សារព័ត៌មានរបស់សហរដ្ឋអាមេរិក Business Insider បានចេញផ្សាយនៅថ្ងៃទី២៩ សីហានេះថា រុស្ស៊ីបានបញ្ជូនក្រុមនាវាចម្បាំងរបស់ខ្លួនជាច្រើនបន្ថែមទៀតទៅកាន់ប្រទេសស៊ីរី ដើម្បីត្រៀមខ្លួនសម្រាប់ការប្រយុទ្ធទប់ទល់ទៅនឹងសហរដ្ឋអាមេរិក ដែលនឹងបើកការវាយប្រហារមកលើសម្ព័ន្ធមិត្តរបស់ខ្លួន ក្នុងពេលឆាប់ៗខាងមុខនេះ។
ការត្រៀមខ្លួនវាយប្រយុទ្ធទប់ទប់ទៅនឹងការវាយប្រហារពីសំណាក់អាមេរិកមកលើសម្ព័ន្ធមិត្តរបស់ខ្លួននេះ បានធ្វើឡើងក្រោយការព្រមានពីសំណាក់ទីប្រឹក្សាសន្តិជាតិអាមេរិក ដែលបានគម្រាមថា អាមេរិកនឹងធ្វើការឆ្លើយតបទៅនឹងការប្រើការវុធគីមីរបស់អាសាដ នៅខេត្តអ៊ីតលីបឲ្យកាន់តែខ្លាំងជាងការវាយប្រហារលើកមុនទៅទៀត។ កាលពី ២ថ្ងៃមុននេះ រុស្ស៊ីបានបញ្ជូននាវាពិឃាតរបស់ខ្លួនចំនួន ២គ្រឿងទៅកាន់សមុទ្រមេឌីទែរ៉ាណេ ឆ្ពោះទៅកាន់ប្រទេសស៊ីរី។
អ្នកនាំពាក្យក្រសួងការពារជាតិរុស្ស៊ី លោក Igor Konashenkov បាននិយាយកាលពីម្សិលមិញថា សហរដ្ឋអាមេរិកបានពង្រឹងកម្លាំងទ័ពជើងទឹកនៅតំបន់មេឌីទែរ៉ាណេ ហើយកំពុងតែត្រៀមបង្កហេតុដោយប្រើអាវុធគីមី ដើម្បីធ្វើជាលេសបើកការវាយប្រហារមកលើស៊ីរីហើយ។
ផ្ទុយពីការចោទប្រកាន់បែបនេះ សារព័ត៌មាន CNN បានរាយការណ៍កាលពីថ្ងៃអង្គារម្សិលមិញនេះថា មន្ទីរបញ្ចកោណកាលពីថ្ងៃអង្គារបានបដិសេធចំពោះការពង្រឹងកម្លាំងទ័ពជើងទឹកនៅក្នុងតំបន់សមុទ្រមេឌីទែរ៉ាណេ ដោយបាននិយាយថា គ្មានអ្វីក្រៅតែពីការឃោសនារបស់រុស្ស៊ីនោះទេ។
ក្រុមអ្នកឃ្លាំមើលបានលើកឡើងថា រុស្ស៊ីអាចមាននាវាចម្បាំងរហូតដល់ទៅ ១៣គ្រឿងឯណោះ រួមទាំងនាវាមុជទឹករបស់ខ្លួនផង ដែលកំពុងតែធ្វើដំណើរទៅជួយស៊ីរី។
ក្រុមអ្នកស៊ើបអង្កេតអន្តរជាតិបានភ្ជាប់រដ្ឋាភិបាលស៊ីរីទៅនឹងការវាយប្រហារគីមីជាង ១០០ដង ចាប់តាំងពីការចាប់ផ្តើមនៃសង្គ្រាមស៊ីវិលរបស់ស៊ីរីមក ហើយប្រទេសរុស្ស៊ីបានធ្វើការប្រឌិតអំពីការវាយប្រហារដោយប្រើអាវុធគីមីពីសំណាក់កងកម្លាំងអាសាដ។
