ដើម្បីសងសឹកទៅនឹងការវាយប្រហារមកលើក្បួនព្យុះហយាត្រាយោធារបស់ខ្លួន កាលពីសប្តាហ៍មុន នៅថ្ងៃទី១ តុលា ២០១៨នេះ អ៊ីរ៉ង់បានបាញ់គ្រាប់មីស៊ីលទៅប្រទេសស៊ីរី។
សារព័ត៌មាន Fox News បានចេញផ្សាយនៅថ្ងៃទី១ តុលា ២០១៨នេះ ដោយស្រង់សម្តីមន្ត្រីកងកម្លាំងឆ្មាំបដិវត្តន៍អ៊ីស្លាមអ៊ីរ៉ង់ ដែលបាននិយាយនៅថ្ងៃចន្ទនេះថា ខ្លួនបានបាញ់គ្រាប់មីស៊ីលប៉ាឡេស្ទីក តម្រង់ទីរកក្រុមបះបោរ ដើម្បីធ្វើការសងសឹងទៅនឹងការវាយប្រហារមកលើក្បួនយោធារបស់ខ្លួនកាលពីពេលថ្មីៗកន្លងទៅនេះ។
ការបាញ់គ្រាប់មីស៊ីលពីសំណាក់កងកម្លាំងឆ្មាំបដិវត្តន៍អ៊ីស្លាមអ៊ីរ៉ង់នេះ គឺជាការបាញ់គ្រាប់មីស៊ីលជាលើកទី២ ហើយកនុងរយៈពេលមួយឆ្នាំនេះ។
ទូរទស្សន៍រដ្ឋអ៊ីរ៉ង់បាននិយាយថា ការវាយប្រហារដោយគ្រាប់មីស៊ីលនេះ បានសម្លាប់ និងធ្វើឲ្យក្រុមបះបោរមួយចំនួនរងរបួស ប៉ុន្តែមិនបានបញ្ជាក់ឲ្យបានលម្អិតអំពីចំនួន ជនរងគ្រោះទាំងនោះទេ។
ទូរទស្សន៍បានផ្សាយខ្សែភាពយន្តរបស់អ្នកយកព័ត៌មានម្នាក់របស់ខ្លួន ដែលឈរនៅជិតគ្រាប់មីស៊ីលមួយគ្រាប់ ក្នុងចំណោមមីស៊ីលជាច្រើន ដែលត្រូវបានបង្ហោះចេញពីតំបន់ Kermanshan។ ប្រភពពីទូរទស្សន៍ដដែលបានបង្ហាញថា គ្រាប់មីស៊ីលទាំងនោះបានហោះចំកណ្តាលប្រទេសអ៊ីរ៉ាក់ នៅជិតទីក្រុង Tikrit មុនពួកវាបានទម្លាក់ទៅលើទីក្រុង Abu Kamal នៅភាគខាងត្បូងនៃប្រទេសស៊ីរី។
ទីក្រុង Abu Kamal ត្រូវបានដណ្តើមកាន់កាប់ដោយកងកម្លាំងស្ម័គ្រស្មោះទៅនឹងប្រធានាធិបតអាសាដ។
អ្វីដែលគួរឲ្យកត់សម្គាល់ គ្រាប់មីស៊ីលមួយគ្រាប់ ដែលបានបង្ហាញនៅលើបណ្តាញទូរទស្សន៍រដ្ឋមានពាក្យស្លោកថា «មរណភាពចំពោះអាមេរិក អ៊ីស្រាអែល និងមរណភាពចំពោះអារ៉ាប៊ីសាអូឌីត»។
អ្នករាយការណ៍ប្រចាំទូរទស្សន៍រដ្ឋអ៊ីរ៉ង់បាននិយាយថា «នេះគឺជាការបន្លឺសម្លេងនៃគ្រាប់មីស៊ីលរបស់កងកម្លាំងឆ្មាំបដិវត្តន៍អ៊ីស្លាមអ៊ីរ៉ង់។ ក្នុងរយៈពេលតែប៉ុន្មាននាទីតែប៉ុណ្ណោះ ពិភពលោកនៃការក្រអឺតក្រទមអាមេរិក និងអារ៉ាប៊ីសាអូឌីតនឹងលឺសម្លេងផ្ទុះផ្ទួនៗរបស់អ៊ីរ៉ង់»។
ទីភ្នាក់ងារព័ត៌មាន Fars News ដែលត្រូវបានគេជឿថាមានភាពជិតស្និទ្ធទៅនឹងកងកម្លាំងអ៊ីរ៉ង់ បានកំណត់អត្តសញ្ញាណនៃគ្រាប់មីស៊ីលទាំង ៦គ្រាប់នោះថាជា មីស៊ីល Zolfagha និងមីស៊ីល Qiam ដែលអាចបាញ់បានចម្ងាយ ៧៥០គីឡូម៉ែត្រ និង ៨០០គីឡូម៉ែត្រ។ ក្រៅពីនេះ បន្ទាប់ពីគ្រាប់មីស៊ីលត្រូវបានបាញ់រួចហើយ អ៊ីរ៉ង់បានចាប់ផ្តើមបើកការវាយប្រហារដោយយន្តហោះគ្មានមនុស្សបើកផងដែរ៕
ពាក់ព័ន្ធទៅនឹងការវាយប្រហារនេះ គេមិនដឹងច្បាស់ទេថា តើការវាយប្រហារនោះប៉ះពាល់ទៅលើកងទ័ពអាមេរិកដែរឬយ៉ាងណានោះទេ ប៉ុន្តែកាលពីប៉ុន្មានខែមុន កងទ័ពសហរដ្ឋអាមេរិកធ្លាប់មានវត្តមាននៅទន្លេយូហ្វ្រេតប្រទេសស៊ីរី។ យ៉ាងណាក៏ដោយ កាលពីពេលថ្មីៗនេះ មន្ត្រីសហរដ្ឋអាមេរិកបានគម្រាមហើយថា អ៊ីរ៉ង់អាចនឹងបើកការវាយប្រហារមកលើកងកម្ឡាំងរបស់ខ្លួន នៅតំបន់មជ្ឈឹមបូព៌ា។ អាមេរិកគម្រាមថា បើកងទ័ពអ៊ីរ៉ង់ហ៊ានប៉ះមកលើកងទ័ពរបស់ខ្លួន អាមេរិកនឹងធ្វើការឆ្លើយតបទៅវិញយ៉ាងចាស់ដៃតែម្តង៕
Home ព្រឹត្តិការណ៍ថ្មីៗ អ៊ីរ៉ង់បាញ់គ្រាប់មីស៊ីលទំនងសំដៅទៅរកមូលដ្ឋានទ័ពអាមេរិក ដើម្បីសកសឹងទៅនឹងការវាយប្រហារមកលើក្បួនយោធារបស់ខ្លួន