កាលពីពេលកន្លងទៅនេះ សារព័ត៌មាន Daily Star របស់ចក្រភពអង់គ្លេស បានចុះផ្សាយថា ជើងហោះហើរ MH370 អាចធ្លាក់នៅក្នុងព្រៃជ្រៅមួយកន្លែងរបស់ប្រទេសកម្ពុជា ដែលនាំឱ្យប្រជាជនខ្មែរមួយចំនួន មានការភ្ញាក់ផ្អើលយ៉ាងខ្លាំង។ ការចុះផ្សាយបែបនេះ គឺដកស្រង់សម្ដីពីបុរសម្នាក់ឈ្មោះ Ian Wilson ដែលជាអ្នកជំនាញបច្ចេកវិទ្យា ដោយសារលោកប្រើបច្ចេកវិទ្យា Google Maps និង Google Earth។
ជុំវិញបញ្ហានេះលោក កែវ ស៊ីវន អគ្គនាយកអាកាសចរណ៍ស៊ីវិលកម្ពុជា បានធ្វើការបដិសេធចំពោះការលើកឡើងមួយដែលថា នៅលើ Google Maps មានឃើញយន្តហោះ MH370 របស់ម៉ាឡេស៊ី ដែលផ្ទុកមនុស្ស២៣៩នាក់ បានធ្លាក់ចូលទៅក្នុងព្រៃជ្រៅមួយក្នុងប្រទេសកម្ពុជា គឺជាព័ត៍មានមិនពិតនោះទេ។ ប្រសិនបើនេះជារឿងពិត ទោះ MH370 ធ្លាក់នៅកន្លែងណាក៏ដោយនៅក្នុងប្រទេសកម្ពុជា នោះអាកាសចរណ៍ស៊ីវិលកម្ពុជានឹងរុករកឃើញមិនខាន។ ប៉ុន្តែយ៉ាងណាមិញ វាគ្រាន់តែជាព័ត៌មានប្រឌិតតែប៉ុណ្ណោះ។ “អត់មានទេ តាម Google Maps ចេះតែថា ព្រៃស្រុកខ្មែរកន្លែងណាដែលមនុស្សអត់ទៅដល់ យន្តហោះធំប៉ុណ្ណាប៉ុណ្ណី ដូចអត់មានទទួលព័ត៍មាននេះទេ បើសិនជាមានយន្តហោះយើងហោះពេញទឹកពេញដី ហើយវាមិនដែលមានព្រៃណាដែលយើងទៅអត់ដល់”។
គួរបញ្ជាក់កាលពីពេលកន្លងទៅនេះ បើតាមសារព័ត៌មានដែលមានប្រភពនៅអង់គ្លេស Daily Star បានចុះផ្សាយតាមសម្ដីរបស់លោក Ian Wilson ថា បំណែកយន្តហោះដែលសង្ស័យថាជារបស់ MH370 ត្រូវបានគេប្រើបច្ចេកវិទ្យា Google Maps និង Google Earth រកឃើញនៅលើតំបន់ព្រៃជ្រៅមួយ ស្ថិតក្នុងប្រទេសកម្ពុជា។
លោក Ian Wilson ថែមទាំងបញ្ជាក់ទៀតថា បំណែកនោះមានប្រវែងប្រហែល 70ម៉ែត្រ ស្របពេលដែល MH370 មានប្រវែងត្រឹម 63,5ម៉ែត្រប៉ុណ្ណោះ។ទោះមានប្រវែងលើសបែបនេះក្ដី លោក Ian Wilson បានលើកឡើងថា វាអាចជាបំណែកដែលបែកបាក់ពូតួខ្លួន និងកន្ទុយរបស់យន្តហោះ។ ការចុះផ្សាយព័ត៌មានដ៏កក្រើកជាថ្មីនេះ មានទាំងរូបភាពពីការថតដោយ Google Maps និង Google Earth មកជាមួយផង។ បន្ទាប់ពីមានការចុះផ្សាយខាងលើ ប្រជាជនខ្មែរមួយចំនួន ដែលបានឃើញ មានការភ្ញាក់ផ្អើលយ៉ាងខ្លាំង ព្រោះយន្តហោះនេះបាត់ខ្លួនអស់ច្រើនឆ្នាំមកហើយ៕DNT-NEWS