លោក Omar Lamrani អ្នកវិភាគយោធានៅក្រុមហ៊ុនពិគ្រោះយោបល់ភូមិសាស្ត្រនយោបាយ Stratfor បានប្រាប់សារព័ត៌មាន Business Insider របស់អាមេរិកថា ទោះបីជារុស្ស៊ីបានបញ្ជូនក្រុមកងនាវាចម្បាំងយ៉ាងសម្បើមទៅកាពាររដ្ឋាភិបាលអាសាដយ៉ាងណាក៏ដោយ ក៏រុស្ស៊ីមិនអាចបញ្ឈប់ការវាយប្រហាររបស់អាមេរិកបាននោះដែរ។
លោក Lamrani បាននិយាយថា «តាមរូបសណ្ឋាន រុស្ស៊ីពិតជាមិនអាចធ្វើអ្វីបាន ដើម្បីបញ្ឈប់ការវាយប្រហារនោះបានទេ។ បើសិនជាសហរដ្ឋអាមេរិកចូលមក ហើយបាញ់គ្រាប់មីស៊ីលដូចការវាយប្រហារលើកមុន ៗ រុស្ស៊ីត្រូវតែធ្វើការការពារខ្លួន ប៉ុន្តែនៅតែមិនអាចបាញ់ទម្លាក់គ្រាប់មីស៊ីលទាំងនោះបានទាំងអស់នោះទេ ហើយនឹងប្រឈមនឹងគ្រោះហានិភ័យជាមួយអាមេរិក ដែលអាចនឹងធ្វើឲ្យអាមេរិកបើកការវាយប្រហារទៅលើពួកគេតែម្តង»។
លោក Lamrani បាននិយាយថា នៅក្នុងការវាយប្រហារមុន ៗ របស់សហរដ្ឋអាមេរិក នៅក្នុងប្រទេសស៊ីរី អាមេរិកព្យាយាមវាយប្រហារ ដោយមិនឲ្យប៉ះពាល់ទៅលើកងទ័ពរុស្ស៊ី គឺដើម្បីកុំឲ្យជម្លោះរាលដាលកាន់តែធំ មិនមែនដោយសារតែអាមេរិកមិនអាចកម្ទេចនាវាចម្បាំងរបស់រុស្ស៊ីនោះទេ។ ពួកគេអាចកម្ទេចនាវាចម្បាំងរុស្ស៊ីបាន ប្រសិនបើពួកគេចង់ ប៉ុន្តែអាមេរិកមិនឲ្យសង្គ្រាមលោកលើកទី៣ ផ្ទុះឡើងដោយសារតែរឿងស៊ីរីនោះទេ។ លោកបន្តថា «និយាយដោយស្មោះទៅ អាមេរិកពិតជាមានឥទ្ធិពលដ៏ខ្លាំងក្លានៅក្នុងតំបន់មេឌីទែរ៉ាណេ រុស្ស៊ីមិនមានអ្វីជាដុំកំភួននោះទេ»។
លោកនិយាយថា «ប្រសិនបើនាវាចម្បាំងរបស់រុស្ស៊ីផ្ទុះសង្គ្រាមជាមួយអាមេរិក នោះអាមេរិកនឹងប្រើកម្លាំងទ័ពអាកាសដ៏ខ្លាំងក្លាបំផុត កាច់បំបាក់រុស្ស៊ីនៅក្នុងតំបន់នេះតែម្តង ហើយកងនាវាចម្បាំងរបស់រុស្ស៊ីដែលមានចំនួនបន្តិចបន្តួចនឹងក្លាយទៅជាផេះ ក្នុងពេលតែមួយប៉ព្រិចភ្នែក»។
ដើម្បីសម្រួលដល់ស្ថានការណ៍ដ៏ក្តៅគគុកនេះ ទោះជាយ៉ាងណាក៏ដោយ សហរដ្ឋអាមេរិកទំនងជានឹងជៀសវាងការវាយប្រហារទៅលើគោលដៅសំខាន់បំផុត ជាពិសេសនោះគឺវត្តមានទ័ពរុស្ស៊ីនេះឯង៕DNT-NEWS
Home ព្រឹត្តិការណ៍ថ្មីៗ រុស្ស៊ីបញ្ជូនក្រុមនាវាចម្បាំងជាច្រើនបន្ថែមទៀត ទៅកាន់ប្រទេសស៊ីរី ដើម្បីត្រៀមប្រយុទ្ធជាមួយអាមេរិក