យោងតាមសារព័ត៌មាន Express របស់អង់គ្លេសនៅថ្ងៃទី១២ ធ្នូនេះបានឲ្យដឹងថា រូបភាពពីវីដេអូបានបង្ហាញពីការផ្ទុះគ្រាប់មីស៊ីលរបស់រុស្ស៊ីនាពេលយប់ បន្ទាប់ពីវាត្រូវបានបាញ់បង្ហោះឡើង។ ការបាញ់បង្ហោះគ្រាប់មីស៊ីលនេះ បានធ្វើឡើងនៅទីលានមួយកន្លែងនៅកន្លែងសាកល្បងមីស៊ីល នៅមូលដ្ឋានយោធា។
ឧបទ្ទវហេតុនេះបានកើតឡើងនៅតំបន់បាញ់បង្ហោះ Kasputin Yar និងតំបន់អភិវឌ្ឍន៍នៅតំបន់ Astrakhan ភាគខាងត្បូងប្រទេសរុស្ស៊ី។ មីស៊ីលនេះត្រូវបានគេជឿថាជា ប្រភេទមីស៊ីល S-350 Vityaz ដែលជាមីស៊ីលរយៈចម្ងាយមធ្យម ដែលត្រូវបានដាក់ចូលទៅក្នុងសេវាកម្មជាមួយកងកម្លាំងរុស្ស៊ីចាប់តាំងពីឆ្នាំ ២០០៩មក។
ក្រសួងការពារជាតិរបស់រុស្ស៊ីមិនបានបញ្ជាក់ពីរបាយការណ៍អំពីឧប្បត្តិហេតុដែលកើតឡើងនោះទេ ដែលត្រូវបានគេគិតថាបានកើតឡើង កាលពីថ្ងៃទី ៧ ខែធ្នូ។ ទោះជាយ៉ាងណាក៏ដោយ ទីភ្នាក់ងារសារព័ត៌មានរុស្ស៊ី Tass បាននិយាយថា មីស៊ីលបានផ្ទុះនៅលើអាកាស បន្ទាប់ពីវាត្រូវបានបាញ់បង្ហោះ ប៉ុន្តែវាមិនបានបង្កឲ្យមានអ្នករងសបួសឬស្លាប់នោះទេ។ មីស៊ីល S-350 Vityaz គឺជាប្រព័ន្ធមីស៊ីលចម្ងាយមធ្យម ដែលកំពុងស្ថិតក្នុងការធ្វើការសាកល្បង។
ដោយបានចាប់ផ្តើមធ្វើការលើប្រព័ន្ធនេះនៅឆ្នាំ ២០០៧ ការសាកល្បងជាលើកដំបូងបានចាប់ផ្តើមនៅឆ្នាំ ២០១៣ ហើយបានបញ្ចប់នៅឆ្នាំ ២០១៧។ ប្រព័ន្ធនេះត្រូវបានសន្និដ្ឋានថាបានជំនួសឲ្យប្រភេទមីស៊ីល S-300PS និង BUK-Ma-1-2។
តំបន់អភិវឌ្ឍន៍ និងចាប់ផ្តើមគ្រាប់រ៉ុក្កែត Kapustin Yar គឺស្ថិតនៅចន្លោះទីក្រុងឧស្សាហកម្មវ៉ុលហ្គោហ្ក្រាដ និងអាស្ត្រាខាន់ នៅជិតទីប្រជុំជន Znamensk។
ការសាកល្បងមីស៊ីលពីសំណាក់រុស្ស៊ី ត្រូវបានចាត់ទុកថាគឺជាការរំលោភលើសន្ធិសញ្ញានុយក្លេអ៊ែរ ដោយហេតុនេះហើយទើបបានជាលោកត្រាំបានប្រកាសពីការដកខ្លួនចេញពីសន្ធិសញ្ញានុយក្លេអ៊ែរចម្ងាយមធ្យមធ្វើឡើងរវាងប្រទេសទាំអពីរកាលសម័យសង្គ្រាមត្រជាក់។ អាមេរិកទុកពេលឲ្យរុស្ស៊ី ៦០ថ្ងៃមុននឹងប្រកាសដកខ្លួនជាផ្លូវការ ដែលការទុកពេលនេះ បានស៊ីពេលអស់មួយសប្តាហ៍ហើយ រុស្ស៊ីសល់ប្រហែល ៥០ថ្ងៃទៀត។
ដូចគ្នានេះដែរ កាលពីសប្តាហ៍មុន សេចក្តីថ្ឡែងការណ៍រួមពីរដ្ឋមន្ត្រីការបរទេសអង្គការណាតូបាននិយាយដោយគាំទ្រលើគោលជំហរអាមេរិក ដោយបានស្តីបន្ទោសរុស្ស៊ីអំពីការរំលោភលើសន្ធិសញ្ញានុយក្លេអ៊ែរនោះយ៉ាងពិតប្រាកដមែន។ យ៉ាងណាមិញ រុស្ស៊ីបានធ្វើការបដិសេធចំពោះការចោទប្រកាន់នេះ៕