ស្ថានីយ៍អវកាសរបស់ចិន Tiangong ឬហៅថា Heavenly Palace (វិមានឋានសួគ៌) គ្រោងនឹងចាប់ផ្តើមនៅឆ្នាំ ២០២២ខាងមុខ។ ស្ថានីយដែលត្រូវបានគេរំពឹងថា នឹងយកស្តង់ដាតាមស្ថានីយ៍ដែលមានលក្ខណស្រដៀងគ្នា ដូចជាស្ថានីយ៍អវកាសអន្តរជាតិ (ISS) នឹងត្រូវបើកទៅកាន់ក្រុមអវកាសយានិកបរទេស។
មានទំហំធំជាងស្ថានីយ៍អវកាសរុស្ស៊ី Mir ទម្ងន់ ១៤០តោន ស្ថានីយ៍អវកាស Tiangong មានម៉ូឌូលស្នូលនិងបន្ទប់ពិសោធន៍ពីរដែលមានទំហំធំល្មមអាចផ្ទុកអាកាសយានិកចន្លោះពី ៣ ទៅ ៦នាក់។ ទាំងស្ថានីយ៍អវកាសអន្តរជាតិ និងស្ថានីយ៍អវកាស Mir បានទទួលស្វាគមន៍ក្រុមអវកាសយានិកអន្តរជាតិទាំងអស់។
លោក Zhang Baoxin អ្នកជំនាញផ្នែកអាកាសចរណ៍និងយោធានៅក្រុមហ៊ុនអាកាសចរណ៍ចិនបាននិយាយប្រាប់សារព័ត៌មាន Global Times កាលពីខែឧសភាថា «មានតែប្រទេសមួយចំនួនតូចតែប៉ុណ្ណោះ ដែលមានសមត្ថភាពបញ្ជូនស្ថានីយ៍អវកាសឡើងទៅក្នុងតារាវិថីបាន។ វាគឺជាកម្មវិធីដ៏ធំមួយដែលបង្ហាញពីសមត្ថភាពវិទ្យាសាស្ត្រ និងបច្ចេកវិទ្យារបស់ប្រទេសចិន»។
ស្ថានីយ៍អវកាសនេះក៏នឹងត្រូវបានបំពាក់ដោយប្រព័ន្ធកែវយឺតស្ទង់ដែលអាចមើលឃើញក្នុងកម្រិតឆ្ងាយ ឬមានកម្រិតខ្ពស់ស្មើទៅនឹងកែវយឹតអវកាស Hubbleរបស់អង្គការណាសា។
លោក Zhang បានប្រាប់កាសែត Global Times កាលពីខែឧសភាថា ការរួមបញ្ចូលគ្នានៃកែវយឹត Aperture Spherical Radio Telescope ដែលមានទំហំ ៥០០ម៉ែត្រ នឹងធ្វើឲ្យចិនកាន់តែបោះជំហានបានកាន់តែប្រសើរ នៅក្នុងវិស័យនេះ។ ស្ថានីយ៍ Tiangong ក៏នឹងរួមបញ្ចូលនូវម៉ូឌូលកាប៊ីននៃទីពិសោធន៍ជាមួយនឹងបរិស្ថានដែលរងសម្ពាធ ដើម្បីធ្វើការពិសោធមីក្រូទំនាញ និងទម្លាក់សេរី៕DNT-NEWS