(ទីក្រុងការ៉ាកាស)៖ កាលពីថ្ងៃសៅរ៍ មានករណីបំផ្ទុះមួយបានកើតឡើង ក្នុងកំឡុងពេលសន្ទរកថារបស់លោកម៉ាឌូរ៉ូ នៅក្នុងក្បួនសមយុទ្ធយោធានៅក្នុងទីក្រុងការ៉ាកាស់។ រដ្ឋមន្ត្រីក្រសួងព័ត៌មានវ៉េណេស៊ុយអេឡា លោក Jorge Rodriguez បាននិយាយបន្ទាប់ពីឧបទ្ទវហេតុនោះថា លោកម៉ាឌូរ៉ូបានរួចខ្លួនពីការវាយប្រហារដោយយន្តហោះគ្មានមនុស្សបើក ដែលបំពាក់ដោយគ្រឿងផ្ទុះ ប៉ុនប៉ងធ្វើឃាតលោក។
រដ្ឋមន្ត្រីក្រសួងមហាផ្ទៃ លោក Nestor Reverol បានរាយការណ៍ថា មនុស្ស ៦នាក់ ត្រូវបានឃាត់ខ្លួនពាក់ព័ន្ធទៅនឹងករណីបំផ្ទុះគ្រាប់បែក ដែលបំពាក់នៅលើយន្តហោះគ្មានមនុស្សបើក។
យោងតាមរដ្ឋមន្ត្រីក្រសួងមហាផ្ទៃ ជនសង្ស័យម្នាក់ក្នុងចំណោមជនសង្ស័យផ្សេងទៀត ត្រូវបានចោទពីបទជាប់ពាក់ព័ន្ធទៅនឹងការវាយប្រហារទៅលើមូលដ្ឋានមួយកន្លែងកាលពីឆ្នាំ ២០១៧ រីឯជនសង្ស័យផ្សេងទៀតធ្លាប់ត្រូវបានឃុំខ្លួនម្តងរួចមកហើយ ពីការជាប់ពាក់ព័ន្ធទៅនឹងការតវ៉ាប្រឆាំងទៅនឹងរដ្ឋាភិបាល។
នៅព្រឹកព្រលឹមថ្ងៃនោះ រដ្ឋមន្ត្រីក្រសួងព័ត៌មាន លោក Jorge Rodriguez បានប្រាប់សារព័ត៌មាន Sputnik ថាក្រុមអ្នកវាយប្រហារនៅពីក្រោយការប៉ុនប៉ងធ្វើឃាតប្រឆាំងនឹងប្រធានាធិបតីនីកូឡាម៉ាឌូរ៉ូ បានរៀបចំប្រតិបត្តិការនេះយ៉ាងហោចណាស់អស់រយៈពេល ៦ខែមកហើយ។
លោក Rodriguez បាននិយាយថា «ប្រតិកម្មរហ័សរបស់សេវាសន្តិសុខរបស់លោកម៉ាឌូរ៉ូ មិនត្រឹមតែជម្លៀសខ្លួនប្រធានាធិបតីចេញទេ ប៉ុន្តែថែមទាំងបានដឹងអំពីទីតាំងរបស់ក្រុមឧក្រិដ្ឋជនថែមទៀតផង។ ឥឡូវនេះពួកគេបានផ្តល់ឲ្យយើងនូវព័ត៌មានលម្អិតនៃប្រតិបត្តិការនេះហើយ ដែលពួកគេបានរៀបចំយ៉ាងហោចណាស់កាលពី ៦ខែមុន»។
លោកម៉ាឌូរ៉ូបាននិយាយថា លោកត្រូវបានវាយប្រហារដោយយន្តហោះគ្មានមនុស្សបើកបំពាក់ដោយគ្រឿងផ្ទុះជាច្រើន ក្នុងកំឡុងពេលនៃថ្លែងសន្ទរកថារបស់លោក នៅឯព្រឹត្តិការណ៍មួយ នៅក្នុងទីក្រុងការ៉ាកាស់។ យ៉ាងណាក៏ដោយ ប្រធានាធិបតី និងក្រុមមន្ត្រីមិនបានរងគ្រោះថ្នាក់ពីការវាយប្រហារនោះទេ ប៉ុន្តែកងកម្លាំងការពារចំនួន ៧នាក់ជាអ្នករងគ្រោះនៅក្នុងការវាយប្រហារនេះ។ នេះបើតាមមន្ត្រីក្រសួងព័ត៌មាន លោក Jorge Rodrigues។ ការវាយប្រហារនេះ ត្រូវបានរដ្ឋាភិបាលវ៉េណេស៊ុយអេឡាហៅថា ជាការប៉ុនប៉ងធ្វើឃាតប្រធាធិបតីដោយក្រុមបក្សប្រឆាំង និងផ្សំគំនិតពីបរទេស៕DNT-NEWS
Home ព្រឹត្តិការណ៍ថ្មីៗ មនុស្ស ៦នាក់ត្រូវបានចាប់ខ្លួន បន្ទាប់ពីមានយន្តហោះដ្រូនប៉ុនប៉ងធ្វើឃាតប្រធានាធិបតីវេណេស៊ុយអេឡា លោកម៉ាឌូរ៉ូ