ថ្មីៗនេះ លោក ខេមរៈ សិរីមន្ត កំពូលតារាចម្រៀងប្រុសលំដាប់ជួលមុខ ក្នុងប្រទេសកម្ពុជា បានបង្ហោះសារមួយដែរគួរឲ្យភ្ញាក់ផ្អើលដោយលើកឡើងថានឹងត្រៀមមេធាវីប្តឹង ម៉ៃ សុគន្ធក្នុងនោះតារាចម្រៀង ខេមរៈ សិរីមន្ត បានបញ្ជាក់យ៉ាងច្បាស់ថា លោកនឹងប្តឹងលោក ម៉ៃ សុគន្ធ ពីបទញុះញង់ បទធ្វើឲ្យប៉ះពាល់សិទ្ធិ និងផលប្រយោជន៍បុគ្គលជាដើម។នេះបើយោងតាមហ្វេសប៊ុករបស់លោក ខេមរៈ សិរីមន្ត ។
ជាក់ស្តែង បើយោងតាមបណ្តាញសង្គមហ្វេសប៊ុកផ្លូវការរបស់ តារាចម្រៀង ខេមរៈ សិរីមន្ត បានសរសេរសារយ៉ាងដូច្នេះថា «មេធាវីរបស់ខ្ញុំបានរៀបចំសំណុំបែបបទរួចអស់ ហើយបទល្មើសនឹងភស្តុតាងមានគ្រប់គ្រាន់អស់ហើយ
-បទចោទ
-បទញុះញុង់មានជាអាទិ៍
-បទធ្វើអោយប៉ះពាល់សិទ្ធនឹងផលប្រយោជន៍បុគ្គល
ខ្ញុំមិនដែលគិតចង់មានបញ្ហាជាមួយបុគ្គលម្នាក់នេះឡើយ តែគាត់ចង់បានបែបនេះ ដូច្នេះទទួលយកអ្វីដែលខ្លួនបានសាងបទល្មើសនេះចុះ»។
បន្ទាប់ពីការប្រតិកម្មរបស់លោក សិរីមន្ត រួចមកលោកម៉ៃ សុគន្ធ បានផ្តល់បទសម្ភាសន៍ឲ្យសារព័ត៌មានក្នុងស្រុកមួយដោយលោកបកស្រាយថា គ្មានករណីធំដុំអ្វីដែលធ្វើឲ្យខ្ញុំភ្ញាក់ផ្អើលឬខ្លាចនោះទេ ព្រោះរឿងនេះត្រឹមតែការរិះគន់បែបប្រយោលប៉ុណ្ណោះ។ ម្យ៉ាងទៀតបើពិនិត្យទៅគ្មានអ្វីដែលពាក់ព័ន្ធលើផ្លូវច្បាប់ដែលធ្ងន់ធ្ងរអាចនឹងដាក់បន្ទុកនោះឡើយ។ លោកបន្តថា រាល់ការសរសេរនោះ ខ្ញុំធ្វើឡើងត្រឹមតែលក្ខណៈប្រយោលទេ ហើយក៏គ្មានបញ្ជាក់ចំឈ្មោះបុគ្គលដែរ…..។
តារាចម្រៀងប្រុសលោក ម៉ៃ សុគន្ធ បានលើកឡើងទៀតថា គិតតាមផ្លូវច្បាប់បើយើងខុសទាល់ តែខ្ញុំសរសេរដាក់ឈ្មោះគាត់ តែនេះខ្ញុំគ្មានសរសេរដាក់ឈ្មោះគាត់ផងតើខុសដែរឬ ?។ ម្យ៉ាងទៀតគាត់ក៏ជាបុគ្គលអ្នកសិល្បៈ និងជាមនុស្សរបស់មហាជន ដូច្នេះរាល់ការរិះគន់ខ្លះគឺគ្មានអ្វីខុសផងហ្នឹង កុំឲ្យតែការរិះគន់នោះជេរប្រមាថដល់ម្តាយគេទៅបានហើយ។
លោក ម៉ៃ សុគន្ធ បានបន្ថែមទៀតថា ប្រសិនបើជាគាត់ប្តឹងក៏គ្មានទោសឯណាពាក់ព័ន្ធរឿងព្រហ្មទណ្ឌដែរ ហើយបើលោក ខេមរៈ សិរីមន្ត គាត់ចង់ប្តឹងលើបទដូចការលើកឡើងនោះក៏ប្តឹងទៅខ្ញុំអាចកំដរគាត់បានគ្រប់ពេល។
គួរបញ្ជាក់ដែរថា នេះមិនមែនជាលើកទី១ឡើយសំរាប់លោក ម៉ៃ សុគន្ធ ដែលតែងតែធ្វើការរិះគន់អ្នកសិល្ប:ក៏ដូចជារឿងរ៉ាវនានាទូទៅដែលបានកើតមានឡើងនៅក្នុងសង្គម មានមតិមហាជនខ្លះបានលើកឡើងថាលោក ម៉ៃ សុគន្ធ នៅក្នុងវិថីសិល្ប:គឺពុំមាននរណាស្គាល់សោះឡើយ ប៉ុន្តែអ្វីដែលធ្វើឲ្យគេចាប់អារម្មណ៏រូបលោកនោះគឺដោយសារការវាយប្រហារអ្នកសិល្ប:ល្បីៗដើម្បីតោងកាលីបគេយកប្រជាប្រិយភាព រហូតត្រូវបានគេផ្តល់រហ័សនាមថា តារាកំពូលទើស ។ ប៉ុន្តែបើតាមមតិមហាជនខ្លះទៀតបានលើកឡើងថា សំរាប់សិល្ប:គឺពុំមែនជាមនុស្សបុគ្គលនោះឡើយ មានន័យថាជាមនុស្សសាធារណ:ដូច្នេះការរិះគន់ ការសរសើរជារឿងធម្មតាតែប៉ុណ្ណោះ ៕
ដោយ៖ណារ៉ូ
Home សិល្បៈកម្សាន្ត បន្ទាប់ពីមានជម្លោះជាមួយតារាចម្រៀង ខេមរៈ សិរីមន្ត លោកម៉ៃ សុគន្ធ ត្រូវបានមហាជនរិះគន់ថាការវាយប្រហារអ្នកសិល្ប:ល្បីៗគ្រាន់តែដើម្បីតោងកាលីបគេយកប្រជាប្រិយភាពគេតែប៉ុណ្ណោះ !