លោក Kang Ji Hwanគឺជាតារាសម្តែងដ៏ល្បីម្នាក់របស់កូរ៉េខាងត្បូង ត្រូវបានចាប់ខ្លួនពីបទបំពានផ្លូវភេទ។ ក្រុមនគរបាល បានចាប់ខ្លួនតារាសម្តែងម្នាក់នេះ នៅឯផ្ទះរបស់លោក ស្ថិតនៅក្នុងទីក្រុង Gwangju កាលពីវេលាម៉ោង១០ និង៥០នាទីយប់ម៉ោងក្នុងស្រុក កាលពីថ្ងៃទី៩ ខែកក្កដា កន្លងទៅ។
យោងតាមសេចក្តីរាយការណ៍បានឲ្យដឹងថា លោក Kang Ji Hwan បានវិលត្រឡប់មកផ្ទះវិញជាមួយបុគ្គលិកស្រី២នាក់ មកពីទីភ្នាក់ងាររបស់លោក ដើម្បីផឹកស៊ីបន្តនៅផ្ទះ បន្ទាប់ពីកម្មវិធីទទួលទានអាហារពេលល្ងាចរបស់ក្រុមហ៊ុន។
ក្រោយមកនៅយប់នោះ លោកបានចូលទៅក្នុងបន្ទប់ ជាកន្លែងដែលស្ត្រីទាំង២នាក់នោះកំពុងដេក រួចហើយបានធ្វើសកម្មភាពបំពានផ្លូវភេទមកលើស្ត្រី១ និងបានធ្វើទង្វើរមិសមរម្យផងដែរមកលើស្ត្រីទី២។
នៅយប់នោះដែរ វេលាម៉ោង៩ និង៤១នាទី ស្ត្រីទី១ បានផ្ញើសារដល់មិត្តភ័ក្ត្រម្នាក់នៅក្រុងសេអ៊ូល និងបាននិយាយប្រាប់ថា នាងបានផឹកស៊ីនៅផ្ទះរបស់តារាសម្តែង Kang Ji Hwan ហើយឥឡូវបានជាប់ខ្លួននៅទីនោះ និងសុំឲ្យមិត្តរបស់នាង រាយការណ៍ប្រាប់ក្រុមនគរបាល។
ពេលដែលក្រុមនគរបាល ធ្វើដំណើរមកដល់ផ្ទះលោក Kang Ji Hwan ស្ត្រីទី១ បាននិយាយថា នាងកំពុងតែដេក ពេលដែលលោក Kang Ji Hwan បំពានផ្លូវភេទមកលើរូបនាង ជាហេតុនាំឲ្យមានការចាប់ខ្លួនតារាប្រុសម្នាក់នេះតែម្តង។
នៅប៉ុស្តិ៍នគរបាល លោក Kang Ji Hwan បាននិយាយថា លោកចាំថា លោកបានផឹកស្រាច្រើន ប៉ុន្តែលោកមិនចាំអ្វីៗទៀតនោះទេ ក្រោយពីនោះ។ ពេលដែលលោកបើកភ្នែក លោកស្ថិតនៅក្នុងបន្ទប់ដែលស្ត្រីទី១ កំពុងតែដេក។
ក្រោយពីការសាកសួរមួយជុំរួច លោក Kang Ji Hwan ស្ថិតក្នុងស្ថានភាពស្រវឹងនៅឡើយ ជាហេតុធ្វើឲ្យក្រុមនគរបាលពន្យាពេលសួរចម្លើយ ហើយក្រុមនគរបាល នឹងចាប់ផ្តើមសួរចម្លើយនៅថ្ងៃបន្ទាប់ទៀត។
សូមបញ្ជាក់ថា បច្ចុប្បន្ន លោក Kang Ji Hwan កំពុងសម្តែងនៅក្នុងរឿង “Joseon Survival” របស់ទូរទស្សន៍ TV Chosun ៕
Home សិល្បៈកម្សាន្ត តារាប្រុសកូរ៉េ Kang Ji Hwanត្រូវបានចាប់ខ្លួនពីបទបំពានផ្លូវភេទលើបុគ្គលិករបស់ខ្លួន