មនុស្សជាង ១ពាន់នាក់ត្រូវបានចាប់ខ្លួន នៅក្នុងបាតុកម្មមួយដែលប្រឆាំងទៅនឹងការបង្កើនអាយុចូលនិវត្តន៍។ រូបភាពបានបង្ហាញថា មន្ត្រីកងកម្លាំងប៉ូលិសបានប្រើកម្លាំងវាយបំបែកការប្រមូលផ្តុំរបស់ក្រុមបាតុករតាមរូបភាពវាយនឹងខែល និងការអូសទាញក្រុមបាតុករទាំងនោះ។ យ៉ាងហោចណាស់មានមនុស្ស ១ពាន់ ១៨នាក់ត្រូវបានចាប់ខ្លួននៅក្នុងបាតុកម្មមួយកាលពីថ្ងៃអាទិត្យ។
យោងតាមសារព័ត៌មាន Business Insider បានឲ្យដឹងថា ការតវ៉ានេះបានធ្វើឡើងបន្ទាប់ពីការសម្រេចចិត្តរបស់ប្រធានាធិបតីរុស្ស៊ី លោកវ្ល៉ាឌីមៀ ពូទីន ក្នុងការបង្កើនអាយុចូលនិវត្តន៍របស់មន្ត្រីរុស្ស៊ី ដែលញ៉ាំងឲ្យមានការរិះគន់ និងការផ្ទុះកំហឹងយ៉ាងខ្លាំង។ នៅឆ្នាំក្រោយ អាយុចូលនិវត្តន៍នឹងត្រូវបង្កើនបន្ថែមទៀត ហើយនៅឆ្នាំ ២០៣៦ មន្ត្រីភេទប្រុសនឹងត្រូវបង្កើនអាយុពី៦០ ទៅ ៦៥ ចំណែកស្ត្រីត្រូវបង្កើនពី ៥៥ ទៅ ៦០ឆ្នាំ។
ជាមួយនឹងការចាប់ខ្លួននេះ អ្នកនាំពាក្យរបស់លោក Vladimir Putin គឺលោក Dmitry Peskov បាននិយាយថា ប៉ូលីសបានធ្វើសកម្មភាពស្របទៅតាមច្បាប់ដើម្បីឆ្លើយតបនឹងការតវ៉ា ដោយគ្មានការអនុញ្ញាត។
ការធ្វើបាតុកម្មនៅក្នុងប្រទេសរុស្ស៊ី បានធ្វើឡើងនៅក្នុងទីក្រុងតូចធំជាង ៨០ ដែលត្រូវបានរៀបចំធ្វើឡើងដោយមេដឹកនាំគណបក្សប្រឆាំង លោក Alexei Navalny និងអ្នកគាំទ្ររបស់លោក។
លោក Navalny មានបំណងដឹកនាំការតវ៉ាកាលពីថ្ងៃអាទិត្យ ប៉ុន្តែកាលពីខែមុន តុលាការបានកាត់ទោសលោកពីបទរំលោភច្បាប់ និងត្រូវបានដាក់ពន្ធនាគាររយៈពេល ៣០ថ្ងៃ។ លោកបានពិពណនាទង្វើនេះថាគឺជាទង្វើមួយដែលធ្វើឡើងដើម្បីរារាំងដល់ការធ្វើបាតុកម្ម។
នៅប្រទេសរុស្ស៊ី អាយុរំពឹងរស់ជាមធ្យម គឺអាយុ ៦៦ឆ្នាំសម្រាប់បុរស រីស្ត្រីវិញអាយុរំពឹងរស់ជាមធ្យម គឺ ៧៧ឆ្នាំ។ សំណើនេះបានធ្វើឲ្យជនជាតិរុស្ស៊ីដែលមានវ័យចំណាស់មានការធុញទ្រាន់ ដោយសារតែពួកគេមានការភ័យខ្លាចថា ពួកគេមិនគេរស់បានយូរ ដើម្បីទទួលយកអត្ថប្រយោជន៍នេះទេ។ ចំណែកយុវជនជំនាន់ក្រោយវិញ មានការព្រួយបារម្ភថា ការរក្សាមន្ត្រីវ័យចំណាស់ក្នុងតួនាទីការងាររយៈពេលយូរបែបនេះ ធ្វើឲ្យយុវជនជំនាន់ក្រោយគ្មានការងារធ្វើ៕
Home ព្រឹត្តិការណ៍ថ្មីៗ មនុស្សជាង ១ពាន់នាក់ត្រូវបានចាប់ខ្លួន នៅក្នុងបាតុកម្មដែលប្រឆាំងទៅនឹងការបង្កើនអាយុចូលនិវត្តន៍