នាពេលកន្លងមក តារាសម្ដែងកញ្ញា ភីយ៉ា ឬ លី ឌីណា ធ្លាប់ត្រូវបានវិញ្ញាណចូលសណ្ឋិតម្ដងជា២ដងមកហើយ នៅពេលដែលនាងគ្រងឈុតបុរាណ ខណៈដែលលោករុន ណាកូ ម្ចាស់ពានតារាលេចធ្លោផ្នែកគ្រងឈុតបុរាណរបស់គ្រួសារតារាកម្ពុជាឯណេះវិញ ក៏ធ្លាប់មានអាការៈចម្លែកកើតឡើង ក្នុងពេលគ្រងឈុតព្រះបាទសុរិយវរ្ម័នទី២ កាលពីពេលឈ្នះពានផងដែរ។
យ៉ាងណាមិញ កាលពីថ្ងៃទី២៨ សីហា មុននេះ អ្នកទាំងពីរត្រូវបានវិញ្ញាណមករំខានព្រមគ្នា បន្ទាប់ពីអ្នកទាំងពីរត្រូវបានអ្នករៀបចំកម្មវិធី Star Award អោយគ្រងឈុតបុរាណទន្ទឹមគ្នា។ កញ្ញា ភីយ៉ា បានអះអាងថា គ្រាន់តែនាងគ្រងឈុតព្រះនាងឥន្ទ្រទេវីហើយភ្លាម រូបនាងចេះតែមានអ្វីម្យ៉ាងមកបញ្ជារាងកាយនាងអោយធ្វើសកម្មភាពប្លែកៗ និងអោយរាំជាច្រើនលើកមកហើយ ប៉ុន្តែបណ្ដាលមកពីនាងចេះតែបន់ និងចេះតែប្រឹងទប់អារម្មណ៍ ទើបអាការៈនោះមិនធ្វើឲ្យឆោរឡោក្នុងពេលដំបូងៗ។ យ៉ាងណាមិញ នៅពេលដែលនាងរៀបចូលថត ហើយកំពុងសេរេជាយសំពត់ស្រាប់តែវិញ្ញាណចម្លែកធ្វើអោយនាងបង្វិលខ្លួនរាំរែកទាល់តែបាន ដោយនាងមិនអាចបញ្ជារាងកាយរបស់ខ្លួនមិនបានតែម្ដង។
នាងត្រូវគេឃើញបង្ហាញទឹកមុខស្លេកស្លាំង និងភ័យយ៉ាងខ្លាំង បន្ទាប់ពីអ្នករៀបចំកម្មវិធី និងក្រុមការងារចាប់ដៃចាប់ជើង និងជួយបន់អោយនាងបានដឹងស្មារតីឡើងវិញ។ នាងថាខ្លួនតែងតែភ័យអោយតែគ្រងឈុតបុរាណ តែសម្រាប់សភាពលើកនេះ គឺនាងមានអារម្មណ៍ភិតភ័យជាងមុន ដោយសារតែតាំងពីតែងឈុតព្រះនាងឥន្ទ្រទេវីហើយភ្លាម ក៏ចង់តែអោយនាងលើកដៃរាំដូចអប្សរា ដល់ថ្នាក់នាងខំទប់ស្មារតី មិនហ៊ានទាំងផឹកទឹក និងញាំអី ដើម្បីកុំអោយភ្លេចខ្លួន ហើយបណ្ដោយវិញ្ញាណដែលសណ្ឋិតបញ្ជាខ្លួនបាន។
នាងថាក្រោយពេលគេចាប់អោយដឹងស្មារតី រូបនាងភ័យចង់ស្លន់តែម្ដង ដោយសារតែនាងខ្លាចមានអាការៈបែបនេះ ហើយថតមិនកើត។ ក្រឡេកទៅ លោករុន ណាកូ ឯណោះវិញ ក៏លោកកើតមានអាការៈស្រដៀងគ្នាផងដែរ ដោយលោកគ្រាន់តែគ្រងឈុតព្រះបាទសុរិយវរ្ម័នទី២ ហើយភ្លាម ក៏មានមានវិញ្ញាណចូលសណ្ឋិត បណ្ដាលអោយលោកបែកញើសធ្ងន់ក្បាល និយាយពាក្យប្លែកៗ និងមានសភាពលោតញាក់នូវសាច់ដុំលើរាងកាយ ដែលមិនខុសពីមានអ្វីមួយរត់ចុះរត់ឡើងពេញក្នុងសាច់។
លោកត្រូវបានធ្វើស្រាលក្រោយអុជធូបបន់ស្រន់ តែក៏ចំណាយពេលច្រើនដែរ ទម្រាំបាត់អាការៈឈឺក្បាល ថប់ដង្ហើម និងញាក់សាច់សព្វកន្លែង ដែលសូម្បីតែអ្នកឃើញផ្ទាល់ក៏ចង់ភ័យជំនួស។ យ៉ាងណាមិញ លោកថា មិនមែនជាលើកទី២នោះទេ ដ្បិតកាលពីពេលដែលលោក គ្រងឈុតមួយនេះ ប្រលងក្នុងព្រឹត្តិការណ៍ប្រជែងពានរបស់គ្រួសារតារាកម្ពុជា ក៏មានអាការៈបែបនេះម្ដងដែរ ដោយគ្រាន់តែសភាពម្ដងនេះរាងធ្វើអោយលោកភិតភ័យជាងមុន ដោយសារតែលោកមានការនិយាយប្លែកៗ និងមានអ្វីម្យ៉ាងរត់ពេញក្នុងសាច់ ធ្វើអោយសាច់របស់លោកលោតគ្រប់កន្លែង គ្រាន់តែគិតក៏ព្រឺខ្លួន៕
