(ទីក្រុងគាវ)៖ សារព័ត៌មាន News Week បានចេញផ្សាយនៅថ្ងៃទី២០ ធ្នូនេះថា មន្ត្រីជាន់ខ្ពស់អ៊ុយក្រែនមួយរូបបាននិយាយថា អ៊ុយក្រែននឹងបញ្ជូនក្រុមនាវាចម្បាំងទៅប្រឈមមុខជាមួយរុស្ស៊ីនៅក្នុងសមុទ្រអាហ្សូវ ដែលការសម្រេចចិត្តបែបនេះត្រូវបានរុស្ស៊ីហៅថា ជាការបង្កហេតុ។
លេខាធិការនៃក្រុមប្រឹក្សាសន្តិសុខជាតិ និងការពារជាតិលោក Oleksandr Turchynov បានប្រាប់សារព័ត៌មាន BBC នៅក្នុងបទសម្ភាសន៍មួយ ដែលបានផ្សាយកាលពីថ្ងៃពុធថាបេសកកម្មរបស់កងទ័ពជើងទឹកមួយទៀត គឺចាំបាច់ ដើម្បីរារាំងប្រទេសរុស្ស៊ី ពីការគ្រប់គ្រងតំបន់ដែនទឹករួមទាំងស្រុង។ ទន្ទឹមនេះ ទីក្រុងមូស្គូបានធ្វើការឆ្លើយតបវិញភ្លាមៗ ដោយបានធ្វើការរិះគន់គម្រោងនៃការបញញ្ជូនក្រុមនាវាចម្ពាំងទាំងនេះ។
យ៉ាងណាក៏ដោយ លោក Turchynov បានទទូចថា អ៊ុយក្រែនមិនមានជម្រើសទេ។ ទោះបីជាលោកមិនបាននិយាយថា នៅពេលណាដែលទីក្រុងគាវ គ្រោងនឹងចាប់ផ្តើមប្រតិបត្តិការនេះក៏ដោយ ក៏លោកបានពន្យល់ថា កងនាវាចម្បាំងអ៊ុយក្រែននឹងអញ្ជើញក្រុមអ្នកតំណាងមកពីអង្គការសន្តិសុខ និងសហប្រតិបត្តិការនៅទ្វីបអឺរ៉ុប និងក្រុមអន្ដរជាតិដទៃទៀត ដើម្បីចូលរួមនៅលើនាវារបស់ខ្លួន ក្នុងអំឡុងពេលបេសកកម្ម។
មន្ត្រីអ៊ុយក្រែនក៏បាននិយាយផងដែរថា កងកម្លាំងយោធាអ៊ុយក្រែននឹងដាក់ពង្រាយគ្រាប់មីស៊ីលថ្មីនៅលើឆ្នេរ ដែលអាចបាញ់បានឆ្ងាយ ជាពិសេសទៅដល់ស្ពានដែលរុស្ស៊ីបានបិទច្រកសមុទ្រខឺចតែម្តង។
ភាពតានតឹងរវាងរុស្ស៊ី និងអុយក្រែនបានកើតឡើងបន្ទាប់ពីរុស្ស៊ីបានបើកការវាយប្រហារទៅលើនាវាវិកអ៊ុយក្រែនកាលពីថ្ងៃទី២៥ វិច្ឆិកា បន្ទាប់ពីនាវាអ៊ុយក្រែនកំពុងធ្វើដំណើរកាត់តាមច្រកសមុទ្រខឺច ដែលជាដែនទឹករួមរវាងប្រទេសទាំងពីរ ខណៈដែលរុស្ស៊ីអះអាងថាជាដែនទឹករបស់ខ្លួន៕
