(ទីក្រុងតេរ៉ាង់)៖ ប្រធានាធិបតីអ៊ីរ៉ង់ រុស្ស៊ី និងតួកគីនឹងប្រជុំគ្នានៅថ្ងៃសុក្រនេះ នៅក្នុងទីក្រុងតេរ៉ង់ ដើម្បីធ្វើការពិភាក្សាអំពីសង្គ្រាមនៅក្នុងប្រទេសស៊ីរី ដែលត្រូវបានគេមើលឃើញថា អាចនឹងមានការបើកការវាយលុកថ្មីមួយទៅលើមូលដ្ឋានទ័ពចុងក្រោយបង្អស់របស់ក្រុមឧទ្ទាម។ ជំនួបកំពូលរវាងមេដឹកនាំទាំងបីនេះអាចកំណត់ថា តើត្រូវព្យួសកម្មភាពការទូត ឬសកម្មភាពយោធាណាមួយ។
ប៉ុន្តែយ៉ាងណាក៏ដោយ ប្រទេសទាំងបីនេះ មានផលប្រយោជន៍រៀងៗខ្លួនពីស៊ីរី។ អ៊ីរ៉ង់ចង់ដាក់ទ័ពរបស់ខ្លួននៅក្នុងទឹកដីស៊ីរី និងលីបង់ ដែលស្ថិតនៅក្បែរខាងប្រទេសគូសត្រូវរបស់ខ្លួន គឺអ៊ីស្រាអែល។ ចំណែកតួកគីវិញ ដែលស្ថិតនៅពីក្រោយខ្នងរបស់ក្រុមបះបោរប្រឆាំងទៅនឹងរដ្ឋាភិបាលអាសាដ មានការភ័យខ្លាចថា នឹងមានបន្ទុកជនភៀសខ្លួនដ៏ធ្ងន់ធ្ងរពីប្រទេសស៊ីរី។ ចំណែកប្រទេសបងធំនុយក្លេអ៊ែរពិឃាតិពិភពលោករុស្ស៊ីវិញ ចង់រក្សាវត្តមានទ័ពរបស់ខ្លួន នៅក្នុងតំបន់ ដើម្បីមានឥទ្ធិពលប្រជែងទៅនឹងសហរដ្ឋអាមេរិក។
មន្ត្រីទីប្រឹក្សាជាន់ខ្ពស់របស់លោកអឺដូហ្កាន់ប្រធានាធិបតីតួកគីបាននិយាយថា ១ជំនួបកំពូលទីក្រុងតេរ៉ង់អាចបង្កើតនូវសន្តិភាព និងការផ្សះផ្សានៅក្នុងប្រទេសស៊ីរី ឬ វាអាចធ្វើឱ្យកាន់តែជ្រួលច្របល់ដែលបង្កឡើងដោយការឈ្លានពានឥតឈប់ឈរ បង្កឡើងដោយរបបលោកអាសាដ។
សម្រាប់ប្រទេសរុស្ស៊ី និងអ៊ីរ៉ង់សម្ព័ន្ធមិត្តរបស់រដ្ឋាភិបាលស៊ីរីវិញ ខេត្ត Idlib គឺមានសារៈសំខាន់ខ្លាំងណាស់ ក្នុងការបញ្ចប់នូវអ្វីដែលពួកគេមើលឃើញថា ជាជ័យជម្នះយោធានៅក្នុងសង្គ្រាមស៊ីវិលរបស់ប្រទេសស៊ីរី បន្ទាប់ពីកងទ័ពស៊ីរីបានចាប់យកក្រុងសំខាន់ៗ និងទីក្រុងធំ ៗ ទាំងអស់ ដែលភាគច្រើនជាជម្រករបស់ក្រុមបះបោរប្រឆាំងរដ្ឋាភិបាល។
អតីតអ្នកការទូតអ៊ីរ៉ង់ លោក Ali Akbar Farazi បានប្រាប់សារព័ត៌មាន IRNA ថា កិច្ចប្រជុំកំពូលនេះបង្ហាញថា ការដោះស្រាយបញ្ហាក្នុងតំបន់តាមរបៀបត្រឹមត្រូវដែលត្រូវបានឯកភាពពីភាគីទាំងអស់ នៅតែមានសារៈសំខាន់សម្រាប់ប្រទេសទាំងបី៕
Home ព្រឹត្តិការណ៍ថ្មីៗ តើជំនួបកំពូលស៊ីរី នៅប្រទេសអ៊ីរ៉ង់អាចបញ្ចប់សមរភូមិសង្គ្រាមនៅប្រទេសស៊ីរីបានដែរឬទេ?