សម្តេច ហ៊ុន សែន នាយករដ្ឋមន្ត្រីកម្ពុជាបាន បបួលមេបក្សប្រឆាំងស្បថ ដើម្បីបង្ហាញការពិត ថាប្រជាជនកម្ពុជាប្រមាណជាង ៨២ ភាពរយបានទៅបោះឆ្នោតពិតប្រាកដ ដែលបញ្ហានេះបក្សប្រឆាំងលើកឡើងថាជាការបំប៉ោងតួលេខនិងមាន ការគំរាមគំហែងនិងកៀបសង្កត់ពលរដ្ឋឲ្យទៅបោះឆ្នោត ។
សម្តេចនាយករដ្ឋមន្ត្រីបានបបួល អតីតមេបក្សប្រឆាំងស្បថឲ្យងាប់គ្រប់ទម្រង់ទាំង អស់ ដែលអាចស្លាប់ទៅបាន ដើម្បីបញ្ជាក់ថាភាពស្មោះត្រង់តែបើពួកប្រឆាំងមិនហានស្បថទេបានន័យថាការនិយាយរបស់ពួកគេគឺជាការ បោកប្រាស់ប្រជាជន ហើយមានន័យស្មើនិងគេទទួលស្គាល់ការពិតថាមានប្រជាជនទៅបោះឆ្នោតជាង ៨២ ភាគរយមែន ។
ការថ្លែងប្រតិកម្ម និង លោក សម រង្ស៊ី ស្បថដាក់ជីវិតលើការចោទប្រកាន់នេះ បានធ្វើឡើងក្នុងពេលដែលសម្តេចតេជោ ហ៊ុន សែន ជួបផ្តល់ដំបូន្មានមួយចំនួនដល់អត្តពលិក កីឡាករ កីឡាករិនី គ្រូបង្វឹក និងប្រតិភូកីឡាមុនចេញទៅប្រកួតកីឡាប្រចាំទ្វីបអាស៊ី (Asian Games) លើកទី១៨ នាព្រឹកថ្ងៃចន្ទ ទី០៦ ខែសីហា ឆ្នាំ២០១៨នេះ។
កាលពីពេលកន្លងមក លោកសម រង្ស៊ី វិញ តាមរយៈបណ្តាញព័ត៌មាន និងហ្វេសប៊ុករបស់លោក បានអះអាងថា អត្រាអ្នកចូលរួមបោះឆ្នោតមានតិចជាង៥០ ភាគរយ គឺមិនមែន៨២ ភាគរយដូចប្រមុខបក្សកាន់អំណាចអះអាងឡើយ។ មិនតែប៉ុណ្ណោះ លោកសម រង្ស៊ី ថែមទាំងហ៊ានអះអាងទៀតថា អត្រាអ្នកបោះឆ្នោតមានចំនួនច្រើនបែបនេះ គឺកើតចេញពីការក្លែងបន្លំ និងរាប់ខុស ធ្វើឲ្យសន្លឹកឆ្នោតមោឃៈមួយចំនួនធំក្លាយទៅជាសន្លឹកឆ្នោតគាំទ្រគណបក្សប្រជាជនកម្ពុជា។
សម្រាប់សម្តេចនាយករដ្ឋមន្ត្រីហ៊ុន សែន បើសិននេះជាការពិតមែននោះ លោកសម រង្ស៊ី ត្រូវតែហ៊ានស្បថដាក់ជីវិតជាមួយរូបសម្តេច។ ស្បថឲ្យស្លាប់ដោយរន្ទះបាញ់ ឡានបុក ធ្លាក់យន្តហោះ ទេវតាបរាមុខ ស្លាប់តៃហោងគ្មានដីកប់ និយាយឲ្យខ្លីឲ្យតែស្លាប់ខ្លួន គឺជាសម្បថដែលសម្តេច ហ៊ុន សែនចង់ឲ្យលោកសម រង្ស៊ី មកស្បថតទល់ជាមួយនឹងសម្តេច ។ សម្តេច ថា លោកសម រង្ស៊ី អាចស្បថដោយសរសេរនៅលើទំព័រហ្វេសប៊ុកឬតាមណាក៏បានដែរឲ្យលោកសម រង្ស៊ីហ៊ាន។ សម្តេចនាយករដ្ឋមន្ត្រីគូសបញ្ជាក់ថា បើលោកសម រង្ស៊ីហ៊ានស្បថនោះ គឺថាប្រសិនបើនរណាម្នាក់ស្លាប់ដោយសារការស្បថនេះ អាចបញ្ជាក់ពីការពិតហើយ។
សម្តេចតេជោ ហ៊ុន សែន បានថ្លែងថា ការស្បថនេះមិនមែនជារឿងផ្ចាញ់ផ្ចាលទេ ហើយក៏មិនមែនជារឿងទាល់ច្រកដែរ ព្រោះថា ប្រពៃណីខ្មែរ ក៏ដូចជាប្រពៃណីនៅលើពិភពលោក ប្រធានាធិបតី ឬនាយករដ្ឋមន្ត្រី សមាជិកសភា ឬព្រឹទ្ធសភាមុនចូលកាន់តំណែងសុទ្ធតែស្បថទាំងអស់៕
Home ព្រឹត្តិការណ៍ថ្មីៗ សម្តេច ហ៊ុន សែន ៖ បបួលលោក សម រង្ស៊ី ស្បថដាក់ជីវិតប្រសិនបើនរណាម្នាក់ស្លាប់ដោយសារការស្បថនេះ អាចបញ្ជាក់ពីការពិតហើយ…