(ទីក្រុងដាម៉ាស់)៖ រុស្ស៊ីត្រូវបានគេរាយការណ៍ថា កំពុងតែប្រជែងទៅនឹងវត្តមានសហរដ្ឋអាមេរិកនៅក្នុងប្រទេសស៊ីរីតាមរយៈការសាកល្បងអាវុធថ្មី បង្កើនការការពារខ្លួន និងពង្រីកវត្តមានកងទ័ពរបស់ទៅកាន់តែកៀកទៅនឹងទីតាំងដែលកងកម្លាំងសហរដ្ឋអាមេរិកកំពុងតែឈរជើង។
ក្នុងរយៈពេលប៉ុន្មានថ្ងៃបន្ទាប់ពីវិលត្រលប់ពីដំណើរទស្សនកិច្ចរបស់លោកទៅកាន់ប្រទេសស៊ីរី លោកឧបនាយករដ្ឋមន្ត្រីរុស្ស៊ី លោក Yury Borisov បានធ្វើការរៀបរាប់ទៅកាន់ប្រព័ន្ធផ្សព្វផ្សាយក្នុងស្រុកកាលពីថ្ងៃចន្ទថា ប្រព័ន្ធអាវុធថ្មីជាច្រើនត្រូវបានគេណែនាំទៅកាន់តំបន់មានជម្លោះ។ ទាំងនេះរួមមានប្រព័ន្ធប្រឆាំងមីស៊ីល Pantsir S1 និងប្រព័ន្ធមីស៊ីល Iskander-M ដែលដាក់បាញ់នៅលើដី យន្តហោះទម្លាក់គ្រាប់បែក Tupolev Tu-160 យន្តហោះ Tu-22M3 យន្តហោះទម្លាក់គ្រាប់បែក Tu-95 យន្តហោះចម្បាំង Mikoyan Mig-29K និងឧទ្ធម្ភាចក្រ Ka-52K Ktran។
លោកក៏បានសរសើរជាពិសេសចំពោះយន្តហោះចម្បាំង Sukhoi Su-35 និង Su-30SM ដែលមានសមត្ថភាពហួសពីការរំពឹងទុក។ លោកបីរសូវបានធ្វើការសាទរចំពោះការដាក់ពង្រាយប្រព័ន្ធមីស៊ីល S-300 នៅក្នុងប្រទេសស៊ីរីកាលពីខែតុលា ដោយលោកបាននិយាយថា ការបើកការវាយប្រហារតាមផ្លូវអាកាសរបស់ក្រុមចម្រុះនៅភាគឥសាន្តប្រទេសស៊ីរី ត្រូវបានកាត់បន្ថយ។
រុស្ស៊ីបានបញ្ជូនប្រព័ន្ធមីស៊ីល S-300s ទៅប្រទេសស៊ីរីបន្ទាប់ពីឧប្បត្តិហេតុអន្តរជាតិមួយដែលទាក់ទងនឹងការវាយឆ្មក់តាមអាកាសរបស់អ៊ីស្រាអែលទៅលើឃ្លាំងអាវុធដែលគេសង្ស័យថាជារបស់អ៊ីរ៉ង់ កាលពីខែកញ្ញា។ កាលនោះ យន្ដហោះ Ilyushin Il-20 របស់រុស្ស៊ីត្រូវបានកងកម្លាំងស៊ីរីបាញ់ច្រលំដៃ ដោយពេលនោះ គាប់ជួប់ជួនយនត្ហោះចម្ពាំងអ៊ីស្រាអែល ៤គ្រឿងបើកបញ្ឆោតប្រព័ន្ធមីស៊ីលរុស្ស៊ី ចំពេលដែលយន្តហោះយោធារុស្ស៊ីកំពុងធ្វើដំណើរកាត់តាមផ្លូវនោះ។ រុស្ស៊ីចោទអ៊ីស្រាអែលថា បានឆ្មក់យកឱកាស ដើម្បីបើកការវាយប្រហារទៅលើឃ្លាំងអាវុធរបស់អ៊ីរ៉ង់នៅក្នុងប្រទេសស៊ីរី។
អ្នកវិភាគយោធារុស្ស៊ី លោកវរសេនីយ៍ឯក Shamil Gareyev បាននិយាយកាលពីថ្ងៃចន្ទថា ការប៉ះទង្គិចគ្នាដោយផ្ទាល់រវាងរុស្ស៊ី និងសហរដ្ឋអាមេរិកគឺមិនទំនងជានឹងកើតឡើងនោះទេ ប៉ុន្តែរុស្ស៊ីអាចនឹងបង្កើនចំនួនអង្គភាពរបស់ខ្លួននៅក្នុងប្រទេសស៊ីរី ដើម្បីដាក់សម្ពាធឲ្យអាមេរិកដកទ័ពចេញពីប្រទេសនេះ៕
