នៅថ្ងៃទី០៥ ខែសីហា ឆ្នាំ២០១៨ ព្រឹកមិញនេះ រដ្ឋសភាកម្ពុជា បានបើកសម័យប្រជុំដំបូងនៃរដ្ឋសភានិតិកាលទី៦ ក្រោមព្រះរាជអធិបតីភាពរបស់ព្រះមហាក្សត្រព្រះបាទនរោត្តម សីហមុនី។
ការបើកសម័យប្រជុំរដ្ឋសភាលើកដំបូងរបស់កម្ពុជាអាណត្តិទី៦ នៅថ្ងៃទី៥ខែកញ្ញាឆ្នាំ២០១៨អង្គទូតជាង៣១រូបត្រូវបានអញ្ជើញឲ្យចូលរួម ដែលក្នុងនោះ០៩ រូប បានអវត្តមាន។
តំណាងទូតដែលមិនចូលគឺ អាមេរិក កាណាដា បារាំង អង់គ្លេស អាឡឺម៉ង់ អូស្ត្រាលី ស៊ុយអែត ប៊ុលហ្គារី និងទូតសហភាពអ៊ឺរ៉ុប។បើតាម លោក ឡេង ប៉េងឡុង តំណាងអង្គទូតនិងតំណាងស្ថាប័នអន្តរជាតិធំៗដែលមិនចូលរួមការប្រជុំសភានាថ្ងៃពុធនេះ មិនបានបញ្ជាក់ពីមូលហេតុនៃអវត្តមានរបស់ខ្លួនទេ ខណៈឯកអគ្គរដ្ឋទូតខ្លះកំពុងប្រជុំនៅក្រៅប្រទេស។
ជុំវិញបញ្ហានេះលោក ឡេង ប៉េងឡុង អគ្គលេខាធិការនៃអគ្គលេខាធិការដ្ឋានរដ្ឋសភា បានសម្តែងការសោកស្តាយដែលបណ្តាអង្គទូតលោកខាងលិចមួយចំនួន បានវាយតម្លៃខុសលើកម្ពុជា ជុំវិញការបោះឆ្នោតកន្លងមក ។ លទ្ធផលនៃការបោះឆ្នោត គឺគណបក្សប្រជាជនកម្ពុជាឈ្នះទាំង១២៥អាសនៈ។
«បើតាមខ្ញុំយល់លោកខាងបានវាយតម្លៃមិនបានត្រឹមត្រូវទេ ចំពោះស្ថានការណ៍កម្ពុជា ហើយបើសិនជាចង់ឲ្យកម្ពុជាធ្វើដូចលោកខាងលិច គឺថាមិនអាចធ្វើបានដូចភ្លាមៗបានទេ ពីព្រោះថាកម្ពុជាគ្មានប្រពៃណីដូចលោកខាងលិចទេ។ ដូច្នេះយើងខំអភិវឌ្ឍប្រជាធិបតេយ្យបានប៉ុណ្ណឹង [លោកខាងលិច] គួរតែអបអរ។ ដូច្នេះយើងមានការសោកស្ដាយដែរ ចំពោះការមិនចូលរួមរបស់ទូតទាំងនេះ»។ នេះជាការលើកឡើងរបស់លោក ឡេង ប៉េងឡុង។
គួរបញ្ជាក់ដែរថា ក្រោយពីរដ្ឋសភា បានប្រកាសសុពលភាពរួចមក តំណាងរាស្ត្រដែលជាប់ឆ្នោតពីខាងគណបក្សប្រជាជនកម្ពុជា ទាំង១២៥រូប បានចូលក្នុងព្រះបរមរាជវាំង នៅរសៀលថ្ងៃទី៥ កញ្ញានេះដើម្បីធ្វើពិធីសច្ចាប្រណិធាននៅចំពោះព្រះភក្ត្រមហាក្សត្រខ្មែរមុននឹងចាប់ផ្តើមបំពេញការងាររបស់ខ្លួន។ ដោយឡែកសម្រាប់ថ្ងៃបន្ទាប់វិញ ពោលគឺថ្ងៃទី០៦ ខែកញ្ញា រដ្ឋសភានឹងធ្វើការបោះឆ្នោតជ្រើសតាំងក្បាលម៉ាស៊ីនរដ្ឋសភារួមមាន៖ ប្រធាន អនុប្រធានរដ្ឋសភា ប្រធាន អនុប្រធានគណៈកម្មាធិការជំនាញនៃរដ្ឋសភា និងផ្តល់សេចក្តីទុកចិត្តចំពោះក្បាលម៉ាស៊ីនរាជរដ្ឋាភិបាលអាណត្តិថ្មី៕
Home ព្រឹត្តិការណ៍ថ្មីៗ លោក ឡេង ប៉េងឡុង អគ្គលេខាធិការនៃអគ្គលេខាធិការដ្ឋានរដ្ឋសភា សម្តែងការសោកស្តាយដែលអង្គទូត០៩ អវត្តមាន