ប្រទេសរុស្ស៊ីបានប្រកាសថា យោធារបស់ខ្លួននឹងធ្វើសមយុទ្ធកងកំលាំងនុយក្លេអ៊ែររបស់ខ្លួននៅឆ្នាំក្រោយ ដែលជាសមយុទ្ធមួយក្នុងចំណោមសមយុទ្ធរាប់ពាន់ ដែលត្រូវបានគ្រោងទុក បន្ទាប់ពីសហរដ្ឋអាមេរិកបានគំរាមដកចេញនូវសន្ធិសញ្ញានុយក្លេអ៊ែរមក។
ថ្លែងទៅកាន់កិច្ចប្រជុំក្រុមប្រឹក្សាសន្តិសុខប្រចាំឆ្នាំរបស់ក្រសួងការពារជាតិរុស្ស៊ី លោករដ្ឋមន្ត្រីក្រសួងការពារជាតិរុស្ស៊ី Sergei Shoigu បាននិយាយថា លំហាត់សមយុទ្ធនិងការហ្វឹកហ្វឺនជាង ១ម៉ឺន ៨ពាន់មុខ ត្រូវបានធ្វើកាលពីឆ្នាំមុន និងសមយុទ្ធថ្មីត្រូវបានគ្រោងទុកសម្រាប់ឆ្នាំ ២០១៩។ សមយុទ្ធទាំងនេះនឹងរួមមានបញ្ជាការយុទ្ធសាស្ត្រ និងសមយុទ្ធកងកម្លាំង ដែលហៅថា Center-2019 និងកងកម្លាំងយុទ្ធសាស្ត្រ Thunder ដែលសមយុទ្ធទាំងពីរនេះត្រូវបានធ្វើឡើងដើម្បីធ្វើការសាកល្បងលទ្ធភាពរបស់ប្រទេសនេះ ដើម្បីបង្ហាញពីការវាយប្រហារដោយនុយក្លេអ៊ែរ ប្រសិនបើចាំបាច់។
ក្រសួងបាននិយាយនៅក្នុងសេចក្តីថ្លែងការណ៍មួយថា «កងកម្លាំងនុយក្លេអ៊ែរយុទ្ធសាស្ត្រ ត្រូវបានរក្សាកម្រិតមួយដែលអាចធ្វើឱ្យមានការធានានូវការទប់ស្កាត់នុយក្លេអ៊ែរ»។ «កិច្ចការដែលបានកំណត់នៅឆ្នាំ ២០១៧ ដើម្បីនាំយកយុទ្ធសាស្ត្រអាវុធនុយក្លេអ៊ែរ ទៅជាកម្រិតនៃការធ្វើទំនើបកម្ម ៨២ភាគរយ ត្រូវបានបញ្ចប់»។
យោងតាមក្រសួងលោក Shoigu បានកត់សម្គាល់ថា «ផ្ទុយទៅនឹងការដាក់ពង្រាយប្រព័ន្ធការពារគ្រាប់មីស៊ីលរបស់សហរដ្ឋអាមេរិក កងកម្លាំងប្រដាប់អាវុធកំពុងបង្កើនសក្តានុពលនៃការវាយប្រហាររបស់ពួកគេ»។
លោកបានសរសើរថា ការបន្ថែមនូវក្រុមនាវាផ្ទុកយន្តហោះយុទ្ធសាស្ត្រថ្មីសម្រាប់កងទ័ពអាកាស ទ័ពថ្មើជើង និងទ័ពជើងទឹក រួមទាំងការដាក់ពង្រាយអាវុធដែលមានសមត្ថភាពខាងនុយក្លេអ៊ែរថ្មី ដូចជាគ្រាប់មីស៊ីលប៉ាឡេស្ទីកអន្តរទ្វីបសាម៉ាត RS-28 យានបាញ់គ្រាប់មីស៊ីលល្បឿនលឿនជាងសម្លេង Avangard និងមីស៊ីលបាញ់នៅលើអាកាសដែលមានល្បឿនលឿនជាងសម្លេង Kinzhal ដែលទាំងអស់នេះត្រូវបានធានាថានឹងអាចយកឈ្នះលើប្រព័ន្ធប្រឆាំងមីស៊ីលទំនើបបាន។
ការប្រកាសធ្វើសមយុទ្ធនេះ បានធ្វើឡើងបន្ទាប់ពីសហរដ្ឋអាមេរិកបានគម្រាមថា នឹងដកខ្លួនចេញពីសន្ធិសញ្ញានុយក្លេអ៊ែរ ដែលថ្មីៗនេះ រដ្ឋមន្ត្រីការបរទេសអាមេរិកបានប្រកាសថា អាមេរិកទុកពេលឲ្យរុស្ស៊ី៦០ ថ្ងៃទៀត មុននឹងប្រកាសជាផ្លូវការនូវការដកខ្លួនចេញពីសន្ធិសញ្ញានេះ៕
Home ព្រឹត្តិការណ៍ថ្មីៗ រុស្ស៊ីនឹងធ្វើការសាកល្បងកម្លាំងនុយក្លេអ៊ែររបស់ខ្លួន ខណៈដែលលោកពូទីនបានព្រមានពីការប្រណាំងប្រជែងគ្រឿងសព្វាវុធជាមួយសហរដ្ឋអាមេរិក