កាលពីពេលថ្មីៗនេះ ក្រសួងមហាផ្ទៃ បានធ្វើការបដិសេធថា ក្រសួងពុំបានសិក្សាបង្កើតខេត្តថ្មី ដល់ទៅ៧បន្ថែមទៀតដូចពាក្យចចាមអារ៉ាម និងព័ត៌មានដែលបានចែកចាយ ព្រមទាំងផ្សាយបន្តគ្នា តាមបណ្ដាញសង្គមនោះទេ។ លោក ប្រាក់ សំអឿន អគ្គនាយកដ្ឋានរដ្ឋបាលនៃក្រសួងមហាផ្ទៃ បានឲ្យដឹងនារសៀលថ្ងៃទី៤ ខែកញ្ញានេះថា ព័ត៌មានដែលថា មានបង្កើតខេត្តថ្មីដល់ទៅ៧បន្ថែមទៀតនោះ ជាព័ត៌មានមិនពិត ជាព័ត៌មានបំប៉ោងធ្វើឲ្យសាធារណៈជនទូទៅមានការយល់ច្រឡំមកលើ រាជរដ្ឋាភិបាល។
លោក ប្រាក់ សំអឿន បានសង្កត់ធ្ងន់ថា ក្រសួងមហាផ្ទៃ បានស្នើសុំគោលការអនុញ្ញាតពីសម្តេចនាយករដ្ឋមន្ត្រី ហ៊ុន សែន ក្នុងការសិក្សាលទ្ធភាពបង្កើតខេត្តចំនួនពីរប៉ុណ្ណោះ។ គួរបញ្ជាក់ដែរថា កាលពីថ្ងៃទី២៨ ខែសីហា ឆ្នាំ២០១៨ សម្ដេចនាយករដ្ឋមន្ត្រី ហ៊ុន សែន បានចារយល់ព្រមតាមសំណើររបស់ក្រសួងមហាផ្ទៃ ដែលបានស្នើសិក្សាលទ្ធភាពបង្កើតខេត្តថ្មី ចំនួន២ ដើម្បីជួយលើកកម្ពស់ប្រសិទ្ធភាពនៃការគ្រប់គ្រងរដ្ឋបាល ការថែរក្សាសន្ដិសុខសណ្ដាប់ធ្នាប់សាធារណៈ ការជំរុញអភិវឌ្ឍនៅមូលដ្ឋាន និងការផ្ដល់សេវាសាធារណៈជូនប្រជាពលរដ្ឋ។ ខេត្តថ្មីទីមួយ គឺបំបែកចេញពីខេត្តកណ្ដាល ចំណែកខេត្តថ្មីទីពីរ គឺដោយពិនិត្យលើកត្ដាភូមិសាស្ត្រ និងប្រជាសាស្ដ្ររបស់ស្រុកកោះញែក នៃខេត្តមណ្ឌលគិរី និងស្រុកលំផាត់ នៃខេត្តរតនគិរី៕