(ទីក្រុងតេលអាវីវ)៖ សារព័ត៌មាន The Drive អាមេរិកបានចេញផ្សាយនៅថ្ងៃទី២៣ មករានេះថា អង្គការការពារជាតិអ៊ីស្រាអែល រួមគ្នាជាមួយទីភ្នាក់ងារការពារមីស៊ីលសហរដ្ឋអាមេរិក បានចាប់ផ្តើមសាកល្បងគ្រាប់មីស៊ីល Arrow3 ចេញពីមូលដ្ឋានទ័ពអាកាស Palmachim នៅចំកណ្តាលប្រទេសអ៊ីស្រាអែល ប្រឆាំងទៅនឹងគ្រាប់មីស៊ីលក្លែងមួយកាលពីថ្ងៃទី២៤ មករាម្សិលមិញនេះ។
កងកម្លាំងការពារជាតិអ៊ីស្រាអែលបាននិយាយនៅក្នុងសេចក្តីថ្លែងការមួយថា «ភាពជោគជ័យនៃការសាកល្បងនេះ បង្ហាញព្រឹត្តិការណ៍សំខាន់មួយនៅក្នុងសមត្ថភាពប្រតិបត្តិការរបស់រដ្ឋអ៊ីស្រាអែល ក្នុងការការពារខ្លួនប្រឆាំងទៅនឹងការគម្រាមកំហែងនាពេលបច្ចុប្បន្ន និងនាពេលអនាគត»។
ឧត្តមសេនីយ៍អាមេរិកប្រចាំនៅកងទ័ពអាកាស លោក Samuel Greave បាននិយាយនៅក្នុងសន្និសីទសារព័ត៌មានថា «ការសាកល្បងប្រកបដោយជោគជ័យនេះ ផ្តល់នូវទំនុកចិត្តដល់សមត្ថភាពអ៊ីស្រាអែលក្នុងការការពារពីការគម្រាមកំហែងនៅក្នុងតំបន់បាន»។ លោកបន្តថា «យើងប្តេជ្ញាជួយរដ្ឋាភិបាលអ៊ីស្រាអែល ក្នុងការធ្វើទំនើបកម្មគ្រាប់មីស៊ីលរបស់ខ្លួនប្រឆាំងទៅនឹងការគម្រាមកំហែងដែលកំពុងលេចឡើង»។
គ្រាប់មីស៊ីល Arrow 3 នេះតំណាងនូវស្រទាប់ខ្ពស់បំផុតនៃប្រព័ន្ធការពារមីស៊ីលរបស់អ៊ីស្រាអែល និងអាចភ្ជាប់ខ្លួនទៅនឹងគ្រាប់មីស៊ីលប៉ាឡេស្ទីកបានគ្រប់ពេល រួមទាំងមីស៊ីលរយៈកម្ពស់ខ្ពស់ និងមីស៊ីលអន្តរទ្វីបល្បឿនលឿនផងដែរ។
ប្រព័ន្ធពេញលេញរបស់វាប្រើប្រាស់នូវរ៉ាដាស្គែនដោយអេឡិចត្រូនិច ដើម្បីសម្គាល់មើល និងតាមដានរាល់ការគម្រាមកំហែង។ កងកម្លាំងយោធាសហរដ្ឋអាមេរិកក៏បានប្រតិបត្តិនូវរ៉ាដាការពារមីស៊ីល AN/TPY-2 នៅក្នុងប្រទេសអ៊ីស្រាអែល និងព័ត៌មានពីឧបករណ៍ចាប់សញ្ញាផងដែរ។
មានពាក្យចរចាមអារាមថា សហរដ្ឋអាមេរិកបានបញ្ចូលប្រព័ន្ធព័ត៌មានដែលពាក់ព័ន្ធនឹងបច្ចេកវិទ្យានេះទៅឲ្យអ៊ីស្រាអែល ចេញពីឧបករណ៍ចាប់សញ្ញាដទៃទៀតរួមទាំងប្រព័ន្ធអាំងហ្វ្រែដែលមានមូលដ្ឋាននៅទីអវកាស។
មីស៊ីលស្ទាក់ចាប់នេះ ផ្អែកលើបទពិសោធនៃមីស៊ីលមុន គឺ Arrow 2 ដែលវាមិនមានលទ្ធភាពទប់ស្កាត់នូវការស្ទាក់ចាប់ពីបរាយាកាសខាងក្រៅបាននោះទេ។ អ៊ីស្រាអែលបានទទួលថវិការ និងជំនួយពីសហរដ្ឋអាមេរិក ដើម្បីផលិតមីស៊ីលនេះចាប់តាំងពីទសវត្សឆ្នាំ ១៩៨០មកម្ល៉េះ។ក្រុមហ៊ុនបូអ៊ីងអាមេរិកជាប់ពាក់ព័ន្ធដោយផ្ទាល់ជាមួយការផលិតគ្រាប់មីស៊ីល Arrow3 នេះ។
គ្រាប់មីស៊ីល Arrow 3 ត្រូវបានបញ្ចូលប្រតិបត្តិការសេវាកម្មនៅក្នុងខែមករា ឆ្នាំ២០១៧ ហើយប្រព័ន្ធនេះបានបាញ់ទម្លាក់មីស៊ីលបាញ់ពីដីទីអាកាស ក្នុងរយៈពេល ៣ខែបន្ទាប់។
គួរកត់សម្គាល់ថា គ្រាប់មីស៊ីល Arrow3 ដែលត្រូវបានសាកល្បងនេះ ធ្វើឡើងក្រោយការបាញ់គ្រាប់មីស៊ីលមួយគ្រាប់ពីសំណាក់អ៊ីរ៉ង់ ទៅទម្លាក់ពីលើតំបន់រមណីយដ្ឋានស្គីហឺម៉ុនរបស់អ៊ីស្រាអែល ប៉ុន្តែត្រូវបាញ់ទម្លាក់ដោយប្រព័ន្ធការពារដែនប្រទេសនេះ៕
Home ព្រឹត្តិការណ៍ថ្មីៗ អ៊ីស្រាអែល និងអាមេរិកចាប់ដៃគ្នាសាកល្បងគ្រាប់មីស៊ីល Arrow 3 ដ៏ខ្លាំងក្លាយ បន្ទាប់ពីអ៊ីរ៉ង់បាញ់គ្រាប់មីស៊ីលមួយគ្រាប់មកលើខ្លួន