កាលពីពេលថ្មីៗនេះ ជំងឺប៉េសជ្រូកអាហ្វ្រិក (African Swine Fever) ត្រូវបានរកឃើញថាមានផ្ទុកក្នុងសត្វជ្រូកនៅកសិដ្ឋានចំនួនបីក្នុងប្រទេសវៀតណាម។ តាមមន្ត្រីមូលដ្ឋាននៅប្រទេស វៀតណាមឲ្យដឹងថា កាលពីប៉ុន្មានសប្តាហ៍មុននេះ ជ្រូកចំនួនជាង ៥០ក្បាលនៅក្នុងស្រុក May Xuyenខេត្ត សុកត្រាង Soc Trang ត្រូវបានពេទ្យជំនាញរកឃើញថា មានផ្ទុកទៅដោយវីរុស ASF ដូច្នេះហើយខេត្តភាគខាងត្បូង មួយនេះបានក្លាយជាខេត្តចុងក្រោយគេនៅវៀតណាម ដែលមានផ្ទុះករណីឆ្លងជំងឺប៉េសជ្រូកអាហ្វ្រិក។
តែជាទោះយ៉ាងណាក៏ដោយមន្ត្រីវៀតណាម បានអំពាវនាវទៅពលរដ្ឋរបស់ខ្លួនកុំឲ្យមានការព្រួយបារម្ភ ព្រោះថាជំងឺនេះមិនឆ្លងទៅមនុស្សនោះទេ។ អាជ្ញាធរប្រទេសនេះ ក៏បានលើកឡើងផងដែរថា ប្រជាពលរដ្ឋនៅតែអាចបរិភោគសាច់ជ្រូកបាន ហើយមិនគួរធ្វើពហិការផលិតផលសាច់ជ្រូកនោះទេ។
អាជ្ញាធរវៀតណាម បានឲ្យដឹងផងដែរថា មូលហេតុដែលធ្វើឲ្យពិបាកក្នុងការទប់ស្កាត់ជំងឺនេះ ដោយសារតែមានការរត់ពន្ធសត្វតាមបណ្ដោយព្រំដែន និងភ្ញៀវទេសចរដែលធ្វើដំណើរមកកម្សាន្តនៅប្រទេសនេះ។
ប្រជាជនវៀតណាម ប្រហែល៣០លាននាក់ប្រកបរបរចិញ្ចឹមជ្រូកសម្រាប់លក់ និងទទួលទានក្នុងស្រុក។ សាច់ជ្រូក ជាប្រភេទសាច់ដែលជនជាតិវៀតណាមចូលចិត្តបរិភោគជាងគេ ដែលមានប្រហែល៧៥ភាគរយនៃផលិតសាច់សរុបក្នុងប្រទេសនេះ។