មួយរយ:ពេលចុងក្រោយនេះ នៅលើបណ្តាញសង្គមហ្វេសប៊ុកមានការចែករំលែកយ៉ាងព្រោងព្រាត នូវខិត្តប័ណ្ណរូបស្ត្រីចិនស្រស់ស្អាតស្រាតននលគោក និងមានសរសេរអក្សរចិនអមជាមួយ រួមទាំងដាក់លេខទូរស័ព្ទសម្រាប់ទំនាក់ទំនង ត្រូវបានចែកចាយពេញខេត្តព្រះសីហនុ ដែលកំពុងរងនូវការរិះគន់យ៉ាងចាស់ដៃពីសំណាក់មហាជន ។
ជុំវិញបញ្ហានេះលោកឧត្តមសេនីយ៍ទោ ជួន ណារិន្ទ ស្នងការនគរបាលខេត្តព្រះសីហនុ បានថ្លែងប្រាប់សារព័ត៌មានក្នុងស្រុកមួយថា ចំពោះករណីចែកខិត្តប័ណ្ណកន្លែងរកស៊ីផ្លូវភេទនេះ ពិតជាកើតមាននៅខេត្តព្រះសីហនុ ពិតប្រាកដមែន ហើយលោកបានបញ្ជាឲ្យខាងជំនាញធ្វើការស្រាវជ្រាវករណីនេះហើយ។
គួរបញ្ជាក់ដែរថា មានមតិរបស់ប្រជាពលរដ្ឋមួយចំនួនដែលរស់នៅទីនោះបានលើកឡើងថា លំហូរចូលយ៉ាងគំហុកនៃជនជាតិចិននៅខេត្តព្រះសីហនុកំពុងបង្កឲ្យមានភាពចម្រូងចម្រាសមិនត្រឹមតែសណ្តាប់ធ្នាប់ សន្តិសុខប៉ុណ្ណោះទេ ប៉ុន្តែក៏កំពុងបង្កឲ្យមានវិវាទក្នុងអាជីវកម្មជាមួយអ្នកនៅក្នុងស្រុកផងដែរ។
ជនជាតិចិនត្រូវបានគេមើលឃើញថាកំពុងក្រសោបអាជីវកម្មនៅក្នុងខេត្តឆ្នេរដ៏ល្បីល្បាញរបស់កម្ពុជាមួយនេះរាប់ចាប់តាំងពីកាស៊ីណូ សណ្ឋាគារ ភោជនីយដ្ឋាន រហូតដល់មុខរបរតូចតាចដូចជាហាងកាត់សក់ និងការលក់មីឆាតាមផ្លូវជាដើម។ ប៉ុន្តែយ៉ាងណាមិញលោក យន្ត មីន អភិបាលខេត្តព្រះសីហនុលើកឡើងថា មិនថាកម្ពុជា ឬប្រទេសណានោះឡើយ គឺស្វាគមន៍ចំពោះជនបរទេសមកវិនិយោគច្រើន មិនថាជនជាតិចិន អាមេរិក ឬបារាំងឡើយ គឺស្វាគមន៍ទាំងអស់ឲ្យតែមានបំណងមកកម្ពុជា ប៉ុន្តែទន្ទឹមនឹងនេះ អាជ្ញាធរត្រូវមានវិធានការអនុវត្តន៍ច្បាប់ ឲ្យបានតឹងរឹងចំពោះជនបរទេសទាំងនោះផងដែរ ដោយគោរពទៅតាមច្បាប់របស់កម្ពុជា។នេះបើយោងតាមការចុះផ្សាយរបស់ Freshnews កាលពីពេលកន្លងមក ។
លោក យន្ត មីន បានលើកឡើងថា ចំពោះជនបរទេស ដែលរស់នៅខេត្តព្រះសីហនុ អាជ្ញាធរខេត្ត រួមទាំងកម្លាំងសមត្ថកិច្ច បានដាក់ចេញនូវវិធានការយ៉ាងម៉ឺងម៉ាត់ ដើម្បីគ្រប់គ្រងជនបរទេសទាំងនោះ៕
Home ព្រឹត្តិការណ៍ថ្មីៗ អាជ្ញាធរខេត្តព្រះសីហនុ ៖ ចំពោះករណីចែកខិត្តប័ណ្ណកន្លែងរកស៊ីផ្លូវភេទនេះ ពិតជាកើតមាននៅខេត្តព្រះសីហនុ ពិតប្រាកដមែន…..