កាលពីព្រឹកមិញនេះសម្តេច ហ៊ុន សែន បានប្រកាសថា នឹងគ្មានការដោះលែងលោក កឹម សុខា អតីតប្រធាន នៃអតីតគណបក្សសង្គ្រោះជាតិ ពីពន្ធនាគារត្រពាំងផ្លុងនៅថ្ងៃទី៣០ ខែសីហា ឆ្នាំ២០១៨ស្អែកនេះនោះឡើយ។ ការបញ្ជាក់របស់សម្តេច ហ៊ុន សែន បានធ្វើឡើងបន្ទាប់ពីមានការសង្ស័យ និងពាក្យចចាមអារ៉ាមមួយចំនួនថា អាចនឹងមានការដោះលែងលោក កឹម សុខា នៅថ្ងៃស្អែកនេះ។
ថ្លែងក្នុងពិធីសំណេះសំណាលជាមួយកម្មករ-កម្មការិនី ក្នុងខណ្ឌពោធិ៍សែនជ័យ នៅព្រឹកថ្ងៃទី២៩ ខែសីហា ឆ្នាំ២០១៨នេះ ប្រមុខរដ្ឋាភិបាល បានបកស្រាយថា លោក កឹម សុខា មិនទាន់ត្រូវបានកាត់ក្តីឲ្យក្លាយជាអ្នកទោស (ទណ្ឌិត) នោះទេ ដូច្នេះពុំអាចមានការស្នើឲ្យលើកលែងទោសឡើយ។ ចំណែកការដកបទចោទចេញពីអតីតប្រធានគណបក្សប្រឆាំងរូបនេះ ក៏សម្តេច អះអាងថា មិនអាចទៅរួចដែរ ព្រោះបានប្រព្រឹត្តអំពើក្បត់ជាតិ។
សម្តេចបានសង្កត់ធ្ងន់ទៀតថា ទោសក្បត់ជាតិរបស់លោក កឹម សុខា គឺជាទោសមួយធ្ងន់ធ្ងរមិនអាចលើកលែងបាននោះឡើយ។ «នរណាដោះលែង? នរណាដោះលែង? បើគេមិនទាន់កាត់ទោសផង មានទោសឯណាសម្រាប់លើកឲ្យវា។ ឯលើកលែងការចោទប្រកាន់អត់ទេ នរណាជាអ្នកលើកលែង? រឿងនេះក្តីក្តាំក្នុងទោសក្បត់ជាតិ នរណាលើកលែង? ក្នុងឋានៈខ្ញុំជារាជរដ្ឋាភិបាល ខ្ញុំនៅតែបន្តប្តឹងដាច់ខាត»។
ទន្ទឹមនឹងការបញ្ជាក់ថា គ្មានការដោះលែងលោក កឹម សុខា ហើយនោះ សម្តេច ហ៊ុន សែន ក៏បានបញ្ជាទៅកងកម្លាំងនគរបាលខេត្តត្បូងឃ្មុំ ឲ្យចាត់វិធានការលើឈ្មោះ ណុប ប៊ុនហូរ ផងដែរ។ ជននេះត្រូវបានសម្តេចតេជោ អះអាងថា ជាមេចលនាបំផុសប្រជាពលរដ្ឋឲ្យទៅរង់ចាំទទួលលោក កឹម សុខា ពីពន្ធនាគារ។
សូមបញ្ជាក់ថា លោក គី ឫទ្ធី ចៅក្រមស៊ើបសួរសាលាដំបូងរាជធានីភ្នំពេញ បានអញ្ជើញលោក ផែង ហេង ដែលជាមេធាវីការពារសិទ្ធិឱ្យលោក កឹម សុខា ចូលរួមក្នុងនីតិវិធីស្តីពីការពន្យារពេលឃុំខ្លួនបណ្តោះអាសន្នពីដំណើររឿងសន្និដ្ឋិភាពជាមួយបរទេស នៅព្រឹកថ្ងៃទី៣០ ខែសីហា ឆ្នាំ២០១៨ ស្អែកនេះ នៅបន្ទប់សាកសួរនៃមណ្ឌលអប់រំកែប្រែទី៣ "ម៣ ខេត្តត្បូងឃ្មុំ" (ពន្ធនាគារត្រពាំងផ្លុង)៕
Home ព្រឹត្តិការណ៍ថ្មីៗ សម្តេច ហ៊ុន សែន៖ ទោសក្បត់ជាតិរបស់លោក កឹម សុខា គឺជាទោសមួយធ្ងន់ធ្ងរមិនអាចលើកលែងបាននោះឡើយ