សារព័ត៌មាន News Week បានចេញផ្សាយនៅថ្ងៃទី៥ កញ្ញា ២០១៨នេះថា រុស្ស៊ីបានបង្ហាញផែនការធ្វើសមយុទ្ធទ្រង់ទ្រាយធំរបស់ខ្លួនមិនធ្លាប់មាន នៅក្នុងប្រវត្តិសាស្ត្រពិភពលោក ដែលសមយុទ្ធមហាសម្បើមរបស់មហាយក្សនុយក្លេអ៊ែរមួយនេះ នឹងចាប់ផ្តើមនៅសប្តាហ៍ក្រោយ ខណៈដែលរុស្ស៊ីកំពុងតែមានភាពតានតឹងកាន់តែខ្លាំងជាមួយសហរដ្ឋអាមេរិក ជាពិសេសក្នុងសំណុំរឿងស៊ីរី ដែលប្រទេសនេះកំពុងតែប្រឈមមុខដាក់គ្នាជាមួយអាមេរិក។
នៅក្នុងអំឡុងពេលសន្និសីទមួយកាលពីថ្ងៃអង្គារ រដ្ឋមន្ត្រីការពារជាតិរុស្ស៊ីលោក Sergei Shoigu បាននិយាយថា ដំណាក់កាលសកម្មនៃសមយុទ្ធរួម Vostok (ខាងកើត) ឆ្នាំ ២០១៨ នឹងប្រព្រឹត្តទៅចាប់ពីថ្ងៃទី ១១ ដល់ថ្ងៃទី ១៧ ខែកញ្ញា នៅលើតំបន់សាកល្បងចំនួនប្រាំបី និងសមុទ្របី។
លោកបាននិយាយថា ការពិនិត្យមើលការត្រៀមលក្ខណៈបានចាប់ផ្តើមរួចរាល់ហើយសម្រាប់ស្រុកយោធាខាងកើត យោធាកណ្តាល និងកងនាវាចម្បាំងនៅភាគខាងជើង កងទ័ពអាកាស និងយន្តហោះដឹកជញ្ជូនយោធាដ៏ធំ នឹងចាប់ផ្តើមធ្វើសមយុទ្ធដ៏ធំមិនធ្លាប់មាននេះ។
ទីភ្នាក់ងារសារព័ត៌មានរដ្ឋរុស្ស៊ី Tass បានស្រង់សម្តីលោករដ្ឋមន្ត្រីការពារជាតិរុស្ស៊ី Shoigu ដោយបាននិយាយថា «ការចូលរួមក្នុងការធ្វើសមយុទ្ធនោះ នឹងមានកងទ័ពប្រហែល ៣០ម៉ឺននាក់ យន្តហោះជាង ១ពាន់គ្រឿង ឧទ្ធម្ភាគចក្រ និងយន្តហោះគ្មានមនុស្សបើកយ៉ាងសម្បើម នាវាចម្បាំង ៨០គ្រឿង និងនាវាផ្ទុកយានចម្បាំងចម្បាំង និងគ្រឿងសព្វាវុធជាច្រើនផ្សេងទៀត»។ កងទ័ពរុស្ស៊ីនឹងត្រូវចូលរួមដោយកងកម្លាំងចិន និងម៉ុងហ្គោល ដើម្បីបង្ហាញថា ទីក្រុងមូស្គូមិនមែនមានតែម្នាក់ឯងនោះទេ។
ថ្មីៗកន្លងទៅនេះ រុស្ស៊ីបានចាប់ផ្តើមធ្វើសមយុទ្ធផ្ទួនរួចទៅហើយ ស្របពេលដែលមានភាពតានតឹងជាមួយសហរដ្ឋអាមេរិក និងអង្គការណាតូ។ កាលពីសប្តាហ៍មុនសារព័ត៌មានញូស៍វីបានផ្សាយថា រុស្ស៊ីបានដឹកនាំក្បួនសមយុទ្ធជាមួយចិន និងមុនហ្គោលយ៉ាងសម្បើម ប៉ុន្តែមិនត្រូវបានបង្ហាញចំនួនជាក់លាក់នោះទេ។ ដោយឡែក នៅសមុទ្រមេឌីទែរ៉ាណេវិញ ស្របពេលដែលមានភាពតានតឹង ក្រោយការព្រមានពីសណាក់សហរដ្ឋអាមេរិកថា ខ្លួននឹងបើកការវាយប្រហារ រុស្ស៊ីបានដឹកនាំកងនាវាចម្បាំងរបស់ខ្លួនយ៉ាងឱឡារិកធ្វើសមយុទ្ធទ្រង់ទ្រាយធំ៕DNT-NEWS
