សម្តេច ហ៊ុន សែន នាយករដ្ឋមន្ត្រីកម្ពុជាបានមានប្រសាសន៍ឲ្យដឹងថាសម្តេចមានបំណងនឹងដោះលែងមនុស្សចំនួន ១២ នាក់ទៀត នៅពេលខាងមុខនេះ ។ក៏ប៉ុន្តែប្រសិនបើនៅតែមានមនុស្សដែរនិយាយថារាជរដ្ឋាភិបាលដោះលែងអ្នកទាំងនោះដោយសារតែការកៀបសង្កត់ពីបរទេស នោះ ការលើកលែងទោសដល់ទណ្ឌិតទាំង១២នាក់ អាចនឹងប្រែប្រួលវិញ ។
ការប្រកាសរបស់សម្តេចតេជោ ហ៊ុន សែន បានធ្វើឡើង នៅព្រឹកថ្ងៃព្រហស្បត្តិ៍ ១២កើត ខែស្រាពណ៍ ឆ្នាំច សំរឹទ្ធិស័ក ព.ស ២៥៦២ ត្រូវនឹងថ្ងៃទី២៣ ខែសីហា ឆ្នាំ២០១៨នេះ ក្នុងឱកាសដែលសម្តេចបន្តអញ្ជើញចុះជួបសំណេះសំណាល ជាមួយកម្មករ កម្មការិនីចំនួន១៧,៥០៣នាក់ មកពីរោងចក្រ សហគ្រាចំនួន១២ នៅក្នុងខេត្តកណ្តាល។
សម្តេចបានបង្ហើបឲ្យដឹងទៀតថារាជរដ្ឋាភិបាលមានគម្រោងលើកលែងទោសចំពោះមនុស្ស១២នាក់ជ្សេងទៀតដែលអ្នកទាំងអស់នោះបាន ធ្វើលិខិតសុំទោសរាជរដ្ឋាភិបាលរួចហើយ ។ ប៉ុន្តែប្រសិនជាមានអ្នកណាមួយនិយាយថា “ខ្ញុំត្រូវរងការគាបសង្កត់ពីអន្តរជាតិទើបដោះលែងនោះខ្ញុំនឹង រក្សាទុកអ្នកទាំងនោះនៅក្នុងេពន្ធនាគារបន្តទៀត ។ ដើម្បីទុកឲ្យអ្នកដែលជាប់ទោសនោះធ្វើការថ្កោលទោសចំពោះអ្នកដែលនិយាយថាបរទេសកៀប សង្កត់ កម្ពុជាទើបបានជាសម្ដេចហ៊ុនសែនដោះលែង ។
សម្តេច ហ៊ុន សែន ពន្យល់ហេតុផលថា ការលើកឡើងបែបនេះ មិនមែនរឹតត្បិត ឬបិទមាត់ពួកគេ មិនឲ្យបញ្ចេញមតិនោះទេ តែពួកគេ ក៏ត្រូវគិតពីសិទ្ធិរសប់អ្នកដទៃផងដែរ។ ប្រមុខរដ្ឋាភិបាល បន្ថែមថា ការបញ្ចេញមតិ មិនត្រូវប៉ះពាល់ដល់អ្នកណាម្នាក់ឡើយ។
ប៉ុន្មានថ្ងៃនេះ មានមនុស្សមួយចំនួន ត្រូវបានដោះលែងជាបន្តបន្ទាប់ ដែលរួមមាន លោក គឹម សុខ អ្នកវិភាគនយោបាយ លោកស្រី ទេព វន្នី សកម្មជនបឹងកក់ រួមទាំងអតីតអ្នកកាសែតនៃវិទ្យុអាស៊ីសេរីពីរនាក់ទៀត គឺលោក អ៊ួន ឈិន និងលោក យាង សុជាមេត្តា។ ក្នុងចំណោមអ្នកចេញពីពន្ធនាគារទាំងនោះ មានតែលោក គឹម សុខ ប៉ុណ្ណោះ ដែលនៅតែហ៊ាននិយាយខ្លាំងៗ ជាពិសេសពាក់ព័ន្ធនឹងរឿងនយោបាយ។
ទោះជាប្រមុខរដ្ឋាភិបាល មិនប្រាប់ឲ្យច្បាស់ក្តី ប៉ុន្តែ គេ សង្ស័យថា មនុស្ស១២នោះ ប្រហែលជាអតីតមន្ត្រីជាន់ខ្ពស់គណបក្សសង្គ្រោះជាតិ គឺលោក មាជ សុវណ្ណារ៉ា និងអតីតសកម្មជននាក់ទៀត ឬក៏អាចមានទាំងលោក អ៊ុំ សំអាន អតីតតំណាងរាស្ត្រគណបក្សសង្គ្រោះជាតិ ក៏ថាបាន។
សូមបញ្ជាក់ថា ការប្រកាសអំពីគម្រោងស្នើលើកលែងទោសទ្រង់ទ្រាយធំរបស់សម្តេចតេជោ ហ៊ុន សែន បានធ្វើឡើងបន្ទាប់ពីមានការដោះលែង អ្នកវិភាគនយោបាយ សកម្មជនដីធ្លី រួមទាំង អតីតអ្នកសារព័ត៌មាន ដែលត្រូវចាប់ខ្លួនក្នុងពេលប្រព្រឹត្តបទល្មើស កាលពីអំឡុងឆ្នាំ២០១៦ និង២០១៧ កន្លងទៅនេះ ជាបន្តបន្ទាប់ ក្រោយពេលបោះឆ្នោតជាតិជ្រើសតាំងតំណាងរាស្ត្រ អាណត្តិទី០៦៕
Home ព្រឹត្តិការណ៍ថ្មីៗ តើអតីតមន្ត្រីជាន់ខ្ពស់នៃអតីតគណបក្សសង្គ្រោះជាតិ អាចស្ថិតក្នុងចំណោមមនុស្សទាំង១២នាក់ដែល សម្តេចនាយករដ្ឋមន្ត្រី ហ៊ុន សែន គ្រោងស្នើលើកលែងទោសដែរឫយ៉ាងណា ?