យ៉ាងហោចណាស់មានមនុស្ស ៨៣២នាក់បានបាត់បង់អាយុជីវិត នៅក្នុងទីក្រុងប៉ាលូប្រទេសឥណ្ឌូនេស៊ី បន្ទាប់ពីរលកយក្សស៊ូណាមិ និងគ្រោះរញ្ជួយដី បានវាយប្រហារទៅលើទីក្រុងនេះ កាលពីថ្ងៃសុក្រ។ ចំនួនមនុស្សស្លាប់ដោយគ្រោះធម្មជាតិទាំងនេះ ត្រូវបានគេរំពឹងថា នឹងមានការកើនឡើងកាន់ខ្លាំង បន្ទាប់ពីក្រុមអ្នកជួយសង្គ្រោះ និងកងកម្លាំងឥណ្ឌូនេស៊ីត្រូវបានដាក់ពង្រាយ។
អាជ្ញាធរឥណ្ឌូនេស៊ីបាននិយាយថា ពួកគេនឹងបញ្ចុះសពជនរងគ្រោះទាំងនោះ នៅក្នុងផ្នូរដ៏ធំ ដោយសារមានការព្រួយបារម្ភអំពីការរាលដាលនៃជំងឺ។ ជាមួយនឹងការរុករកនេះ មនុស្សជាច្រើនកំពុងតែស្ថិតនៅក្នុងកម្ទេចបាក់បែកនៃសំណង់អគារ ដែលដួលរលំដោយសារគ្រោះរញ្ជួយដី។
នៅក្នុងទីក្រុងប៉ាលូ ក្រុមអ្នកសង្គ្រោះកំពុងតែរងចាំនូវគ្រឿងចក្រធុនធ្ងន់ ដើម្បីធ្វើការរុករកទៅលើកម្ទេចបាក់បែក នៃអគារ និងមជ្ឈមណ្ឌលទំនិញមួយ បន្ទាប់ពីមានគ្រោះរញ្ជួយដីដ៏ខ្លាំង បានបង្ឃាំងពួកគេ។
សេចក្តីប្រកាសអាសន្នមួយអំពីរលកស៊ូណាមិ ត្រូវបានធ្វើឡើងបន្ទាប់ពីគ្រោះរញ្ជួយដី ៧,៥រិចទ័រ បានវាយប្រហារកាលពីថ្ងៃសុក្រ ប៉ុន្តែគេមិនបានបញ្ជាក់អំពីទីកន្លែងណា ដែលរលកស៊ូណាមិនឹងត្រូវវាយប្រហារនោះទេ។
វីដេអូបានបង្ហាញអំពីការស្រែកស្លន់ស្លោ ខណៈដែលរលក ៦ម៉ែត្របានបោកបក់យ៉ាងខ្លាំងទៅលើទីតាំង ដែលពួកគេបានជួបជុំគ្នាធ្វើពិធីបុណ្យមួយ។
ជាមួយគ្នានេះ ប្រធានាធិបតីឥណ្ឌូនេស៊ី លោក Joko Widodo បានធ្វើដំណើរទៅកាន់តំបន់ដែលរកគ្រោះទាំងយប់ទាំងថ្ងៃ ដើម្បីជម្រុញដល់ប្រតិបត្តិការនៃការរុករកនោះ។ នៅក្នុងប្រតិបត្តិការនេះពិតជាមានភាពលំបាកខ្លាំងណាស់។ ផ្លូវត្រូវបានកាត់ផ្តាច់ ហើយទំនាក់ទំនងមានភាពពិបាកក្នុងការប្រស្រ័យទាក់ទងទៅកាន់តំបន់ដាច់ស្រយាល។
របាយការណ៍ប្រព័ន្ធផ្សព្វផ្សាយក្នុងស្រុកបានឱ្យដឹងថាសញ្ញាទូរស័ព្ទចល័តត្រូវបានរកឃើញក្នុងគំនរបាក់បែកនៅផ្សារទំនើប Palu ហើយគេបានលឺសូរសម្រែកចេញពីគំនរបាក់បែកនៃសណ្ធាគារ Roa Roa។
អ្នកស្ម័គ្រចិត្តម្នាក់ឈ្មោះ Thalib Bawano បានប្រាប់ទីភ្នាក់ងារព័ត៌មាន AFP ថា មនុស្ស ៣នាក់ត្រូវបានគេជួយសង្គ្រោះចេញពីកន្លែងកម្ទេចគំនរសណ្ឋាគារ ហើយអាចមានមនុស្សជាង ៥០នាក់ផ្សេងទៀតកំពុងតែស្ថិតនៅក្រោមគំនរបាក់បែកនោះ។ លោកថា សម្លេងដែលគេឭសូរសម្លេងចេញពីគំនរនោះ ក៏មានក្មេងផងដែរ៕DNT-NEWS
Home ព្រឹត្តិការណ៍ថ្មីៗ ឥណ្ឌូនេស៊ីកំពុងជួបទុក្ខធំពី រលកយក្សស៊ូណាមិ និងគ្រោះរញ្ជួយដី ខណៈដែលមនុស្ស ៨៣២នាក់បាត់បង់អាយុជីវិត