យន្តហោះដែលអាចបើកនៅលើទឹកក៏បាន និងនៅលើគោកក៏បាន ដ៏ធំជាងគេបំផុតនៅលើពិភពលោករបស់ចិន AG600 បានបញ្ចប់ការសាកល្បងជើងហោះហើររបស់ខ្លួនប្រកបដោយជោគជ័យ ដោយបានហោះចេញពីទីក្រុង Zhuhai ស្ថិតនៅភាគខាងត្បូងខេត្តក្វាងដុង ឆ្ពោះទៅកាន់ទីក្រុង Jingmen នៅចំកណ្តាលនៃខេត្តហ៊ូបី។
បន្ថែមលើសនេះ យន្តហោះដ៏ធំមួយនេះ កំពុងតែត្រៀមខ្លួនសម្រាប់ការសាកល្បងហោះហើរនៅលើទឹកផងដែរ។ នេះបើតាមក្រុមហ៊ុនផលិតយន្តហោះនេះ ដែលបាននិយាយនៅថ្ងៃចន្ទនេះ។
ក្រុមហ៊ុនផលិតយន្តហោះនេះបាននិយាយថា យន្តហោះមួយនេះបានហោះរំលងលើខេត្តចំនួន ៣ គឺខេត្តខ្វាងដុង ហ៊ូណាន់ និងខេត្តហ៊ូបី។ ប៉ុន្តែទោះបីជាយ៉ាងណាក៏ដោយ ក៏ក្រុមហ៊ុនមិនទាន់បានបញ្ជាក់អំពីប្រត្តិការហោះនៅលើទឹកនោះទេ។ តាមពិតទៅ យន្តហោះមួយនេះ បានឆ្លងកាត់នូវការសាកល្បងរបស់ខ្លួនតាំងពីខែធ្នូមកម្ល៉េះ។
ក្រុមហ៊ុនសាជីវកម្មជើងហោះហើររបស់ចិនបាននិយាយកាលពីពាក់កណ្តាលខែឧសភាថា ចិនរំពឹងថានឹងចែកចាយយន្តហោះប្រភេទ AG600 ទៅឲ្យអតិថិជននៅឆ្នាំ ២០២២។ យន្តហោះប្រភេទនេះ គឺជាយន្តហោះដ៏ធំជាងគេបង្អស់មិនត្រឹមតែសម្រាប់ចិនតែប៉ុណ្ណោះទេ ប៉ុន្តែថែមទាំងធំជាងគេនៅលើពិភពលោកផងដែរ។
វាត្រុវបានរចនាឡើងសម្រាប់ពន្លត់អគ្គិភ័យ និងអនុវត្តន៍នូវប្រតិបត្តិការសង្គ្រោះនៅលើផ្ទៃទឹក។ បន្ថែមលើសនេះ AG600 ក៏អាចប្រើប្រាស់ឧបករណ៍បន្ថែម ដើម្បីឃ្លាំមើលលើបរិស្ថានផ្ទៃទឹក ចរាចរណ៍ដឹកទំនិញ និងដឹកអ្នកដំណើរ រួមទាំងការរុករករ៉ែកប់ក្រោមដីផងដែរ។ យន្តហោះនេះត្រូវបានបំពាក់ដោយម៉ាស៊ីនយន្តហោះហោះចំនួន ៤ និងបូមទឹកយកមកផ្ទុកលើតួខ្លួនរបស់វាបាន ១២តោនត្រឹមតែរយៈពេល ២០វិនាទីតែប៉ុណ្ណោះ។ យន្តហោះដែលអាចបើកនៅលើទឹក និងលើគោកបាននេះ បានប្រវែងទំហំស្លាប ៣៨,៨ម៉ែត្រ រកដោយម៉ាស៊ីន ៤។ ម៉ាស៊ីនទាំងនោះ គឺជាប្រភេទម៉ាស៊ីន WJ-6៕DNT-NEWS
