលក់អន ឡាញ ព្រោះថាផេកប្រភេទនេះអាចធ្វើការប៊ូសពេលកំពុង Live បាន ដើម្បីធ្វើឲ្យមានអ្នកចូលមើលច្រើន ។ ហើយបើនិយាយអំពីតម្លៃ ផេកដែលមាន Blue Tick Verified មានចាប់ពី ៣ពាន់ដុល្លារអាមេរិកឡើងទៅ ។
យ៉ាងណាមិញ ថ្មីនេះ មានពលរដ្ឋមួយចំនួនបានរងគ្រោះដោយសារការទិញទំព័រហ្វេសប៊ុកប្រភេទនេះ ពីជនអាណាមិករួចមក នាយកដ្ឋានព័ត៌មានវិទ្យានៃក្រសួងមហាផ្ទៃបានអំពាវនាវឲ្យពលរដ្ឋចៀសវាងការទិញដោយគ្មានឯកសារប្រភេទត្រឹមត្រូវ ។
ក្រសួងបញ្ជាក់ថាកន្លងទៅមានពលរដ្ឋដែលជាជនរងគ្រោះជាច្រើននាក់បានបាត់បង់សិទ្ធិគ្រប់គ្រងទំព័រហ្វេសបុក (Facebook Page) បន្ទាប់ពីបានកាន់កាប់បានមួយរយៈពេលខ្លី ដោយជនអាណាមិកបានធ្វើការផ្លាស់ប្ដូរជម្រើសដើម្បីបង្វៀងពីការស្វែងរកទំព័រហ្វេសបុក (Facebook Page) ពីសំណាក់ម្ចាស់ដើម។ លើសពីនេះជនអាណាមិកធ្វើការផ្សព្វផ្សាយលក់ទំព័រហ្វេសបុក (Facebook Page) ទាំងនោះក្នុងតម្លៃថោក (ខ្ទង់រយដុល្លារអាមេរិក្នុងមួយផេក) និងត្រូវបានទិញយកទៅលក់បន្តដោយអ្នករកលុយអនឡាញមួយចំនួនក្នុងស្រុក ដែលតម្លៃលក់បន្តមានរហូតដល់ខ្ទង់ម៉ឺនដុល្លារអាមេរិក។
ម្យ៉ាងទៀតបន្ទាប់ពីជនរងគ្រោះកាន់កាប់ទំព័រហ្វេសបុក (Facebook Page) បានមួយរយៈពេល ទំព័រហ្វេសបុកទាំងនោះអាចនឹងបាត់បង់ទៅវិញ ដោយសេចក្តីរាយការណ៍របស់ម្ចាស់ដើមទៅកាន់ក្រុមហ៊ុន ហ្វេសប៊ុក(Facebook) និងមានករណីមួយចំនួនផ្សេងទៀត ផេកទាំងនោះត្រូវបានជនអាណាមិក ឬអ្នកលក់បន្តធ្វើការលួចយកទៅកាន់កាប់វិញ ហើយជនរងគ្រោះពុំអាចទាមទារសិទ្ធិកាន់កាប់មកវិញបានឡើយ។
គួរបញ្ជាក់ដែរថាបើតាម នាយកដ្ឋានព័ត៌មានវិទ្យា សូមសំណូមពរបងប្អូនប្រជាពលរដ្ឋជៀសវាងការទិញទំព័រហ្វេសបុក (Facebook Page) ដែលពុំមានប្រភពច្បាស់លាស់ និងត្រូវបង្កើតទំព័រហ្វេសបុក (Facebook Page) បុគ្គល ឬជំនួញរបស់ខ្លួន ដែលមានឯកសារបញ្ជាក់ត្រឹមត្រូវជាមួយក្រុមហ៊ុន Facebook។ ក្នុងករណីបងប្អូនជាជនរងគ្រោះ នៃបទល្មើសដូចបានរៀបរាប់ខាងលើ សូមអញ្ជើញទៅដាក់ពាក្យបណ្តឹងដល់អាជ្ញាធរមានសមត្ថកិច្ច៕
[wai id="5"]