យោងតាមសារព័ត៌មាន CNN នៅថ្ងៃទី៦ វិច្ឆិកា ២០១៨នេះបានឲ្យដឹងថា ក្រុមប្រដាប់ដោយអាវុធប្រុសៗជាច្រើនបានចាប់ពង្រត់សិស្សសាលាចំនួន ៧៩នាក់ ពីសាលារៀនមួយកន្លែងស្ថិតនៅភាគពាយ័ព្យនៃប្រទេសកាមេរូន។ នេះបើតាមមន្ត្រីក្នុងស្រុកដែលបាននិយាយ។
លោក Louis Marie Begne អ្នកនាំពាក្យរបស់រដ្ឋាភិបាលនៅភាគពាយព្យនៃប្រទេសកាមេរ៉ូន បាននិយាយថា បុរសប្រដាប់ដោយអាវុធទាំងនោះ បានចូលទៅកាន់វិទ្យាល័យ Presbyterian នៅក្នុងតំបន់ Bamenda ច្រានកងកម្លាំងការពារ និងបានចូលយកក្មេងៗ ដែលកំពុងដេកលក់។
បុរសទាំងនោះបាននាំយកក្មេងៗប្រុសៗ រួមទាំងក្មេងស្រីៗចំនួន ៧៩នាក់ ហើយបានបើករថយន្តសាលាដឹកពួកគេចេញទៅ។ ជាមួយគ្នានេះដែរ ក្រុមប៉ូលីស និងកងកម្លាំងប្រដាប់អាវុធក៏បានស្វែងរកក្មេងៗទាំងនោះផងដែរ។ កងវរសេនាអន្តរាគមន៍រហ័ស ដែលជាកងអង្គភាពយោធាដ៏សំខាន់មួយ បានបញ្ជូនកងកម្លាំងតាមឧទ្ធម្ភាគចក្រ ដើម្បីស្វែងរកក្រុមក្មេងៗ ដែលត្រូវបានចាប់ពង្រត់ទាំងនោះ។
អ្នកនាំពាក្យ លោក Begne បាននិយាយថា នាយកសាលាត្រូវបានចាប់ពង្រត់ ហើយទើបត្រូវបានអនុញ្ញាតឲ្យត្រឡប់ទៅបង្រៀនវិញកាលពី ៣ថ្ងៃមុន ប៉ុន្តែលោកក៏ត្រូវបានគេប្រាប់មិនឲ្យទៅសាលាវិញផងដែរ។ អ្នកនាំពាក្យរូបនោះមិនច្បាស់ថា ក្រុមណាមួយជាអ្នកចាប់ពង្រត់នោះទេ ។
ក្រុមអ្នកប្រយុទ្ធបំបែកខ្លួននិយាយភាសាអង់គ្លេសរបស់កាមេរូន ដែលបានស្នើសុំឯករាជ្យភាពផ្តាច់ខ្លួនពីរដ្ឋាភិបាលកាមេរូន ដែលនិយាយភាសាបារាំង ត្រូវបានចោទប្រកាន់ថាបានចាប់ពង្រត់កូនសិស្សនៅភាគខាងជើង និងភាគនិរតីនៃប្រទេសប្រទេសកាមេរូន។
កាលពីខែកញ្ញា កូនសិស្ស ៧នាក់ និងគ្រូបង្រៀនម្នាក់ត្រូវបានចាប់ពង្រត់ដោយក្រុមបំបែកខ្លួនប្រដាប់អាវុធពីសាលារៀនរបស់ពួកគេ នៅក្នុងទីក្រុង Bafut នៅភាគពាយព្យនៃប្រទេសនេះ។ នេះបើយោងតាមអង្គការលើកលែងទោសអន្តរជាតិ។
ក្រុមសិទិ្ធមនុស្សបានអះអាងថា ចំណាប់ខ្មាំងត្រូវបានគេធ្វើទារុណកម្ម ដោយរងរបួសយ៉ាងធ្ងន់ធ្ងរដោយក្រុមនេះ មុនសិស្ស និងគ្រូត្រូវបានដោះលែង។ ក្រុមសិទ្ធមនុស្សក៏បាននិយាយផងដែរថា ក្រុមបំបែកខ្លួនទាំងនេះបានបង្ហាញនូវការវាយប្រហាររបស់ខ្លួនទៅលើកងកម្លាំង នៅក្នុងទីក្រុង Buea នៅភាគនិរតីនៃប្រទេសកាមេរូន នៅក្នុងខែតែមួយនេះ៕
Home ព្រឹត្តិការណ៍ថ្មីៗ ក្រុមមន្ត្រីនិយាយថា សិស្សសាលា ៧៩នាក់ត្រូវបានចាប់ពង្រត់ពីសាលារៀនមួយកន្លែងនៅក្នុងប្រទេសកាមេរូន