សារព័ត៌មាន the Financial Times បានចេញផ្សាយនៅថ្ងៃទី២៥ កញ្ញា នេះថា សហរដ្ឋអាមេរិកបានឯកភាពលក់អាវុធទៅឲ្យតៃវ៉ាន់ ក្នុងទំហំទឹកប្រាក់ ៣៣០លានដុល្លារ ដែលធ្វើឡើងទៅតាមការចុះហត្ថលេខាមួយ ដែលក្រុងវ៉ាស៊ីនតោនគាំទ្រដល់កោះតៃវ៉ាន់ ខណៈដែលទីក្រុងប៉េកាំងកំពុងតែបង្កើនសម្ពាធរបស់ខ្លួនទៅលើតៃវ៉ាន់។
កិច្ចព្រមព្រៀងដែលបានស្នើឡើងនេះ នឹងរួមចំណែកក្នុងការចែករំលែកនូវយន្តហោះចម្បាំង F-16; C-130 ; F-5 ប្រភេទយន្តហោះចម្បាំងក្នុងស្រុក និងប្រព័ន្ធការពារដែនអាកាសដទៃទៀត ដែលធ្វើឡើងចំពេលដែលអាមេរិក និងចិនកំពុងមើលមុខគ្នាមិនចំរឿងសង្គ្រាមពាណិជ្ជកម្ម និងក៏ពេលដែលតៃវ៉ាន់កំពុងតែមានភាពតានតឹងជាមួយចិនខ្លាំងផងដែរ។
ការលក់នេះនឹងរួមចំណែកដល់សន្តិសុខជាតិអាមេរិកតាមរយៈការបង្កើនសមត្ថភាពការពារជាតិតៃវ៉ាន់។ នេះបើតាមទីភ្នាក់ងារប្រតិបត្តិការសន្តិសុខការពារជាតិរបស់មន្ទីរប៉ង់តាហ្គោន ដែលបាននិយាយនៅក្នុងសេចក្តីថ្លែងការណ៍។ សេចក្តីថ្លែងការណ៍នោះបាននិយាយថា តៃវ៉ាន់នឹងបន្តក្លាយជាកងកម្លាំងដ៏មានសារសំខាន់សម្រាប់ស្ថេរភាពនយោបាយ តុល្យភាពយោធា និងការវិវត្តន៍សេដ្ឋកិច្ចនៅក្នុងតំបន់។
កិច្ចព្រមព្រៀងលក់អាវុធនេះ គឺជាសញ្ញាចុងក្រោយបំផុតនៃទំនាក់ទំនងទីក្រុងវ៉ាស៊ីនតោន និងទីក្រុងតៃប៉ិ។ អ្នកនាំពាក្យវិមានប្រធានាធិបតីតៃវ៉ាន់បាននិយាយថា ការគាំទ្ររបស់សហរដ្ឋអាមេរិកនេះ នឹងបង្កើននូវទំនុកចិត្តដល់តៃវ៉ាន់ ខណៈដែលតៃវ៉ាន់កំពុងតែប្រឈមនឹងការប្រជែងផ្នែកសន្តិសុខយ៉ាងខ្លាំង។
ការលក់នេះ គឺជាកិច្ចព្រមព្រៀងអាវុធទីពីររបស់អាមេរិកជាមួយនឹងតៃវ៉ាន់ ចាប់តាំងពីលោកត្រាំបានចូលកាន់តំណែង។ នៅខែមិថុនា ឆ្នាំ ២០១៧ សហរដ្ឋអាមេរិកធ្លាប់បានឯកភាពលក់អាវុធក្នុងទំហំទឹកប្រាក់ ១,៤ពាន់លានដុល្លារទៅឲ្យតៃវ៉ាន់ផងដែរ ដែលកាលនោះចិនបានបង្ហាញការខឹងសម្បាយ៉ាងខ្លាំងទៅនឹងទង្វើរបស់អាមេរិកនេះ៕
Home ព្រឹត្តិការណ៍ថ្មីៗ សហរដ្ឋអាមេរិកឯកភាពលក់អាវុធទៅឲ្យតៃវ៉ាន់ ក្នុងទំហំទឹកប្រាក់ ៣៣០លានដុល្លារ ចំពេលដែលមានភាពតានតឹងកាន់តែខ្លាំងរវាងចិន និងតៃវ៉ាន់